ନୂଆଦିଲ୍ଲୀ,୯।୬:ଅପରେଶନ ସିନ୍ଦୂର ପରେ ଭାରତ ଆଉ ଏକ ବଡ଼ ନିଷ୍ପତ୍ତି ନେଇଛି। ପ୍ରତିରକ୍ଷା ମନ୍ତ୍ରଣାଳୟ ଭାରତୀୟ ବାୟୁସେନା ପାଇଁ ୧୦ କୋଟି ଟଙ୍କା ମୂଲ୍ୟରେ ୩ଟି ହାଇ-ଟେକ ସ୍ପାଏ ପ୍ଲେନ କିଣିବାକୁ ପ୍ରସ୍ତୁତ ହେଉଛି। ଏଥିପାଇଁ ଏକ ପ୍ରସ୍ତାବ ଆଣିବାକୁ ଯାଉଛି। ବାୟୁସେନା ଏହା ମାଧ୍ୟମରେ ଶତ୍ରୁର ସଠିକ ସ୍ଥିତି ଜାଣିପାରିବ। ଆଇ-ଷ୍ଟାର (ଇଣ୍ଟେଲିଜେନ୍ସ, ସର୍ଭିଲାନ୍ସ, ଟାର୍ଗେଟ ଆକ୍ୱିଜିସନ ଏବଂ ରିକୋନାଇସାନ୍ସ) ପ୍ରକଳ୍ପ ସେନାର କାମକୁ ସହଜ କରିବ।
ଆଇ-ଷ୍ଟାର ସେନାକୁ ଏୟାର-ଟୁ-ଗ୍ରାଉଣ୍ଡ ନିରୀକ୍ଷଣ ପ୍ରଦାନ କରେ। ଏହା ଆକ୍ରମଣ ସମୟରେ ଶତ୍ରୁ ବିଷୟରେ ସଠିକ ସୂଚନା ପ୍ରଦାନ କରିବ ଏବଂ ଯେକୌଣସି ଅପରେଶନ ସମୟରେ ଏହା ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିପାରିବ। ଭାରତୀୟ ବାୟୁସେନା ଆକାଶରୁ ଭୂମିକୁ ଏକ ସ୍ପଷ୍ଟ ଚିତ୍ର ପାଇପାରିବ ଏବଂ ଏହା ସହଜରେ ଶତ୍ରୁର ଭୂମି ଲକ୍ଷ୍ୟସ୍ଥଳ (ଯେପରିକି ରାଡାର ଷ୍ଟେଶନ, ଏୟାର ଡିଫେନ୍ସ ୟୁନିଟ) ଉପରେ ଆକ୍ରମଣ କରିପାରିବ।
ସେନାର ଏହି ପ୍ରକଳ୍ପକୁ ଜୁନ ଚତୁର୍ଥ ସପ୍ତାହରେ ଅନୁମୋଦନ ମିଳିପାରେ। ପ୍ରତିରକ୍ଷା ଅଧିକାରୀମାନେ କହିଛନ୍ତି ଯେ, ଗୁପ୍ତଚର, ନିରୀକ୍ଷଣ, ଲକ୍ଷ୍ୟ ହାସଲ ଏବଂ ପରୀକ୍ଷଣ (I-STAR) ପାଇଁ ୧୦,୦୦୦ କୋଟି ଟଙ୍କାର ପ୍ରକଳ୍ପ ପ୍ରତିରକ୍ଷା ମନ୍ତ୍ରଣାଳୟର ଏକ ଉଚ୍ଚସ୍ତରୀୟ ବୈଠକରେ ଅନୁମୋଦନ ପାଇଁ ରଖାଯିବ, ଯଦିଓ ଏ ବିଷୟରେ ସେନା ପକ୍ଷରୁ ଏପର୍ଯ୍ୟନ୍ତ କୌଣସି ସରକାରୀ ବିବୃତ୍ତି ଆସିନାହିଁ।
I-Star ବିମାନରେ କ’ଣ ବିଶେଷ ଅଛି
I-Star ଗୁପ୍ତଚର ବିମାନ ପାଇବା ପରେ, ଭାରତକୁ ଏକ ସ୍ବତନ୍ତ୍ର ତାଲିକାରେ ସାମିଲ କରାଯିବ। ଏହି ବିମାନ ଆମେରିକା, ୟୁକେ ଏବଂ ଇସ୍ରାଏଲ ସମେତ ବହୁତ କମ ଦେଶ ପାଖରେ ଅଛି। I-Star ସମୟ-ସମ୍ବେଦନଶୀଳ ଟାର୍ଗେଟିଂ କ୍ଷମତା ପ୍ରଦାନ କରେ ଏବଂ ଏହା ସହିତ ସୁରକ୍ଷା ସ୍ତର ବୃଦ୍ଧି କରେ। ଏଥିରେ ମଲ୍ଟି-ସ୍ପେକ୍ଟ୍ରାଲ ନିରୀକ୍ଷଣ କ୍ଷମତା ଅଛି।
ଅପରେଶନ ସିନ୍ଦୂର ସମୟରେ ଭାରତ ୧୦୦ରୁ ଅଧିକ ଆତଙ୍କବାଦୀଙ୍କୁ ହତ୍ୟା କରିଥିଲା। ଏହା ପରେ, ପାକିସ୍ତାନ ଡ୍ରୋନ ଏବଂ ମିସାଇଲ ସାହାଯ୍ୟରେ ଦେଶର ଅନେକ ସହର ଉପରେ ଆକ୍ରମଣ କରିବାକୁ ଚେଷ୍ଟା କରିଥିଲା। କିନ୍ତୁ, ଏହା ବିଫଳ ହୋଇଥିଲା। ଏବେ ସୁରକ୍ଷାକୁ ଦୃଷ୍ଟିରେ ରଖି, ଭାରତ ସେନାକୁ ଗୁପ୍ତଚର ବିମାନ ହସ୍ତାନ୍ତର କରିବାକୁ ଯୋଜନା କରିଛି। ଏହା ଦ୍ୱାରା ପାକିସ୍ତାନ ଉପରେ ନଜର ରଖାଯାଇପାରିବ। ଅନ୍ୟପକ୍ଷରେ, ପାକିସ୍ତାନ ଚାଇନା ସହିତ ଯୁଦ୍ଧ ବିମାନ ପାଇଁ ଏକ ଚୁକ୍ତି ମଧ୍ୟ ସ୍ବାକ୍ଷର କରିଛି।
