ନୂଆଦିଲ୍ଲୀ,୮।୯: ଭାରତ ଓ ଇସ୍ରାଏଲ ସୋମବାର ନୂଆଦିଲ୍ଲୀରେ ଏକ ଦ୍ୱିପାକ୍ଷିକ ନିବେଶ ଚୁକ୍ତି ସ୍ୱାକ୍ଷର କରି ଅର୍ଥନୈତିକ ସମ୍ପର୍କକୁ ଆହୁରି ମଜବୁତ କରିଛନ୍ତି। ଏହି ଚୁକ୍ତି ଦ୍ୱାରା ପରସ୍ପର ନିବେଶକୁ ପ୍ରୋତ୍ସାହନ ଓ ସୁରକ୍ଷା ପ୍ରଦାନ କରାଯିବ।
ଇସ୍ରାଏଲର ଅର୍ଥ ମନ୍ତ୍ରଣାଳୟ ଅନୁଯାୟୀ, ଏହା ହେଉଛି ପ୍ରଥମ ଥର ପାଇଁ ଏକ ଓଇସିଡି (OECD) ଦେଶ ଭାରତ ସହ ଏଭଳି ଚୁକ୍ତି କରିଛି। ଏହି ଚୁକ୍ତି ବ୍ୟବସାୟ ପାଇଁ ନିରାପଦ ଓ ସ୍ଥିର ପରିବେଶ ସୃଷ୍ଟି କରିବ ଏବଂ ବାଣିଜ୍ୟ ଓ ନିବେଶ ପାଇଁ ନୂଆ ସୁଯୋଗ ଆଣିବ ବୋଲି ଅଧିକାରୀମାନେ କହିଛନ୍ତି।
ଇସ୍ରାଏଲ ଅର୍ଥ ମନ୍ତ୍ରଣାଳୟ ସୋସିଆଲ ମିଡିଆରେ ଲେଖିଛି, “ଭାରତ ସରକାର ଓ ଇସ୍ରାଏଲ ସରକାର ସୋମବାର ନୂଆଦିଲ୍ଲୀରେ ଦ୍ୱିପାକ୍ଷିକ ନିବେଶ ଚୁକ୍ତି ସ୍ୱାକ୍ଷର କରିଛନ୍ତି।”ଏହି ଚୁକ୍ତି ଭାରତର ଅର୍ଥମନ୍ତ୍ରୀ ନିର୍ମଳା ସୀତାରମଣ ଓ ଇସ୍ରାଏଲର ଅର୍ଥମନ୍ତ୍ରୀ ବେଜାଲେଲ ସ୍ମୋଟ୍ରିଚ ସ୍ୱାକ୍ଷର କରିଛନ୍ତି।
୨୦୨୪ରେ ଭାରତ ଓ ଇସ୍ରାଏଲ ମଧ୍ୟରେ ବାଣିଜ୍ୟ ୩.୯ ବିଲିୟନ ଡଲାର ରହିଥିଲା। ବିଶେଷଜ୍ଞଙ୍କ ମତରେ, ଏହି ନୂଆ ଚୁକ୍ତି ଦ୍ୱାରା ସୀମାପାର ନିବେଶ ଅଧିକ ସୁରକ୍ଷିତ ଓ ଆକର୍ଷଣୀୟ ହେବ, ଯାହା ବାଣିଜ୍ୟକୁ ଆହୁରି ବୃଦ୍ଧି କରିପାରିବ।
