ମୋହାଲି,୫।୩: ତିନି ମାସ ପରେ ଟେଷ୍ଟ ମ୍ୟାଚ୍ ଖେଳୁଥିବା ଅଲରାଉଣ୍ଡର ରବିନ୍ଦ୍ର ଜାଡେଜା ଶ୍ରୀଲଙ୍କା ବିପକ୍ଷ ମୋହାଲି ଟେଷ୍ଟରେ ଜବରଦସ୍ତ ବ୍ୟାଟିଂ କରିଛନ୍ତି । ପ୍ରଥମ ଟେଷ୍ଟର ପ୍ରଥମ ଇନିଂସରେ ଜାଡେଜା ୨୨୮ ବଲ୍ରେ ରେକର୍ଡ ୧୭୫ ରନ କରିଛନ୍ତି । ଶେଷରେ ଟିମ ଇଣ୍ଡିଆ ତା’ର ପ୍ରଥମ ଇନିଂସରେ ବିଶାଳ ୫୭୪ ରନ କରିବା ପରେ ପାଳି ଘୋଷଣା କରିଛି । ପାଳି ଘୋଷଣା ବେଳେ ଜାଡେଜା ଅପରାଜିତ ୧୭୫ ଓ ମହମ୍ମଦ ଶାମି ୨୦ ରନ କରି କ୍ରିଜରେ ରହିଥିଲେ । ଏବେ ଶ୍ରୀଲଙ୍କା ତା’ର ପ୍ରଥମ ଇନିଂସ୍ର ବ୍ୟାଟିଂ ଆରମ୍ଭ କରିବ।
ମ୍ୟାଚ୍ର ଦ୍ୱିତୀୟ ଦିନ ଶନିବାର ଦୁଇ ସେସନରେ ବ୍ୟାଟିଂ କରି ଭାରତ କେବଳ ୨ଟି ଉଇକେଟ ହିଁ ହରାଇଛି । ରବିଚନ୍ଦ୍ରନ ଅଶ୍ୱିନୀ( ୬୧) ଓ ଜୟନ୍ତ ଯାଦବ(୨) ରନ କରି ପ୍ୟାଭିଲିୟନର ଫେରିବା ପରେ ଆସିଥିଲେ ଜାଡେଜା । ସେ ଶତକ ମାରିବା ପରେ ବିସ୍ଫୋରକ ବ୍ୟାଟିଂ କରିଥିଲେ । ଏହି ଶତକ ସହ ସେ ନିଜ ଟେଷ୍ଟ କ୍ୟାରିୟରର ଦ୍ୱିତୀୟ ଶତକ ହାସଲ ମଧ୍ୟ ହାସଲ କରିଛନ୍ତି । ଅପରାଜିତ ୧୭୫ ତାଙ୍କ ଟେଷ୍ଟ କ୍ୟାରିୟରର ସର୍ବାଧିକ ବ୍ୟକ୍ତିଗତ ସ୍କୋର ।
କହିରଖୁଛୁ, ଶୁକ୍ରବାର ଟସ ଜିତି ପ୍ରଥମେ ବ୍ୟାଟିଂ କରିବାକୁ ଓହ୍ଲାଇଥିଲା ଭାରତ । ପ୍ରଥମ ଦିନର ଖେଳ ଶେଷ ସୁଦ୍ଧା ଭାରତ ଋଷଭ ପନ୍ତଙ୍କ ୯୬ ରନ ବଳରେ ୬ ଉଇକେଟ ହରାଇ ୩୫୭ ରନ କରିଥିଲା । ଶନିବାର ଦୁଇ ଅପରାଜିତ ବ୍ୟାଟ୍ସମ୍ୟାନ ଜାଡେଜା(୪୫) ଓ ଅଶ୍ୱିନୀ(୧୦) ଦଳୀୟ ସ୍କୋରକୁ ଆଗକୁ ନେଇଥିଲେ। ଉଭୟ ଦମଦାର ବ୍ୟାଟିଂ କରି ଶ୍ରୀଲଙ୍କା ବୋଲରଙ୍କୁ ନାକେଦମ କରିଥିଲେ । ସେ ୮୭ ବଲରେ ନିଜର ଅର୍ଦ୍ଧଶତକ ହାସଲ କରିଥିଲେ । ଏଥିସହ ୯୬.୬ ଓଭରରେ ଦଳୀୟ ସ୍କୋରକୁ ୪୦୦ରେ ପହଞ୍ଚାଇଥିଲେ । ଅଶ୍ୱିନ ମଧ୍ୟ ତାଙ୍କୁ ଭରପୂର ସହଯୋଗ କରିଥିଲେ । ଉଭୟ ୧୩୮ ବଲରେ ୭ମ ଉଇକେଟ ପାଇଁ ୧୦୦ ଯୋଡ଼ି ସ୍ଥିତି ମଜବୁତ କରିଥିଲେ ।୧୬୦ ବଲରେ ଶତକ ଅର୍ଜନ କରିଥିବା ଜାଡେଜା ଏଠାରେ ଅଟକି ନ ଥିଲେ । ଲଞ୍ଚ ପରେ ସେ ଆହୁରି ଆକ୍ରମଣାତ୍ମକ ବ୍ୟାଟିଂ କରି ୧୫୦ ରନ ପୂରଣ କରିଥିଲେ । ଅନ୍ୟମାନଙ୍କ ମଧ୍ୟରେ ପନ୍ତ ୯୬, ରବି ଅଶ୍ୱିନ ୬୧, ହନୁମା ବିହାରୀ ୫୮, ବିରାଟ କୋହଲି ୪୫, ମୟଙ୍କ ଅଗ୍ରୱାଲ ୩୩, ରୋହିତ ଶର୍ମା ୩୯ ଓ ଶ୍ରେୟସ ଆୟର ୨୭ ରନ୍ର ଇନିଂସ ଖେଳିଥିଲେ ।
