ନୂଆଦିଲ୍ଲୀ,୧୩।୫: ଆର୍ଥିକ ବର୍ଷ ୨୦୨୫-୨୬ରେ ଗ୍ରାମୀଣ ଋଣ ବ୍ୟବସ୍ଥାର ବୃଦ୍ଧିପ୍ରାପ୍ତ ଆନୁଷ୍ଠାନିକୀକରଣ ଯୋଗୁଁ ବାଣିଜ୍ୟିକ ବ୍ୟାଙ୍କ ଏବଂ ଆଞ୍ଚଳିକ ଗ୍ରାମୀଣ ବ୍ୟାଙ୍କଗୁଡ଼ିକ ଦ୍ୱାରା କୃଷି କ୍ଷେତ୍ରକୁ ପ୍ରଦାନ କରାଯାଉଥିବା ଋଣ ୩୧.୫ ଲକ୍ଷ କୋଟି ଟଙ୍କା ଅତିକ୍ରମ କରି ଏକ ନୂଆ ରେକର୍ଡ ସୃଷ୍ଟି କରିବ ବୋଲି ନାବାର୍ଡର ଜଣେ ବରିଷ୍ଠ ଅଧିକାରୀ କହିଛନ୍ତି।
ଆର୍ଥିକ ବର୍ଷ ୨୦୨୪-୨୫ରେ ନାବାର୍ଡ ବାଣିଜ୍ୟିକ ବ୍ୟାଙ୍କ, ସହକାରୀ ସଂସ୍ଥା ଏବଂ ଆଞ୍ଚଳିକ ଗ୍ରାମୀଣ ବ୍ୟାଙ୍କଗୁଡ଼ିକ ମାଧ୍ୟମରେ ୨୮.୯୮ ଲକ୍ଷ କୋଟି ଟଙ୍କାରୁ ଅଧିକ ଋଣ ବଣ୍ଟନ କରିଥିଲା। ଏହାର ପ୍ରାୟ ୬୦% ସ୍ୱଳ୍ପ ମିଆଦୀ ଫସଲ ଋଣ ଏବଂ ବାକି ଅଂଶ କୃଷି ଓ ସମ୍ପୃକ୍ତ କ୍ଷେତ୍ରରେ ବିନିଯୋଗ ଋଣ ପାଇଁ ବ୍ୟବହୃତ ହୋଇଥିଲା।
ନାବାର୍ଡର ଉପ-ବ୍ୟବସ୍ଥାପନା ନିର୍ଦ୍ଦେଶକ ଅଜୟ କେ. ସୁଦ ଫାଇନାନସିଆଲ ଏକ୍ସପ୍ରେସ’କୁ କହିଛନ୍ତି, “ଚଳିତ ଆର୍ଥିକ ବର୍ଷରେ ମୋଟ କୃଷି ଋଣ ପ୍ରବାହ ପ୍ରାୟ ୩୧.୫ ଲକ୍ଷ କୋଟି ଟଙ୍କା ହେବ ବୋଲି ଆମେ ଆଶା କରୁଛୁ।”
ସେ ଆହୁରି କହିଛନ୍ତି ଯେ କୃଷି ଓ ସମ୍ପୃକ୍ତ କ୍ଷେତ୍ରକୁ ଋଣ ପ୍ରବାହରେ ତୀବ୍ର ବୃଦ୍ଧି ସତ୍ତ୍ୱେ, ନାବାର୍ଡ ସମ୍ଭାବନା ଆଧାରିତ ଋଣ ଯୋଜନା (ପିଏଲପି) ପ୍ରସ୍ତୁତ କରି ଋଣ ପ୍ରବାହରେ ଆଞ୍ଚଳିକ ଅସନ୍ତୁଳନକୁ ଦୂର କରିବାକୁ ଚେଷ୍ଟା କରୁଛି।
ସୁଦ କହିଛନ୍ତି, “ଆମେ ଉତ୍ତର-ପୂର୍ବ ଭାରତରେ ଋଣ ସଂସ୍କୃତି ଉନ୍ନତ କରିବା ଦିଗରେ ବ୍ୟାଙ୍କଗୁଡ଼ିକ ସହ କାର୍ଯ୍ୟ କରୁଛୁ। ଏଥିପାଇଁ ସାମାଜିକ ଗ୍ୟାରେଣ୍ଟି, ବିଶେଷ ପାଣ୍ଠି ଏବଂ ବୀମା ଉତ୍ପାଦ ଆକାରରେ ସହାୟତା ପ୍ରଦାନ କରାଯାଉଛି।”
ବର୍ତ୍ତମାନ ବ୍ୟାଙ୍କଗୁଡ଼ିକ ପ୍ରତି ଜିଲା ପାଇଁ ସମ୍ଭାବନା ଆଧାରିତ ଋଣ ଯୋଜନା ଅନୁସରଣ କରି ଫସଲ ଋଣ ଏବଂ କୃଷି ଓ ସମ୍ପୃକ୍ତ ଉଦ୍ୟୋଗ ପାଇଁ ମିଆଦୀ ଋଣ ଭଳି ଅଗ୍ରାଧିକାର କ୍ଷେତ୍ରରେ ଆନୁଷ୍ଠାନିକ ଋଣ ପ୍ରବାହକୁ ବୃଦ୍ଧି କରୁଛନ୍ତି।
ସୁଦ ଆହୁରି କହିଛନ୍ତି ଯେ ‘ଆକାଂକ୍ଷୀ ଜିଲା’ଗୁଡ଼ିକ ପାଇଁ ସ୍ୱତନ୍ତ୍ର ପୁନଃଅର୍ଥାୟନ ସୁବିଧା ପ୍ରଦାନ ନେଇ ଆଲୋଚନା ଚାଲିଛି, ଯେଉଁଠାରେ ସୁଧ ହାର କମ ହେବ। ଏହା ସହ ଖୁଚୁରା ଚାଷୀମାନଙ୍କୁ ଆର୍ଥିକ ସହାୟତା ପ୍ରଦାନ ନେଇ ମଧ୍ୟ ଆଲୋଚନା ଚାଲିଛି।
୨୦୨୫ ଜାନୁଆରୀରେ ନାବାର୍ଡର ଅଧ୍ୟକ୍ଷ ଶାଜି କେଭି କହିଥିଲେ ଯେ କୃଷି ଋଣ ପ୍ରବାହ ବୃଦ୍ଧି ସହ ଅଣଆନୁଷ୍ଠାନିକ କ୍ଷେତ୍ରର ଅଂଶ ହ୍ରାସ ପାଉଛି। ସେ କହିଥିଲେ, “ଗତ ୧୦ ବର୍ଷରେ କୃଷି ଋଣ ପ୍ରବାହର ହାରାହାରି ବାର୍ଷିକ ବୃଦ୍ଧି ୧୩% ରହିଛି, ଯାହା ଦୁଇ ଅଙ୍କରେ ରହିଛି।” ସାଧାରଣତଃ ବାଣିଜ୍ୟିକ ବ୍ୟାଙ୍କଗୁଡ଼ିକ ମୋଟ ଋଣ ପ୍ରବାହର ୭୫% ଯୋଗାଣ କରନ୍ତି, ଆଉ ବାକି ଅଂଶ ସହକାରୀ ଏବଂ ଆଞ୍ଚଳିକ ଗ୍ରାମୀଣ ବ୍ୟାଙ୍କଗୁଡ଼ିକ ମାଧ୍ୟମରେ ବଣ୍ଟନ ହୁଏ।
ପରିବର୍ଦ୍ଧିତ ସୁଧ ଛାଡ଼ ଯୋଜନା (ଏମଆଇଏସଏସ) ଅଧୀନରେ କିସାନ କ୍ରେଡ଼ିଟ କାର୍ଡ (କେସିସି) ଧାରୀ ଚାଷୀମାନେ କାର୍ଯ୍ୟକାରୀ ପୁଞ୍ଜି ଆବଶ୍ୟକତା ପୂରଣ ପାଇଁ ବାର୍ଷିକ ୭% ସୁଧ ହାରରେ ୩ ଲକ୍ଷ ଟଙ୍କା ପର୍ଯ୍ୟନ୍ତ ଋଣ ପାଇଥାନ୍ତି। ଏହି ଯୋଜନା ଅନୁସାରେ, ସମୟାନୁବର୍ତ୍ତୀ ପୁନଃପରିଶୋଧ ପାଇଁ ୩% ଅତିରିକ୍ତ ସୁଧ ଛାଡ଼ ମିଳେ, ଯାହା ଫଳସ୍ୱରୂପ ପ୍ରକୃତ ସୁଧ ହାରକୁ ୪%କୁ ହ୍ରାସ କରେ।
ତେବେ, ୨୦୨୫-୨୬ ପାଇଁ ସରକାର ଘୋଷଣା କରିଛନ୍ତି ଯେ କୃଷି ଋଣ ସୀମାକୁ ବାର୍ଷିକ ୫ ଲକ୍ଷ ଟଙ୍କାକୁ ବୃଦ୍ଧି କରାଯାଉଛି। ଏମଆଇଏସଏସ ଅଧୀନରେ କେସିସି ଧାରୀ କ୍ଷୁଦ୍ର ଚାଷୀଙ୍କ ପାଇଁ ନେଗୋସିଏବଲ ଗୋଦାମ ରସିଦ (ଏନଡବ୍ଲୁଆର) ବିରୁଦ୍ଧରେ ଫସଲ ପରବର୍ତ୍ତୀ ଋଣ ମଧ୍ୟ ଅନ୍ତର୍ଭୁକ୍ତ।
ବର୍ତ୍ତମାନ ୭୭.୧ ନିୟୁତ କାର୍ଯ୍ୟକ୍ଷମ କେସିସି ଧାରୀ ଅଛନ୍ତି। ଏହା ମଧ୍ୟରେ ମତ୍ସ୍ୟଚାଷ ପାଇଁ ୧.୨୪ ଲକ୍ଷ ଏବଂ ପଶୁପାଳନ କାର୍ଯ୍ୟ ପାଇଁ ୪୪.୪ ଲକ୍ଷ କେସିସି ଜାରି ହୋଇଛି। ଯଦି ଅଳ୍ପ ମିଆଦୀ ଋଣ ଫସଲ ଚାଷ ବ୍ୟତୀତ ଅନ୍ୟ ସମ୍ପୃକ୍ତ କାର୍ଯ୍ୟ ପାଇଁ ନିଆଯାଏ, ତେବେ ଋଣର ପରିମାଣ ୨ ଲକ୍ଷ ଟଙ୍କା ସୀମିତ ରହିଛି।
ସମ୍ପ୍ରତି ନୀତି ଆୟୋଗର ସଦସ୍ୟ ରମେଶ ଚାନ୍ଦ କହିଛନ୍ତି ଯେ ରାଜ୍ୟ ସରକାରମାନଙ୍କୁ ସେମାନଙ୍କର କୃଷି ଉତ୍ପାଦନ ଆଧାରରେ କୃଷି ଋଣ ବଣ୍ଟନ ପାଇଁ ଏକ ମାନଦଣ୍ଡ ନିର୍ଦ୍ଧାରଣ କରିବା ଆବଶ୍ୟକ। ଏହା ସୁନିଶ୍ଚିତ କରିବ ଯେ ସ୍ୱଳ୍ପ ମୂଲ୍ୟରେ ପ୍ରଦାନ କରାଯାଉଥିବା ଅଳ୍ପ ମିଆଦୀ ଫସଲ ଋଣ କେବଳ କିଛି ରାଜ୍ୟରେ କେନ୍ଦ୍ରୀଭୂତ ନ ହୁଏ କିମ୍ବା ଅଣ-କୃଷି ଉଦ୍ଦେଶ୍ୟରେ ବ୍ୟବହୃତ ନ ହୁଏ।
