ଜେନେଭା, ୩୦।୬ : ବିଶ୍ୱ ସୱାସ୍ଥ୍ୟ ସଂଗଠନ (ଡବ୍ଲୁଏଚଓ) କହିଛି ଯେ କରୋନା ଭାଇରସ ମହାମାରୀର ଭାରିଆଣ୍ଟ ବଦଳୁଛି କିନ୍ତୁ ଏହା ଶେଷ ହୋଇନାହିଁ। ପୃଥିବୀର ୧୧୦ଟି ଦେଶରେ କରୋନା ମାମଲା ବୃଦ୍ଧି ପାଉଛି ବୋଲି ଡବ୍ଲୁଏଚଓ ଚେତାବନୀ ଦେଇଛି। ଡବ୍ଲୁଏଚଓର ମହାନିର୍ଦ୍ଦେଶକ ଟେଡ୍ରୋସ ଆଧାନୋମ ଘେବ୍ରେୟସସ ଏଭଳି କହିଛନ୍ତି। ଭବିଷ୍ୟତରେ ଉତ୍ପନ୍ନ ହେଉଥିବା ନୂତନ ଭାରିଆଣ୍ଟ ଉପରେ ନଜର ରଖିବା ଜରୁରୀ। ବର୍ତ୍ତମାନ ଅନେକ ସ୍ଥାନରେ ବିଏ.୪ ଏବଂ ବିଏ.୫ ଭାରିଆଣ୍ଟ ସଂକ୍ରମଣ ବୃଦ୍ଧି ପାଉଛି। ଫଳରେ ବିଶ୍ୱସ୍ତରରେ କରୋନା ମାମଲାରେ ୨୦ ପ୍ରତିଶତ ବୃଦ୍ଧି ଘଟିିଛି। ତେବେ ବିଶ୍ୱସ୍ତରରେ ମୃତ୍ୟୁ ସଂଖ୍ୟା ସ୍ଥିର ରହିଛି ବୋଲି ସେ କହିଛନ୍ତି। ତେବେ କେତେକ ଦେଶରେ ମୃତ୍ୟୁ ସଂଖ୍ୟା ବୃଦ୍ଧି ପାଇଛି।
ବିଶ୍ୱ ଜନସଂଖ୍ୟାର ପ୍ରାୟ ୭୦ ପ୍ରତିଶତଙ୍କ ପାଇଁ କରୋନା ଟିକା ଉପଲବ୍ଧ କରିବାକୁ ଡବ୍ଲୁଏଚଓ ସମସ୍ତ ଦେଶକୁ ନିବେଦନ କରିଛି।
ସେ କହିଛନ୍ତି ଯେ ଗତ ୧୮ ମାସ ମଧ୍ୟରେ ବିଶ୍ୱରେ ୧୨ ବିଲିୟନରୁ ଅଧିକ ଟିକା ବିତରଣ କରାଯାଇଛି। କିନ୍ତୁ ଏବେ ମଧ୍ୟ ସ୍ବଳ୍ପ ଆୟକାରୀ ଦେଶରେ କୋଟ କୋଟି ଲୋକ, ଲକ୍ଷ ଲକ୍ଷ ସ୍ବାସ୍ଥ୍ୟ କର୍ମୀ ଏବଂ ବୃଦ୍ଧମାନେ ଟିକାକୁ ଅପେକ୍ଷା କରି ବସିଛନ୍ତି। ଏହାର ଅର୍ଥ ଭବିଷ୍ୟତରେ କରୋନା ଲହର ପାଇଁ ସେମାନେ ଅଧିକ ଅସୁରକ୍ଷିତ ହେବାରେ ଲାଗିଛନ୍ତି।
ସେ କହିଛନ୍ତି ଯେ କେବଳ ୫୮ ଟି ଦେଶରେ ୭୦ ପ୍ରତିଶତ ଲକ୍ଷ୍ୟ ପୂରଣ ହୋଇଛି। ରୁୱାଣ୍ଡାର ଉଦାହରଣ ଦେଇ ସେ କହିଛନ୍ତି ସେଠାରେ ଦ୍ୱିତୀୟ ଡୋଜ ଟିକା ହାର ବର୍ତ୍ତମାନ ୬୫ ପ୍ରତିଶତ ଅତିକ୍ରମ କରିଛି। ଡବ୍ଲୁଏଚଓ ମୁଖ୍ୟ କହିଛନ୍ତି ଯେ ସବୁଠାରୁ ବିପଦପୂର୍ଣ୍ଣ ସମ୍ବେଦନଶୀଳ ଗୋଷ୍ଠୀଙ୍କୁ ଏହି ଟିକା ଠିକ ସମୟରେ ଦିଆଯିବା ଜରୁରୀ।
