କୁଆଁରମୁଣ୍ଡା, ୧୬।୯ (ମହେନ୍ଦ୍ର କୁମାର ସାହୁ): ସୁନ୍ଦରଗଡ଼ ଜିଲା ରାଏବୋଗା ଥାନା ଅଞ୍ଚଳରେ ବୁଧବାର ସକାଳେ ଏକ ହୃଦୟବିଦାରକ ଘଟଣା ଘଟିଛି। ଶଙ୍ଖ ନଦୀରେ ଗାଧୋଉଥିବାବେଳେ ବୁଡ଼ିଯାଇ ୩ ଜଣ ନାବାଳିକାଙ୍କ ମୃତ୍ୟୁ ଘଟିଛି।
ସୂଚନା ଅନୁଯାୟୀ, ସ୍ଥାନୀୟ ଶଙ୍ଖ ନଦୀର ଧୋଇପଡ଼ା ନିକଟରେ ଢିପାପଡ଼ା ଓ ମଝାଟୋଲି ଅଞ୍ଚଳର ୪ ଜଣ ସାଙ୍ଗ ଗାଧୋଉଥିଲେ। ସେମାନଙ୍କ ମଧ୍ୟରେ ୩ ଜଣ ନାବାଳିକା ଓ ଜଣେ ନାବାଳକ ଥିଲେ। ଗାଧୋଉଥିବା ସମୟରେ ଚାରିଜଣ ନଦୀ ଭିତରକୁ ପଶିଯାଇଥିଲେ।
ତେବେ ନାବାଳକ ଜଣକ କୌଣସିମତେ ଉଦ୍ଧାର ହୋଇଯାଇଥିବା ବେଳେ ୩ ଜଣ ନାବାଳିକା ନଦୀରେ ବୁଡ଼ିଯାଇଥିଲେ। ଖବର ପାଇ ସ୍ଥାନୀୟ ଲୋକେ ନଦୀରେ ଖୋଜାଖୋଜି ଆରମ୍ଭ କରିଥିଲେ। ପରେ ୩ ନାବାଳିକାଙ୍କ ମୃତଦେହ ଉଦ୍ଧାର କରାଯାଇଥିଲା। ମୃତକମାନେ ହେଲେ ମଝାଟୋଲିର ଗୀତିକା ସାହୁ (୬), ସିବିକା ସାହୁ (୬ ବର୍ଷ ୬ ମାସ) ଏବଂ ଢିପାପଡ଼ାର ଶ୍ରୁତି ସାହୁ।
ଘଟଣାର ସୂଚନା ପାଇ ରାଏବୋଗା ଥାନାଧିକାରୀ ଦିବ୍ୟ ଓରାମ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ ଜବତ କରି ବୀରମିତ୍ରପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ରଖିଛନ୍ତି। ଏନେଇ ରାଏବୋଗା ଥାନାରେ ଅପମୃତ୍ୟୁ ମାମଲା ନଂ-୦୯/୨୬ ରୁଜୁ ହୋଇଛି। ଘଟଣାର ତଦନ୍ତ ଜାରି ରହିଥିବା ଥାନାଧିକାରୀ ଦିବ୍ୟ ଓରାମ ସୂଚନା ଦେଇଛନ୍ତି। ଅନ୍ୟପକ୍ଷରେ, ଘଟଣାରେ ସାମିଲ ଥିବା ନାବାଳକ ସଲଙ୍ଗାବାହାଲ ଗ୍ରାମର ପ୍ରତାପ ସାହୁ (୯) ସୁରକ୍ଷିତ ଥିବା ପୋଲିସ ପକ୍ଷରୁ କୁହାଯାଇଛି।
Dharitri – Odisha’s No.1 Odia Daily
