ନିଯୁକ୍ତି ଅଭାବ ଏକ ପ୍ରମୁଖ ସମସ୍ୟା ହୋଇଥିବାବେଳେ ଏବେ ବହୁ ଉଚ୍ଚ ଡିଗ୍ରୀଧାରୀ କୃଷି କିମ୍ବା ଏହା ସମ୍ପର୍କିତ କ୍ଷେତ୍ରରେ ରୋଜଗାର ସୃଷ୍ଟି କରିବାରେ ଉଦାହରଣ ପାଲଟିଛନ୍ତି । ବେଙ୍ଗାଲୁରୁର ହାସନ ଚୈତନ୍ୟ ଏମ୍ବିଏରେ ଡିଗ୍ରୀ ହାସଲ କରି ଜୈବିକ କୃଷି ସହ ଜଡ଼ିତ କୃଷକଙ୍କ ପାଇଁ ଉପଯୋଗୀ ମାର୍କେଟ ବ୍ୟବସ୍ଥା କରିପାରିଛନ୍ତି। ସେ ୨୦୨୧ରେ ‘ଅର୍ଗାନିକ ଟ୍ୟାପ୍’ ଷ୍ଟାର୍ଟଅପ୍ ଗଠନ କରି ତା’ ମାଧ୍ୟମରେ ଜୈବିକ କୃଷକଙ୍କୁ ସିଧାସଳଖ ଗ୍ରାହକଙ୍କ ସହ ଯୋଡ଼ିଛନ୍ତି। ଏହାଦ୍ୱାରା ମଧ୍ୟସ୍ଥଙ୍କର ଆଉ ଆବଶ୍ୟକ ପଡୁନାହିଁ। ଗ୍ରାହକମାନେ ବି ଉତ୍ପାଦିତ ଶସ୍ୟ ସହଜରେ ପାଇପାରୁଛନ୍ତି। ଆପ୍ ମାଧ୍ୟମରେ ସିଧାସଳଖ କୃଷକମାନେ ସେମାନଙ୍କ ଉତ୍ପାଦ ସମ୍ପର୍କରେ ଅବଗତ କରିପାରୁଛନ୍ତି। ଚୈତନ୍ୟ ଗ୍ରାହକଙ୍କ ସୁବିଧା ପାଇଁ ବିଭିନ୍ନ ସ୍ଥାନରେ ମାର୍କେଟ ଖୋଲିଛନ୍ତି। ଗ୍ରାହକମାନେ ଅର୍ଡର କରିବା ପରେ ସେହି ଅନୁସାରେ ସେମାନଙ୍କ ନିକଟରେ ତଟକା ଉପତ୍ାଦ ପହଞ୍ଚାଇ ଦିଆଯାଉଛି। ଏହିସବୁ କାର୍ଯ୍ୟରେ ସେ ଅନେକଙ୍କୁ ନିଯୁକ୍ତ କରିଛନ୍ତି। ଚୈତନ୍ୟ କଲେଜରେ ପଢ଼ିବା ସମୟରେ ବି ପରିବେଶ ଉପଯୋଗୀ କାର୍ଯ୍ୟକଳାପରେ ଜଡ଼ିତ ରହିଥିଲେ ଓ ତାଙ୍କ ସାଙ୍ଗମାନଙ୍କୁ ନେଇ ‘ମ୍ୟାନ ଆଣ୍ଡ୍ ଏନ୍ଭାଇରନ୍ମେଣ୍ଟ’ ଏନ୍ଜିଓ ଗଠନ କରିଥିଲେ । ପ୍ରତି ଗଣେଶ ପୂଜାରେ ସେମାନେ ପାଖାପାଖି ୫,୦୦୦ ମାଟିର ଗଣେଶ ମୂର୍ତ୍ତି ଲୋକମାନଙ୍କୁ ମାଗଣାରେ ବାଣ୍ଟୁଥିଲେ। ଶିକ୍ଷା ଶେଷ କରିବା ପରେ ପରିବେଶ ସୁରକ୍ଷାକୁ ଦୃଷ୍ଟିରେ ରଖି ତାଙ୍କ ପିତାଙ୍କ ପ୍ରେରଣାରେ ସେ ଜୈବିକ କୃଷିକୁ ବୃତ୍ତି ଭାବେ ଗ୍ରହଣ କରିଥିଲେ।
