ପୂର୍ବେ ପିଲାମନେ କାଠ ଖେଳନାକୁ ବେଶି ଭଲ ପାଉଥିଲେ। ଏହା ତାଙ୍କ ମାନସିକ ବିକାଶରେ ପ୍ରମୁଖ ଭୂମିକା ନେଉଥିଲା। କିନ୍ତୁ ପ୍ଲାଷ୍ଟିକ ଖେଳନା ଆସିବା ପରେ କାଠ ଖେଳନାର ଚାହିଦା କମିଛି। ଅପରପକ୍ଷେ ପ୍ଲାଷ୍ଟିକ ଖେଳନା ପିଲାଙ୍କ ସ୍ବାସ୍ଥ୍ୟ ଉପରେ ନକାରାମତ୍କ ପ୍ରଭାବ ପକାଉଛି। ଏଣୁ ପିଲାମାନଙ୍କ ସ୍ବାସ୍ଥ୍ୟକୁ ଗୁରୁତ୍ୱ ଦେଇ ସେମାନଙ୍କ ମାନସିକ ଦକ୍ଷତା ବୃଦ୍ଧି କରିବା ଲାଗି ପୁଣେର ଦୁଇ ସ୍ଥପତି ପ୍ରିୟଙ୍କା ମନଗାଁଓକର ବୈଦ୍ୟ ଏବଂ ଅଜୟ ବୈଦ୍ୟ ପରିବେଶ ଉପଯୋଗୀ ଖେଳନା ତିଆରି କରୁଛନ୍ତି। ଉଚ୍ଚବେତନର ଚାକିରି କରିବା ପରିବର୍ତ୍ତେ ଏମାନେ ପିଲାମାନଙ୍କ ପାଇଁ କାଠ ଖେଳନା ତିଆରି କରିବାକୁ ପସନ୍ଦ କରିଛନ୍ତି। ସେମାନେ ପରମ୍ପରିକ କାରିଗରମାନଙ୍କ ଦ୍ୱାରା ପରିବେଶ ଉପଯୋଗୀ କାଠ ଓ ଲାଖ ବ୍ୟବହାର କରି ଏହା ତିଆରି କରୁଛନ୍ତି। ସେଥିରେ କେବଳ ଉଦ୍ଭିଦରୁ ପ୍ରସ୍ତୁତ ଜୈବ ରଙ୍ଗ ବ୍ୟବହାର ହେଉଛି। ସେମାନେ ୨୦୨୧ରେ ‘ଟୟ ଟ୍ରଙ୍କ’ ଷ୍ଟାର୍ଟଅପ ଆରମ୍ଭ କରି ତା’ ମାଧ୍ୟରେ ଏହି ଖେଳନା ତିଆରି କରୁଛନ୍ତି। ମୁଖ୍ୟତଃ ପିଲାମାନଙ୍କ ପାଇଁ କାଠରେ କିଚେନ ସେଟ୍ ଠାରୁ ଆରମ୍ଭ କରି ଅନ୍ୟ ସବୁ ପ୍ରକାର ଖେଳନା ତିଆରି କରାଯାଉଛି। ଏବେ ଏହି କାର୍ଯ୍ୟରେ ୩୦ ଜଣ କାରିଗର ନିଯୁକ୍ତ ହୋଇଛନ୍ତି। ବର୍ତ୍ତମାନ ୨୪ ପ୍ରକାର ଖେଳନା ପ୍ରସ୍ତୁତ କରାଯାଉଛି ।
