ଦେଶୀ ଧାନ ଚାଷକୁ ବଞ୍ଚାଇ ରଖିବା ପାଇଁ କେରଳର ଚେରୁଭାୟାଲ ରମନଙ୍କ ପ୍ରୟାସ ପ୍ରଶଂସନୀୟ। ରମନଙ୍କ ବୟସ ଏବେ ୭୨। ପରିଣତ ବୟସରେ ବି ସେ ଧାନ ଚାଷରେ ପୂରା ସକ୍ରିୟ। ଦୀର୍ଘ ୨୦ ବର୍ଷ ସେ ଦେଶୀ ଧାନ ଚାଷରେ କଟାଇ ସାରିଲେଣି ଓ ଏହି ସମୟ ମଧ୍ୟରେ ୫୪ କିସମର ଧାନ ବିହନ ସଂରକ୍ଷଣ କରିବାରେ ସକ୍ଷମ ହୋଇପାରିଛନ୍ତି। ଓ୍ବାୟନାଡାରେ କୁରୁଚିୟା ଆଦାବାସୀ ସମ୍ପ୍ରଦାୟର ରମନ ୨୦୦୦ରେ ପ୍ରଥମେ ଦେଢ଼ ଏକର ଜମିରେ ଦେଶୀ ଧାନ ଚାଷ କରିବା ଆରମ୍ଭ କରିଥିଲେ। ଏବେ ସେ ୪୦ ଏକର ଜମିରେ ଧାନ ଚାଷ କରୁଛନ୍ତି। ବଡ଼ କଥା ହେଉଛି, ସେ ବିଭିନ୍ନ କିସମର ବାସନା ଦେଶୀ ଧାନ ବିହନ ସଂରକ୍ଷଣ କରିପାରିଛନ୍ତି। ସବୁ ବିହନକୁ ସେ ତାଙ୍କ ୧୫୦ ବର୍ଷର ପୁରୁଣା ପୈତୃକ ମାଟିଘରେ ସାଇତି ରଖୁଛନ୍ତି। ରମନ ଏହି ଧାନ ବିହନକୁ ବିକ୍ରି ନ କରି ଚାଷୀମାନଙ୍କୁ ଏକ ସର୍ତ୍ତରେ ଉଧାର ଦେଉଛନ୍ତି। ଯେଉଁମାନେ ତାଙ୍କଠାରୁ ଧାନ ବିହନ ନେଉଛନ୍ତି ସେମାନେ ଅମଳ ପରେ ସେହି ପରମାଣର ଧାନ ବିହନ ରମନଙ୍କୁ ଫେରାଉଛନ୍ତି। ରମନଙ୍କ ଦେଶୀ ଧାନ ଚାଷ ଦେଖିବା ଲାଗି ଦେଶ ବିଦେଶରୁ ବହୁ ଲୋକ ତାଙ୍କ କ୍ଷେତକୁ ଆସୁଛନ୍ତି।
