ନୂଆଦିଲ୍ଲୀ,୩୦ା୧୨:ଦେଶର ବିଭିନ୍ନ ଭାଗରେ ରହୁଥିବା ପ୍ରବାସୀମାନଙ୍କ ମତଦାନ ପାଇଁ ନିର୍ବାଚନ କମିଶନ (ଇସି) ଏକ ରିମୋଟ୍ ଇଲେକ୍ଟ୍ରୋନିକ୍ ଭୋଟିଂ ମେଶିନ୍ (ଆର୍ଭିଏମ୍)ର ମଡେଲ ବିକଶିତ କରିଥିବା ରବିବାର କହିଛନ୍ତି। ନିର୍ବାଚନମଣ୍ଡଳୀଠାରୁ ଦୂରରେ ଥିବା ଭୋଟରମାନଙ୍କ ଲାଗି ମଲ୍ଟି-କନ୍ଷ୍ଟିଚ୍ୟୁଏନ୍ସି ଇଭିଏମ୍ ପ୍ରୋଟୋଟାଇପ୍ର ପ୍ରଦର୍ଶନ ନିମନ୍ତେ ଇସି ରାଜନୈତିକ ଦଳଗୁଡ଼ିକୁ ଆମନ୍ତ୍ରଣ କରିଛନ୍ତି। ନିର୍ବାଚନରେ ଭୋଟରମାନଙ୍କ ଯୋଗଦାନ ବଢ଼ାଇବା ଲାଗି ଏଭଳି ପଦକ୍ଷେପ ନିଆଯାଇଛି। ଜାନୁୟାରୀ ୧୬ରେ ଏହି ପ୍ରଦର୍ଶନ କରାଯିବ। ଏହା କାର୍ଯ୍ୟକାରୀ ହେଲେ ପ୍ରବାସୀ ଭୋଟରମାନଙ୍କୁ ମତଦାନ ପାଇଁ ଆଉ ନିଜ ଜିଲାକୁ ଆସିବାକୁ ପଡ଼ିବ ନାହିଁ। ରିମୋର୍ଟ ଭୋଟିଂ ବ୍ୟବସ୍ଥା କାର୍ଯ୍ୟକାରୀ କରିବା ନେଇ ନିର୍ବାଚନ କମିଶନ ବିଭିନ୍ନ ଷ୍ଟେକ୍ହୋଲ୍ଡରଙ୍କ ମତାମତ ଏବଂ ପ୍ରୋଟୋଟାଇପ୍ ପ୍ରଦର୍ଶନ ଆଧାରରେ ନିଷ୍ପତ୍ତି ନେବେ ବୋଲି ଏକ ବିବୃତିରେ କୁହାଯାଇଛି। ଏଥିସହିତ ରାଜନୈତିକ ଦଳଗୁଡ଼ିକଠାରୁ ଏନେଇ ଆଇନଗତ, ପ୍ରଶାସନିକ ଏବଂ ବୈଷୟିକ ଚ୍ୟାଲେଞ୍ଜକୁ ନେଇ ମତାମତ ଲୋଡ଼ାଯାଇଛି।
ଏକ ରାଷ୍ଟ୍ରାୟତ୍ତ କମ୍ପାନୀ ଏହି ମଲ୍ଟି-କନ୍ଷ୍ଟିଚ୍ୟୁଏନ୍ସି ରିମୋର୍ଟ ଇଭିଏମ୍ ବିକଶିତ କରିଛି। ଏହି ମେଶିନ ସହାୟତାରେ ଗୋଟିଏ ରିମୋଟ୍ ପୋଲିଂ ବୁଥ୍ରୁ ଏକସଙ୍ଗେ ୭୨ଟି ନିର୍ବାଚନ ମଣ୍ଡଳୀ ପର୍ଯ୍ୟନ୍ତ ପ୍ରବାସୀ ଭୋଟରଙ୍କ ଭୋଟ ଗ୍ରହଣ କରାଯାଇପାରିବ ବୋଲି ନିର୍ବାଚନ କମିଶନ କହିଛନ୍ତି। ଯୁବ ଭୋଟର ଏବଂ ସହରାଞ୍ଚଳ ଭୋଟରଙ୍କ ମତଦାନ ପ୍ରତି ବୀତସ୍ପୃହତାକୁ ଦୃଷ୍ଟିରେ ରଖି ରିମୋଟ ଭୋଟିଂ ବ୍ୟବସ୍ଥା କରିବା ଲାଗି ନିର୍ବାଚନ କମିଶନ ଆଗ୍ରହ ପ୍ରକାଶ କରିଛନ୍ତି। ନିର୍ବାଚନ ଗଣତନ୍ତ୍ରରେ ଭାଗୀଦାରି ବଢ଼ାଇବାରେ ଏହା ବଡ଼ ପରିବର୍ତ୍ତନ ଆଣିପାରିବ ବୋଲି ମୁଖ୍ୟ ନିର୍ବାଚନ କମିଶନର (ସିଇସି) ରାଜୀବ କୁମାର କହିଛନ୍ତି।
