ପରିବେଶକୁ ପ୍ରଦୂଷଣମୁକ୍ତ କରିବା ଲାଗି ଗୁଣ୍ଡୁଚିମୂଷା ଭଳି କାର୍ଯ୍ୟ କରୁଥିବା ଅନେକଙ୍କ ମଧ୍ୟରେ ଦିଲ୍ଲୀର ମିନାକ୍ଷୀ ଶର୍ମାଙ୍କ ଯୋଗଦାନ ପ୍ରେରଣାଦାୟକ। ମିନାକ୍ଷୀ ବର୍ଜ୍ୟ କପଡ଼ାକୁ ଅପ୍ସାଇକେଲ କରୁଛନ୍ତି। ସେ ‘ୟୁଜ ମି ଓ୍ବାର୍କ୍ସ’ କମ୍ପାନୀ ପ୍ରତିଷ୍ଠା କରି ବର୍ଜ୍ୟ କପଡ଼ାରୁ ଆକର୍ଷଣୀୟ ଘରସଜ୍ଜା ଜିନିଷ, ବ୍ୟାଗ୍, ଲୁଗା ଆଦି ତିଆରି କରୁଛନ୍ତି। ୨୦୧୧ରୁ ସେ ଏହି କାର୍ଯ୍ୟ କରିଆସୁଛନ୍ତି। ମିନାକ୍ଷୀଙ୍କ ବୟସ ୩୪। କଲେଜରେ ପଢୁଥିବାବେଳେ ପର୍ଲ ଏକାଡେମୀ ଅଫ୍ ଫ୍ୟାଶନରେ ଏକ ପ୍ରୋଜେକ୍ଟ ଉପସ୍ଥାପନ କରିବା ପରେ ତାଙ୍କୁ ଏଭଳି କାର୍ଯ୍ୟ କରିବାକୁ ପ୍ରେରଣା ମିଳିଥିଲା। ଦିଲ୍ଲୀର ଛତ୍ରପୁରରୁ ୩୦ ଜଣ ଗରିବ ମହିଳାଙ୍କୁ ସେ ଏହି କାର୍ଯ୍ୟରେ ନିଯୁକ୍ତ କରିଛନ୍ତି। ସେମାନେ ମାସକୁ ୫,୦୦୦ରୁ ୧୦,୦୦୦ ଟଙ୍କା ରୋଜଗାର କରିପାରୁଛନ୍ତି। ମାତ୍ର ୪୫୦ ବର୍ଗଫୁଟ ଜାଗାରେ ତାଙ୍କ କମ୍ପାନୀ ଚାଲିଛି। ମିନାକ୍ଷୀ ଗୋଟିଏ ମାସରେ ୨୦୦ କେଜି ବର୍ଜ୍ୟ କପଡ଼ା ଅପ୍ସାଇକେଲ କରୁଛନ୍ତି। ତାଙ୍କ ଦ୍ୱାରା ପ୍ରସ୍ତୁତ ଜିନିଷର ଚାହିଦା ରହିଛି ଓ ସିଙ୍ଗାପୁର, ଆମେରିକା ଏବଂ ଇଂଲଣ୍ଡରେ ଏହାର ଗ୍ରାହକ ରହିଛନ୍ତି। ମାସକୁ ପାଖାପାଖି ୨୦୦ ଅର୍ଡର ସେ ପାଉଛନ୍ତି।
