ବିଭିନ୍ନ ସ୍ଥାନରେ ଅଦରକାରୀ ଟାୟାର ଜମା ହୋଇ ପରିବେଶକୁ ପ୍ରଦୂଷଣ କରୁଥିବାବେଳେ ତାହାକୁ ଉପଯୋଗ କରି ଚପଲ ତିଆରି କରିବାରେ ସଫଳ ହୋଇଛନ୍ତି ପୁଣେର ପୂଜା ଆପ୍ତେ। ପୂଜାଙ୍କ ବୟସ ୨୮। ଦି ଏନର୍ଜି ଆଣ୍ଡ୍ ରିସର୍ଚ୍ଚ ଇନ୍ଷ୍ଟିଚ୍ୟୁଟ (ଟିଇଆର୍ଆଇ)ରୁ ରିନେଓ୍ବେବଲ ଏନର୍ଜିରେ ସ୍ନାତକୋତ୍ତର ଡିଗ୍ରୀ ହାସଲ କରିଛନ୍ତି। ପୂଜା ଟାୟାରରୁ ଚପଲ ତିଆରି କରିବା ଲାଗି ବହୁ ଗବେଷଣା କରିଛନ୍ତି। ଦକ୍ଷିଣ ଆଫ୍ରିକାର କେତେକ ସମ୍ପ୍ରଦାୟ ଟାୟାର ଚପଲ ବ୍ୟବହାର କରନ୍ତିି। ସେମାନଙ୍କ ଚପଲ ତିଆରିର କୌଶଳ ଉପରେ ପୂଜା ଗବେଷଣା କରିବା ପରେ ସହି ଢାଞ୍ଚାରେ ଚପଲ ତିଆରି କରିବା ଆରମ୍ଭ କରିଥିଲେ। ତାଙ୍କର ଏହି ନୂଆ କୌଶଳକୁ ଷ୍ଟାର୍ଟଅପ୍ ଇଣ୍ଡିଆରେ ପ୍ରଦର୍ଶନ କରି ପୁରସ୍କୃତ ହେବା ପରେ କାର୍ଯ୍ୟକୁ ଆହୁରି ଗତିଶୀଳ କରିଛନ୍ତିି। ଚପଲ ବ୍ରାଣ୍ଡ୍ର ନାମ ରଖିଛନ୍ତି ‘ନେମିଟାଲ’। ବ୍ଲିଙ୍କ୍ ଗ୍ରୀନ କମ୍ପାନୀ ଦ୍ୱାରା ସେ ଏହି ଚପଲ ତିଆରି କରୁଛନ୍ତି। ୨୦୧୯ ଜୁନ୍ରୁ ଅଫିସିଆଲି ତାଙ୍କ ବ୍ୟବସାୟ ଆରମ୍ଭ କରିଛନ୍ତି। ପ୍ରଥମେ ଏହି ଚପଲ ଭାରି ହେଉଥିଲା। ଏବେ ସେ ହାଲୁକା ଚପଲ ତିଆରି କରୁଛନ୍ତି ଓ ଲୋକେ ଏହାକୁ ପସନ୍ଦ କରୁଛନ୍ତି। ଦେଢ ବର୍ଷ ମଧ୍ୟରେ ୪୦୦ କେ.ଜି. ବର୍ଜ୍ୟ ଟାୟାର ଉପଯୋଗ କରିପାରିଛନ୍ତି ପୂଜା। ଏଥିରୁ ବିଭିନ୍ନ ଡିଜାଇନର ୧୦୦୦ ଯୋଡା ଚପଲ ତିଆରି କରି ବିକ୍ରି କରିଛନ୍ତି। ଚପଲର ଦାମ୍ ୬୦୦ଟଙ୍କାରୁ ୧୦୦୦ଟଙ୍କା ରହୁଛି।
