ତାମିଲନାଡୁ ବିରୁଦ୍ଧୁନଗରର ଯୁବକମାନେ ୨ ବର୍ଷରେ ୪୩,୦୦୦ କେ.ଜି. ବର୍ଜ୍ୟ ରିସାଇକିଲିଂ କରି ସାରା ଦେଶରେ ଏକ ଉଦାହରଣ ସୃଷ୍ଟି କରିଛନ୍ତି। ସେମାନେ ଏଥିପାଇଁ ଏକ ‘ଗାର୍ବେଜ୍ ବ୍ୟାଙ୍କ’ ଖୋଲିିଛନ୍ତି। ଏହା ମାଧ୍ୟମରେ ସେମାନେ ଅଳିଆ ସଂଗ୍ରହ କରିବା ସହ ଲୋକମାନଙ୍କୁ ବର୍ଜ୍ୟ ପୃଥକୀକରଣ, ଅପ୍ସାଇକିଲିଂ ଏବଂ ରିସାଇକିଲିଂ ସମ୍ପର୍କରେ ଶିକ୍ଷା ଦେଉଛନ୍ତି। ଏଭଳି ଧାରଣା ପ୍ରଥମେ ଭି.ଭି. ବାଣିଆପେରୁମଲ କଲେଜ ଫର ଓମେନ୍ର ପୂର୍ବତନ ଏଣ୍ଟ୍ରେପ୍ରିନ୍ୟୁର ଡେଭେଲପ୍ମେଣ୍ଟ ସେଲ୍ର କୋଅର୍ଡିନେଟର ରେବତୀ ରାଜଶେକରନ୍ ଆଣିଥିଲେ ଓ ତାଙ୍କ କଲେଜରେ ପ୍ରତ୍ୟେକ କ୍ଲାସ୍ରେ ବର୍ଜ୍ୟ ସଂଗ୍ରହ ଲାଗି ଡଷ୍ଟବିନ୍ ରଖିଥିଲେ। ସେ ବର୍ଜ୍ୟ ସଂଗ୍ରହ କରିବାରେ ସଫଳ ହେବା ପରେ ‘ଗାର୍ବେଜ୍ ବ୍ୟାଙ୍କ’ ଖୋଲିଥିଲେ। ୬ ବର୍ଷ ପୂର୍ବେ ଆରମ୍ଭ କରାଯାଇଥିବା ଏହି ବ୍ୟାଙ୍କ ଏବେ ସହରର ବିଭିନ୍ନ ଅଞ୍ଚଳକୁ ସମ୍ପ୍ରସାରିତ ହୋଇଛି। ବିଭିନ୍ନ ସ୍କୁଲ ଓ କଲେଜରୁ ବର୍ଜ୍ୟ ସଂଗ୍ରହ କରାଯାଉଛି। ଏବେ ମୋଟ୍ରେ ୧୫ ଜଣ ସ୍ବେଚ୍ଛାସେବୀ ସବୁ କଲେଜ ଓ ସ୍କୁଲରେ ଏ ସମ୍ପର୍କରେ କ୍ଲାସ୍ ନେବା ସହ କର୍ମଶାଳା ମଧ୍ୟ ଆୟୋଜନ କରୁଛନ୍ତି। ଏମାନଙ୍କ ବୟସ ୨୦-୩୫ ବର୍ଷ ମଧ୍ୟରେ। ଏବେ ସୁଦ୍ଧା ବର୍ଜ୍ୟ ପରିଚାଳନା ଲାଗି ଛାତ୍ର, ଶିକ୍ଷକ, ଗୃହକର୍ତ୍ତା ଏବଂ ସାଧାରଣ ଲୋକଙ୍କ ପାଇଁ ୧୩୦ରୁ ଊର୍ଦ୍ଧ୍ୱ ସଚେତନତା ଓ ଶିକ୍ଷା ସେସନ କରାଯାଇଛି। ବିରୁଦ୍ଧୁନଗରର ୫୫୦ ପରିବାର ମଧ୍ୟ ଏହି କାର୍ଯ୍ୟରେ ଯୋଡ଼ି ହୋଇଛନ୍ତି। ଯୁବକମାନେ ଅଦରକାରୀ କାଗଜକୁ ଅପ୍ସାଇକିଲିଂ କରି ଖାତା ପ୍ରସ୍ତୁତ କରୁଛନ୍ତି ଓ ଏଗୁଡ଼ିକୁ ସ୍କୁଲ୍ କଲେଜରେ ମାଗଣାରେ ଦେଉଛନ୍ତି।
