ତେଲଙ୍ଗାନାର ଜଣେ ସରକାରୀ ଅଧିକାରୀ ସମସ୍ତଙ୍କ ପାଇଁ ଉଦାହରଣ ସୃଷ୍ଟି କରିଛନ୍ତି। ତସ୍ଲିମା ମହମ୍ମଦ ତେଲଙ୍ଗାନାର ମୁଲୁଗୁ ଓ ଜୟଶଙ୍କର ଭୁପାଲପାଲି ଭଳି ଦୁଇ ଅନଗ୍ରସର ଜିଲାରେ ସବ୍-ରେଜିଷ୍ଟ୍ରାର ଭାବେ କାର୍ଯ୍ୟ କରନ୍ତି। ୩୪ ବର୍ଷୀୟ ଏହି ଯୁବ ଅଧିକାରୀ ରବିବାର ଦିନ ଚାଷୀମାନଙ୍କ ବିଲରେ କାମ କରି ୨୫୦ରୁ ୩୦୦ ଟଙ୍କା ଯାଏ ରୋଜଗାର କରନ୍ତି। ଏହି ଟଙ୍କାକୁ ସେ ଅସହାୟମାନଙ୍କୁ ଦେଇଥାନ୍ତି। ଅନେକ ସମୟରେ ଗରିବ ଚାଷୀଙ୍କୁ ବି ଏହା ଦିଅନ୍ତି। ସେ ସକାଳ ୯ଟାରୁ ସନ୍ଧ୍ୟା ୫ଟା ଯାଏ ବିଲରେ କାମକରନ୍ତି। ତସ୍ଲିମା ହଳ ବୁଲାଇବାଠାରୁ ଆରମ୍ଭ କରି ଅନ୍ୟସବୁ କାର୍ଯ୍ୟ କରିଥାନ୍ତି। ସେ ଏହି କାମ ୬ ବର୍ଷ ହେବ କରିଆସୁଛନ୍ତି। ସରକାରଙ୍କ କୃଷି ଯୋଜନା ସମ୍ପର୍କରେ ଚାଷୀମାନଙ୍କୁ ଅବଗତ କରୁଛନ୍ତି। ତସ୍ଲିମାଙ୍କ ବାପାଙ୍କୁ ମାଓବାଦୀ ହତ୍ୟା କରିବା ପରେ ତାଙ୍କ ମା’ ଚାଷ କରି ପରିବାର ଚଳାଇବା ସହ ତାଙ୍କ ପରୀକ୍ଷା ପାଇଁ କୋଚିଂ ଫି ଯୋଗାଇ ଦେଇଥିତ୍ଲେ। ସରକାରୀ ଚାକିରି ପାଇବା ପରେ ମା’ଙ୍କ ପ୍ରେରଣାରେ ସେ ଅସହାୟଙ୍କୁ ସାହାଯ୍ୟ କରୁଛନ୍ତି। ଅନାଥ ପିଲାମାନଙ୍କୁ ପଢିବା ଲାଗି ନିଜ ରୋଜଗାରରୁ ସାହାଯ୍ୟ ଯୋଗାଇ ଦେଉଛନ୍ତି। ୧୭ ଜଣ ଏଭଳି ପିଲାଙ୍କ ଜୀବନ ଗଢିପାରିଛନ୍ତି। ଚାଷକାମରେ ପରିବାରକୁ ସାହାଯ୍ୟ କରିବା ଲାଗି ପ୍ରାୟ ୩୦୦ ଛାତ୍ର ଓ ଯୁବକଙ୍କୁ ଉତ୍ସାହିତ କରିପାରିଛନ୍ତି। ଲକ୍ଡାଉନ ସମୟରେ ଗରିବ ପିଲାମାନଙ୍କୁ ପଢ଼ାଇବା ଲାଗି ଘରୋଇ ଶିକ୍ଷକଙ୍କୁ ପ୍ରେରିତ କରିଛନ୍ତି। ସରକାରୀ କାମ କରିବା ପରେ ସାମାଜିକ ସ୍ତରରେ ଏଭଳି ସେବା ତାଙ୍କୁ ଅଧିକ ଆନନ୍ଦ ଦିଏ ବୋଲି କହନ୍ତି ତସ୍ଲିମା।
