ଛତିଶଗଡ଼ର ବସ୍ତର ଅଞ୍ଚଳ ନାଁ ଶୁଣିଲେ ମାଓବାଦୀ ଭୟ ଆସେ, କିନ୍ତୁ ଜଣେ ସାମାଜିକ କର୍ମୀଙ୍କ ହାତତିଆରି ବାଉଁଶ ସାଇକେଲ ସେଠାକାର ଲୁକ୍କାୟିତ ହସ୍ତକଳା ପରିଚୟକୁ ସାମ୍ନାକୁ ଆଣିଛି। ୩୦ ବର୍ଷୀୟ ଆସିଫ୍ ଖାନ୍ଙ୍କ ଦ୍ୱାରା ଏହା ସମ୍ଭବ ହୋଇଛି। ଆସିଫ୍ କମ୍ୟୁନିଟି ଡେଭ୍ଲପ୍ମେଣ୍ଟରେ ସ୍ନାତକୋତ୍ତର ଡିଗ୍ରୀ ହାସଲ କରି ସୋସିଆଲ ସର୍ଭିସ୍ ସେଣ୍ଟରରେ କାର୍ଯ୍ୟ କରୁଥିଲେ। ୨୦୧୯ରେ ଚାକିରି ଛାଡ଼ି ଆଦିବାସୀଙ୍କ ହସ୍ତକଳା ବିକାଶ ଓ ସେମାନଙ୍କୁ ରୋଜଗାର ଦେବା ଲକ୍ଷ୍ୟରେ ‘ଚେନରସ୍କେପ୍’ ଏନ୍ଜିଓ ଗଠନ କରି ବାଉଁଶରେ ବିଭିନ୍ନ ସାମଗ୍ରୀ ତିଆରି କରିବା ଆରମ୍ଭ କରିଥିଲେ। ଏଥିରେ ସେ ଅନେକ ଆଦିବାସୀ ପରିବାରକୁ ଯୋଡ଼ିଛନ୍ତି। ସେହି କାରିଗରଙ୍କ ସହଯୋଗରେ ସେ ପରିବେଶ ଉପଯୋଗୀ ବାଉଁଶ ସାଇକେଲ ନିର୍ମାଣ କରିଛନ୍ତି। ଏହାର ନାମ ‘ବେମ୍ବୁକା’ ରଖିଛନ୍ତି। ଆଫ୍ରିକାର ଘାନାରେ ଏଭଳି ସାଇକେଲ ନିର୍ମାଣ କରାଯାଉଥିବାରୁ ତାହାକୁ ଦେଖି ସେ ତାହା ତିଆରି କରିବାକୁ ପ୍ରୟାସ କରି ସଫଳ ହୋଇଛନ୍ତି। ଘାନାର ଲୋକଙ୍କ ଭଳି ବାଉଁଶ ସାଇକେଲ ନିର୍ମାଣ କରି ବସ୍ତର ଆଦିବାସୀମାନେ ଭଲ ରୋଜଗାର କରିବାରିବେ ବୋଲି କହନ୍ତି ଅସିଫ୍। ବାଉଁଶ ସାଇକେଲ ନିର୍ମାଣ କରିବାକୁ ସେ ମୁମ୍ବାଇର ବାମ୍ବୁଚି ନାମକ ଏଜେନ୍ସିର ସହାୟତା ନେଇଛନ୍ତି। ଏବେ ସୁଦ୍ଧା ଅସିଫ୍ ଦୁଇଟି ବାଉଁଶ ସାଇକେଲ ନିର୍ମାଣ କରି ଦିଲ୍ଲୀ ଓ ରାୟପୁର ପ୍ରଦର୍ଶନୀରେ ଏହାକୁ ପ୍ରଦର୍ଶନ କରିଛନ୍ତି। ବର୍ତ୍ତମାନ ସେ ବସ୍ତର ଅଞ୍ଚଳର ୮ ଜଣ କାରିଗରଙ୍କୁ ଏହି କାର୍ଯ୍ୟରେ ନିଯୁକ୍ତ କରିଛନ୍ତି। ଆଗକୁ ସାଇକେଲ ସାଇକେଲ ଚାହିଦା ବଢ଼ିଲେ ଅଧିକରୁ ଅଧିକ କାରିଗର ରୋଜଗାର କରିପାରିବେ ବୋଲି କହନ୍ତି ଅସିଫ୍।
