ଲକ୍ଡାଉନରେ ପିଲାମାନେ ଅନ୍ଲାଇନରେ ପଢ଼ିବା ପରେ ବାକି ସମୟ କଟାଇବା ସେମାନଙ୍କ ଲାଗି କଷ୍ଟକର ହୋଇପଡୁଥିବାବେଳେ କେରଳର ୧୩ ବର୍ଷୀୟା ବନୁପ୍ରିୟାଙ୍କ ଜୀବନଶୈଳୀରେ ଭିନ୍ନତା ପରିଲକ୍ଷିତ ହୋଇଛି। ବନୁପ୍ରିୟା ଅଷ୍ଟମ ଶ୍ରେଣୀରେ ପଢୁଛନ୍ତି। ସେ ଆଲ୍ପୁଝା ଜିଲା ମୁହାମ୍ମା ପଞ୍ଚାୟତରେ ପରିବାର ସହ ରହୁଛନ୍ତି। ଲକ୍ଡାଉନ ସମୟରେ ବନୁପ୍ରିୟା ଓ ତାଙ୍କ ବାପା ଦୟାତ୍ମାଜି ଔଷଧୀୟ ଗୁଣରେ ଭରପୂର ବିରଳ କିସମର ଧାନ ଚାଷ କରି ୩୦୦ କେ.ଜି. ଅମଳ କରିଛନ୍ତି। ଏହି ଧାନ ନାମ ରକ୍ଥାକଲି। ଏବକାର ଜଳବାୟୁରେ ଏହି ଧାନ ଚାଷ କଷ୍ଟକର ହୋଇଥିଲେ ମଧ୍ୟ ବାପ ଝିଅ ଏଥିରେ ସଫଳ ହୋଇଛନ୍ତି। ଏହି ଧାନ ଦେଖିବାକୁ ଲାଲ। ଏହାର ଚାଷ ବୈଦିକ ଯୁଗରେ ଆରମ୍ଭ କରାଯାଇଥିଲା। ରକ୍ଥାକଲି ଧାନ ବିଲପ୍ତିର ଦ୍ୱାର ଦେଶରେ ରହିଛି । ଏହା ଆଣ୍ଟି ଅକ୍ସିଡାଣ୍ଟ, ଜିଙ୍କ୍, ଆଇରନ, କ୍ୟାଲସିୟମ ଓ ଅନ୍ୟ ମିନେରାଲ୍ସରେ ଭରପୂର। ଏହି ଧାନ ଚାଷକୁ ଆଗକୁ ନେବା ଲାଗି ବନୁପ୍ରିୟା କୃଷକମାନଙ୍କୁ ବିହନ ମାଗଣାରେ ଦେଇଛନ୍ତି ଓ ବାକିତକ ହ୍ବାଟ୍ସଆପ ଗ୍ରୁପ ମାଧ୍ୟମରେ ବିକ୍ରି କରିଛନ୍ତି। ବାପ ଝିଅଙ୍କ ଏଭଳି ପ୍ରୟାସକୁ କେରଳ କୃଷି ବିଭାଗ ପ୍ରଶଂସା କରିଛି। ଏପରି କି ରକ୍ଥାକଲି ଧାନ ଦେଖିବାକୁ କେରଳ କୃଷିମନ୍ତ୍ରୀ କ୍ଷେତରେ ପହଞ୍ଚଥିଲେ। ଧାନ ଚାଷରେ ବନୁପ୍ରିୟାଙ୍କ ଯୋଗଦାନକୁ ଲକ୍ଷ୍ୟ କରି ତାଙ୍କୁ ଶିଶୁ କୃଷକ ପୁରସ୍କାର ପ୍ରଦାନ କରାଯାଇଛି।
