ସମୟ ଚକ୍ରରେ ବହୁ ବରିଷ୍ଠ ନାଗରିକ ପରିବାର ପାଇଁ ଅଲୋଡ଼ା ହୋଇଯାଆନ୍ତି। ଏମିତି କି ଦିନକୁ ଦୁଇବେଳା ଖାଇବା ଯୋଗାଡ଼ କରିବା ସେମାନଙ୍କୁ କଷ୍ଟକର ହୋଇଯାଏ। ହେଲେ ମୁମ୍ବାଇର ଡ. ଉଦୟ ମୋଦି ଏଭଳି ଅସହାୟ ବରିଷ୍ଠ ନାଗରିକମାନଙ୍କ ସାହାରା ପାଲଟିଛନ୍ତି। ଲକ୍ଡାଉନ୍ ସମୟରୁ ପାଖାପାଖି ୧୩ ମାସ ହେବ ସେମାନଙ୍କୁ ଖାଦ୍ୟ ଦେଉଛନ୍ତି। ୫୧ ବର୍ଷୀୟ ଡ. ମୋଦି ମୁମ୍ବାଇର ଭାୟାନ୍ଦରସ୍ଥିତ କ୍ଲିନିକ୍ରେ ରୋଗୀ ସେବା କରିବା ସହ ସେଥିରୁ ସମୟ ବାହାର କରି ୩୦୦ ଅସହାୟ ବରିଷ୍ଠ ନାଗରିକଙ୍କୁ ଦିନକୁ ଦୁଇବେଳା ଖାଦ୍ୟ ଯୋଗାଉଛନ୍ତି। ଏଥିପାଇଁ ତାଙ୍କୁ ଲୋକେ ‘ଟିିଫିନ ଡାକ୍ତର’ ବୋଲି ସମ୍ବୋଧନ କରୁଛନ୍ତି। ୧୩ ବର୍ଷ ପୂର୍ବେ ତାଙ୍କ ନିକଟକୁ ଚିକିତ୍ସା ପାଇଁ ଜଣେ ବୟସ୍କ ଲୋକ ଆସିଥିଲେ । ଘରେ ପୁଅମାନେ ଖାଇବାକୁ ଦେଉ ନ ଥିବାରୁ ସେ ଡାକ୍ତରଙ୍କୁ ଖାଦ୍ୟ ମାଗିଥିଲେ। ଏହି ଘଟଣା ଦେଖି ଡ. ମୋଦିଙ୍କ ମନୋଭାବ ପରିବର୍ତ୍ତନ ହୋଇଯାଇଥିତ୍ଲା ଓ ଏଭଳି ଅସହାୟଙ୍କୁ ଠାବ କରିବା ଲାଗି ପ୍ରଚାରପତ୍ର ବାଣ୍ଟିଥିଲେ। ଡ. ମୋଦିଙ୍କ ସ୍ତ୍ରୀ ପ୍ରଥମ ୧୫ ଦିନ ୧୧ ଜଣଙ୍କୁ ରୋଷେଇ କରି ଖାଇବାକୁ ଦେଇଥିଲେ। ଅସହାୟଙ୍କ ସଂଖ୍ୟା ବଢ଼ିବା ପରେ ସେ ଏକ ଟ୍ରଷ୍ଟ ଗଠନ କରି ଖାଦ୍ୟ ରୋଷେଇ ଓ ବଣ୍ଟନ ବ୍ୟବସ୍ଥା ନିଜ ଖର୍ଚ୍ଚରେ କରୁଛନ୍ତି। ଏଥିପାଇଁ କର୍ମଚାରୀ ନିଯୁକ୍ତ କରିଛନ୍ତି । ଦୁଇଟି ଟେମ୍ପୋ ଓ ୪ଟି ଭ୍ୟାନ୍ରେ କର୍ମଚାରୀମାନେ ଖାଦ୍ୟ ବାଣ୍ଟୁଛନ୍ତି। ଏ ବାବଦରେ ଡ. ମୋଦି ମାସକୁ ପ୍ରାୟ ୩ ଲକ୍ଷ ଟଙ୍କା ଖର୍ଚ୍ଚ କରୁଛନ୍ତି।
