ଅନ୍ୟର ଦୁଃଖ ବୁଝିଲେ ନିଜ ଦୁଃଖ କମିଯାଏ। ଅନ୍ୟର ସେବା କଲେ ଦୁର୍ବଳତା ଓ ପୀଡ଼ା ବିରୋଧରେ ଲଢ଼ିବାକୁ ଶକ୍ତି ମିଳେ। ଜୁନାଗଡ଼ର ଏମିତି ଦୁଇ ଭଉଣୀ ନିଜ ଯନ୍ତ୍ରଣାକୁ ଭୁଲି ୧୦ ବର୍ଷ ଧରି ମାନସିକ ସ୍ତରରେ ଦୁର୍ବଳ ଥିବା ଝିଅମାନଙ୍କ ସେବାରେ ଲାଗିଛନ୍ତି । ନିଲମ ବେନ୍ ଓ ରେଖା ବେନ୍ ପରମାର ‘ସାନ୍ତ୍ୱନ ବିକଳାଙ୍ଗ ବିକାଶ ମଣ୍ଡଳ’ ସଂସ୍ଥା ଜରିଆରେ ଏହି କାର୍ଯ୍ୟ କରୁଛନ୍ତି। ବଡ଼ କଥା ହେଉଛିି, ନିଲମ ପିଲାଦିନରୁ ୮୦% ଦିବ୍ୟାଙ୍ଗ। ଏହା ସତ୍ତ୍ୱେ ସେ ମାନସିକ ସ୍ତରରେ ଦୁର୍ବଳ ୪୦ ଝିଅଙ୍କ ସାହାରା ପାଲଟିଛନ୍ତି। ୨୦୦୯ରେ ରାଜସ୍ଥାନର ଏକ ହସ୍ପିପିଟାଲରେ ନିଲମ ଚିକିତ୍ସିତ ହେଉଥିବାବେଳେ ଦୁଇ ଭଉଣୀ ଏହି ସେବା କରିବା ଲାଗି ନିଷ୍ପତ୍ତି ନେଇଥିଲେ। ପରେ ୨୦୧୨ରୁ ଦୁହେଁ ଘରଛାଡ଼ି ଏହି ପିଲାଙ୍କ ସହ ରହି ସେମାନଙ୍କ ସେବା କରିଆସୁଛନ୍ତି। ଲୋକଙ୍କ ଦାନରେ ପିଲାମାନଙ୍କର ପଢ଼ାଠାରୁ ଆରମ୍ଭ କରି ସବୁ ଖର୍ଚ୍ଚ ଏମାନେ ବହନ କରୁଛନ୍ତି ।
ତାଙ୍କ ପିତାଙ୍କର ଜୁନାଗଡ଼ରେ ଏକ ଗ୍ୟାରେଜ ଅଛି। ଦୁଇ ଭଉଣୀ ପ୍ରଥମେ ଜୁନାଗଡ଼ ସହରରେ ଦୌଲତପାରା ଅଞ୍ଚଳରେ ଘରଭଡ଼ା ନେଇ ସେଠାକାର ବସ୍ତିର ଦୁଇ ଦିବ୍ୟାଙ୍ଗ ଝିଅଙ୍କୁ ରଖିଥିଲେ। ନିଲମ ଘରେ ଟ୍ୟୁଶନ କରନ୍ତି ଓ ରେଖା ଜୁନାଗଡ଼ର ଏକ କମ୍ପାନୀରେ କାମ କରି ସେଥିରେ ସେମାନଙ୍କ ଖର୍ଚ୍ଚ ତୁଲାଉଥିଲେ। ପରେ ଜୁନାଗଡ଼ ନିକଟରେ ବଡାଲା ଗାଁରେ ଏକ ଘର ନେଇ ସେବା ଆରମ୍ଭ କରିବା ପରେ ମାନସିକ ସ୍ତରରେ ଦୁର୍ବଳ ଝିଅମାନଙ୍କ ସଂଖ୍ୟା ବଢ଼ିବାରେ ଲାଗିଲା। ଏଥିପାଇଁ ଲୋକମାନେ ତାଙ୍କୁ ସହଯୋଗ କରିବାରେ ଲାଗିଲେ। ଏବେ ସୁରଟର ହରିଭାଇ ଚାରିଟେବଲ ଟ୍ରଷ୍ଟ ସେମାନଙ୍କ ନିର୍ମାଣ ପାଇଁ ୫୦ ଲକ୍ଷ ଟଙ୍କା ଖର୍ଚ୍ଚରେ ଗୋଟିଏ ଭବନ ନିର୍ମାଣ କରିଦେଇଛି। ବର୍ତ୍ତମାନ ତାଙ୍କ ସଂସ୍ଥାରେ ୧୫ ଜଣ କାମ କରୁଛନ୍ତି।
