କର୍ପୋରେଟ୍ ଚାକିରିର ଉଚ୍ଚ ଦରମାଠାରୁ ଅସହାୟ ପିଲାମାନଙ୍କ ଶିକ୍ଷା ଅଧିକ ଗୁରୁତ୍ୱପୂର୍ଣ୍ଣ ବୋଲି ଅନୁଭବ କରିଛନ୍ତି କୁଶଲ ରାଜ ଚକ୍ରବର୍ତ୍ତୀ। ବେଙ୍ଗାଲୁରୁର ଏହି ବ୍ୟକ୍ତି ଜଣକ ୧୨୦୦ ଗରିବ ପିଲାଙ୍କ ସାହାରା ପାଲଟିଛନ୍ତି। ସେମାନଙ୍କୁ ଶିକ୍ଷାର ମୁଖ୍ୟ ସ୍ରୋତରେ ସାମିଲ କରିବା ଲାଗି ଚାକିରି ଛାଡ଼ିଦେଇଛନ୍ତି। ‘ଲୋଟସ ପେଟାଲ’ ଏନ୍ଜିଓ ଗଠନ କରି ତା’ ମାଧ୍ୟମରେ ବେଙ୍ଗାଲୁରୁ ଓ ଆଖପାଖ ଅଞ୍ଚଳର ଗରିବ ପିଲାଙ୍କ ଶିକ୍ଷା ଲାଗି ସାହାଯ୍ୟ କରୁଛନ୍ତି। ସେମାନଙ୍କ ସ୍ବାସ୍ଥ୍ୟର ଯତ୍ନ ନେବା ସହ ଜବ୍ ଟ୍ରେନିଂ ଓ ମେଣ୍ଟାଲ ହେଲ୍ଥ ଲାଗି ମଧ୍ୟ କାର୍ଯ୍ୟକ୍ରମ ଚଳାଉଛନ୍ତି। ଏଥିପାଇଁ ସେ ନିଜ ଆୟ ତଥା ସାଙ୍ଗସାଥୀଙ୍କ ଦାନରେ ମିଳୁଥିବା ଅର୍ଥକୁ ଖର୍ଚ୍ଚ କରୁଛନ୍ତି। ୨୦୧୧ରେ ‘ଲୋଟସ୍ ପେଟାଲ’ ଗଠନ କରି ସେ ବିଭିନ୍ନ ବସ୍ତି ଓ ସରକାରୀ ସ୍କୁଲରେ ପଢ଼ୁଥିବା ପିଲାମାନଙ୍କ ପାଇଁ ବହିଖାତା, ପେନ୍ସିଲ, ପୋଷାକ ଆଦି ଯୋଗାଉଛନ୍ତି। ସେ ଅସହାୟ ପିଲାମାନଙ୍କୁ ଇଂରାଜୀ ମାଧ୍ୟମରେ ଶିକ୍ଷା ପ୍ରଦାନ କରିବାକୁ ‘ପ୍ରତିଷ୍ଠାନ’ ଗଠନ କରିଛନ୍ତି, ଯେଉଁଥିରେ ଏବେ ଅନେକ ପିଲା ପଢ଼ୁଛନ୍ତି। ଏଥିପାଇଁ ଶିକ୍ଷକ ନିଯୁକ୍ତି ଠାରୁ ଆରମ୍ଭ କରି ପିଲାଙ୍କ ଖର୍ଚ୍ଚ ନିଜେ ବହନ କରୁଛନ୍ତି। ତେବେ କୁଶଲଙ୍କ ସାଥିରେ ସାଲୋନି ଭରଦ୍ୱାଜ ଯୋଗଦେଇ ଏହି କାର୍ଯ୍ୟକୁ ଆଗକୁ ବଢ଼ାଉଛନ୍ତି। କୁଶଲଙ୍କୁ ତାଙ୍କର ଜଣେ ସାଙ୍ଗ ୧ ଏକର ଜମି ଦାନ କରିବା ପରେ ସେଠାରେ ସେ ସ୍କୁଲ ନିର୍ମାଣ କରୁଛନ୍ତି। ଏଥିରେ ଏକ ମିଲିୟନ ଇଟା ଲାଗିବ ଓ ଏହାକୁ ସେ ‘ମିଲିୟନ ବ୍ରିକ୍ସ’ ପ୍ରୋଜେକ୍ଟ ନାମ ଦେଇ ସମସ୍ତଙ୍କଠାରୁ ଦାନ ଆକାରରେ ଅର୍ଥ ସଂଗ୍ରହ କରୁଛନ୍ତି। ତେବେ କୁଶଲଙ୍କ ଏହି ଅଭିଯାନ ନିଶ୍ଚିତ ଭାବେ ଅନ୍ୟମାନଙ୍କ ପାଇଁ ପ୍ରେରଣାଦାୟୀ।
