ଦେଶର ଗୃହଶତ୍ରୁ ଭାବେ ମାଓବାଦୀଙ୍କୁ ବିବେଚନା କରାଯାଏ। ସରକାର ତଥା ପ୍ରଶାସନ ବିରୋଧୀ କାମ ଯୋଗୁ ଜନସାଧାରଣଙ୍କ ଜୀବନ ତଥା ସମ୍ପତ୍ତି ନଷ୍ଟ ହୋଇଥାଏ। ଅନେକ ମାଓବାଦୀ ପ୍ରଭାବିତ ଅଞ୍ଚଳରେ ସେମାନଙ୍କ ଉପସ୍ଥିତି ଯୋଗୁ ସେଠାରେ ବିକାଶମୂଳକ କାମ ଆଗେଇପାରି ନ ଥାଏ। ତେଣୁ ସରକାର ସେମାନଙ୍କୁ ଗୁଳିଗୋଳା ଛାଡ଼ି ମୁଖ୍ୟସ୍ରୋତରେ ସାମିଲ ହୋଇ ଉନ୍ନତ ଜୀବନଯାପନ କରିବାକୁ ଆହ୍ବାନ ଦେଇଆସୁଛନ୍ତି। ଏପରି ସ୍ଥିତିରେ ଜଙ୍ଗଲୀ ଜୀବନକୁ ପଛ କରି ପୋଲିସ ପ୍ରଶାସନ ନିକଟରେ ଆତ୍ମସମର୍ପଣ କରିଥିବା ମାଓବାଦୀଙ୍କ ପାଇଁ ଛତିଶଗଡ଼ ସରକାର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେଇଛନ୍ତି। ମୁଖ୍ୟସ୍ରୋତରେ ସାମିଲ ହୋଇଥିବା ମାଓବାଦୀଙ୍କ ନିମନ୍ତେ ରାଜ୍ୟ ସରକାର ଦନ୍ତଓ୍ବୋଡାଠାରେ ଏକ ଟାଉନଶିପ୍ ନିର୍ମାଣ କରୁଛନ୍ତି। ସେଠାରେ ସେମାନଙ୍କୁ ରହିବା ନିମନ୍ତେ ସମସ୍ତ ସୁବିଧା ପ୍ରଦାନ କରାଯିବା ସହ ଦକ୍ଷତା ବିକାଶ ତାଲିମ ଦିଆଯିବ। ଏହା ଦ୍ୱାରା ସେମାନେ ନିଜ ଗୋଡ଼ରେ ଛିଡ଼ା ହୋଇ ମୁଣ୍ଡ ଟେକି ବଞ୍ଚିପାରିବେ ବୋଲି ଗୁରୁବାର ଛତିଶଗଡ଼ ସରକାରଙ୍କ ପକ୍ଷରୁ ସୂଚନା ଦିଆଯାଇଛି। ୩୯ ଏକର ଜମିରେ ନିର୍ମାଣ କରାଯାଉଥିବା ଏହି ଟାଉନ୍ଶିପ୍ରେ ୧୦୮ଟି ଘର ରହିବ। ଏହାସହ ଯୋଗ କେନ୍ଦ୍ର, ଜିମ୍ ସେଣ୍ଟର, ସ୍କୁଲ, ସ୍ବାସ୍ଥ୍ୟକେନ୍ଦ୍ର, ହୋଟେଲ ମଧ୍ୟ ରହିବ। ପ୍ରାୟ ୯ କୋଟି ଟଙ୍କା ବ୍ୟୟରେ ଏହା ନିର୍ମାଣ କରାଯାଉଛି। ସରକାରଙ୍କ ଏଭଳି ପ୍ରୟାସ ମାଓବାଦୀଙ୍କୁ ଠିକ୍ ରାସ୍ତାକୁ ଆଣିବାରେ ସହାୟକ ହେବ ବୋଲି ଆଶା କରାଯାଉଛି।
