ସେବକ ବା ପ୍ରବର୍ତ୍ତକ ଭାବେ କେହି ଜନ୍ମ ନେଇ ନ ଥାଆନ୍ତି। ନିଷ୍ଠା ଓ ଇଚ୍ଛାଶକ୍ତି ବଳରେ ଏହା ହେବାକୁ ପଡ଼ିଥାଏ, ଯାହା ହୋଇପାରିଛନ୍ତି ଚେନ୍ନାଇର ଡ. ଇସା ଫତିମା ଜନ୍ମିନ। ପେସାରେ ଜଣେ ଅର୍ଥୋଡୋନିଷ୍ଟ। ସେ ଚେନ୍ନାଇରେ ଗରିବ ଲୋକଙ୍କୁ ପ୍ରତିଦିନ ଖାଦ୍ୟ ଯୋଗାଉଛନ୍ତି। ପିଲାଙ୍କ ପାଇଁ ପାଠ୍ୟପୁସ୍ତକ, ଜୋତା ମଧ୍ୟ ଦେଉଛନ୍ତି। ଇସା ୨୦୧୭ରେ ‘ଦି ପବ୍ଲିକ୍ ଫାଉଣ୍ଡେଶନ’ ଗଠନ କରି ତା’ ମାଧ୍ୟମରେ ଏହି ସେବା କରୁଛନ୍ତି। ଚେନ୍ନାଇର ବିଭିନ୍ନ ସ୍ଥାନରେ ୪ଟି କେନ୍ଦ୍ର ଖୋଲିଛନ୍ତି ଓ ସେଠାରେ ଲୋକମାନେ ବଳକା ଖାଦ୍ୟ, ପୋଷାକ, ବହି ଓ ଖେଳନା ପ୍ରଦାନ କରୁଛନ୍ତି। ଏସବୁକୁ ଇସା ଓ ତାଙ୍କ ସଂସ୍ଥାର ସ୍ବେଚ୍ଛାସେବୀମାନେ ଗରିବଙ୍କ ପାଖରେ ପହଞ୍ଚାଉଛନ୍ତି। ପ୍ରତ୍ୟେକ କେନ୍ଦ୍ରରେ ୪୦୦ରୁ ୬୦୦ ଲିଟର କ୍ଷମତା ବିଶିଷ୍ଟ ଫ୍ରିଜ୍ ରଖାଯାଇଛି। ସଂଗୃହୀତ ଖାଦ୍ୟକୁ ସେଥିରେ ରଖାଯିବା ପରେ ପ୍ୟାକେଟ କରାଯାଇ ଲୋକଙ୍କୁ ଦିଆଯାଉଛି। ପ୍ରତ୍ୟେକ ସେଣ୍ଟରରୁ ଦୈନିକ ୧୦୦ ମିଲ୍ ହିସାବରେ ମୋଟ୍ରେ ୧୦୦୦ ଜଣଙ୍କୁ ଖାଦ୍ୟ ଯୋଗାଉଛନ୍ତି ଇସା। ସକାଳ ୯ଟାରେ ସେ କେନ୍ଦ୍ରଗୁଡ଼ିକୁ ଯାଇ ଖାଦ୍ୟପୁଡ଼ିଆ ପ୍ରସ୍ତୁତି କାର୍ଯ୍ୟ ତଦାରଖ କରନ୍ତି ଓ ଦିନ ୩ଟା ଭିତରେ ତାହାକୁ ବାଣ୍ଟିସାରିବା ପରେ ନିଜେ ଖାଆନ୍ତି। ସନ୍ଧ୍ୟା ହେଲେ କ୍ଲିନିକ୍କୁ ଯାଆନ୍ତି ଓ ରୋଗୀଙ୍କୁ ମାଗଣା ଚିକିତ୍ସା କରନ୍ତି। ଏବେ ସୁଦ୍ଧା ଇସା ୩ କୋଟି ଟଙ୍କା ମୂଲ୍ୟର ଖାଦ୍ୟ, ୨୦,୦୦୦ କେଜି ପୋଷାକ, ୨,୫୦୦ ହଳ ଜୋତା, ୨,୫୦୦ କେଜି ଓଜନର ବହି ବାଣ୍ଟି ସାରିଲେଣି। ଏହା ବାଦ୍ ସେ କୋଭିଡ୍ ମହାମାରୀ ସମୟରେ ଚେନ୍ନାଇର ବିଭିନ୍ନ ବସ୍ତି ଓ ହସ୍ପିଟାଲରେ ଦୈନିକ ୮୦୦ରୁ ୧୦୦୦ ମିଲ୍ ଅସହାୟଙ୍କୁ ଯୋଗାଇ ଚାଲିଛନ୍ତି।
