ଲକ୍ଡାଉନ ଦୁଃଖ ଦେଇଥିଲେ ବି ମହାରାଷ୍ଟ୍ରର ୧୧ ଜଣ କୃଷକଙ୍କ ପାଇଁ ଏହା ଆଣିଛି ଏକ ବଡ଼ ସୁଯୋଗ। ଏହାକୁ ସେମାନେ ଉପଯୋଗ କରି ଶହ ଶହ କୃଷକଙ୍କୁ ଆୟର ପନ୍ଥା ଯୋଗାଇଦେଇଛନ୍ତି। ଅହମଦନଗରର ଏହି କୃଷକମାନେ ‘କିଷାନ କନେକ୍ଟ’ କମ୍ପାନୀ ପ୍ରତିଷ୍ଠା କରି ଲକ୍ଡାଉନ ସମୟରେ ପରିବା ବିକ୍ରି ଆରମ୍ଭ କରିଥିଲେ। ଏହି କମ୍ପାନୀ ପ୍ରତିଷ୍ଠା କରିବାର ମୁଖ୍ୟ ଭୂମିକାରେ ରହିଛନ୍ତି ୩୯ ବର୍ଷୀୟ ମନୀଷ ମୋରେ। ମନୀଷ କୃଷିରେ ସ୍ନାତକ ଡିଗ୍ରୀ ହାସଲ କରି ଚାକିରି କରିଥିତ୍ଲେ ଓ ୨୦୦୮ରେ ଚାକିରି ଛାଡ଼ି ଚାଷ ଆରମ୍ଭ କରିଥିଲେ। କୃଷକମାନେ କମ୍ପାନୀ ମାଧ୍ୟମରେ ମୁମ୍ବାଇ, ପୁଣେ ସହରରେ ପରିବା ବିକ୍ରିକରି ମୋଟା ଅଙ୍କର ଲାଭ ପାଇପାରିଛନ୍ତି। ସେମାନେ ସୋସିଆଲ ମିଡିଆରେ ଲୋକଙ୍କ ସହ ଯୋଗାଯୋଗ କରି ପରିବା ବିକ୍ରି କରୁଛନ୍ତି। କୌଣସି ମଧ୍ୟସ୍ଥଙ୍କର ଆବଶ୍ୟକତା ପଡୁନାହିଁ। ୧୧ଜଣ କୃଷକ ସେମାନଙ୍କ ଯାତ୍ରା ଆରମ୍ଭ କରି ଏବେ ବିଭିନ୍ନ ଅଞ୍ଚଳର ୪୮୦ ଜଣ କୃଷକଙ୍କୁ କମ୍ପାନୀ ସହ ଯୋଡ଼ିପାରିଛନ୍ତି। ସେମାନଙ୍କ ମାଧ୍ୟମରେ ପରିବା ସଂଗ୍ରହ କରାଯାଉଛି ଓ ବିକ୍ରି କରାଯାଉଛି । ଏବେ ସୁଦ୍ଧା ସେମାନେ ୬.୬ କୋଟି ଟଙ୍କା ଲାଭ କରିପାରିଛନ୍ତି। ଲୋକଙ୍କଠାରୁ ଅର୍ଡର ପାଇବା ପରେ ୪ କେ.ଜି.ରୁ ୧୨ କେ.ଜି. ପରିବା ବାସ୍କେଟ୍କୁ ସେମାନଙ୍କ ଘରେ ୨୪ ଘଣ୍ଟା ମଧ୍ୟରେ ପହଞ୍ଚାଉଛନ୍ତି।
