ମାତ୍ର ୧ ଟଙ୍କା ନେଇ ପିଲାମାନଙ୍କୁ ପଢ଼ାଉଛନ୍ତି ବିହାରର ଶିକ୍ଷକ ଲୋକେଶ ଶରନ। ସେତିକି ନୁହେଁ ସେ ବାହାରକୁ ଗଲାବେଳେ ସାଙ୍ଗରେ ଚକ୍, ଡଷ୍ଟର ଏବଂ କଲମ ନେଉଛନ୍ତି ଓ ଯେଉଁଠି ପିଲାମାନଙ୍କୁ ପଢୁଥିବାର ଦେଖନ୍ତି ସେଠାରେ ସେ ସେମାନଙ୍କୁ ପଢାରେ ସାହାଯ୍ୟ କରୁଛନ୍ତି। ଲୋକେଶଙ୍କ ଗାଁରେ ତାଙ୍କ ବାପାଙ୍କ ଦ୍ୱାରା ସ୍ଥାପିତ ବାଲ୍ ସୈନିକ ବିଦ୍ୟାଳୟରେ ସେ ପଢାଉଥିଲେ। ୧୯୮୮ରେ ସେ ବିଏଡ୍ ଡିଗ୍ରୀ ହାସଲ କରିଥିଲେ। କିନ୍ତୁ ୨୦୧୩ରେ ଏହି ସ୍କୁଲ ବନ୍ଦ ହୋଇଯିବା ପରେ ପିଲାମାନେ ପାଖ ଗାଁକୁ ପଢିବାକୁ ଗଲେ। ସେବେଠାରୁ ସେ ତାଙ୍କ ଘର ବାରଣ୍ଡାରେ ଏଭଳି ଉପାୟରେ ୪୦ ଜଣ ପିଲାଙ୍କୁ ପଢ଼ାଇବାରେ ଲାଗିଛନ୍ତି। ପ୍ରତିଦିନ ସ୍କୁଲ ପୂର୍ବରୁ ଓ ପରେ ହିଁ ପିଲାମାନଙ୍କୁ ପଢ଼ାନ୍ତି। ଲୋକେଶଙ୍କ ବୟସ ୬୧। ପିଲାମାନଙ୍କୁ ପଢାଇବା ସହ ସେହି ଅଞ୍ଚଳର କେଉଁ ସ୍କୁଲରେ କ’ଣ ଅସୁବିଧା ରହିଛି ସେ ସମ୍ପର୍କରେ ଅନୁଧ୍ୟାନ କରି ସ୍ଥାନୀୟ ପ୍ରଶାସନକୁ ଅବଗତ କରୁଛନ୍ତି। ସେ ୧୯୯୧ରୁ ୨୦୧୩ ଯାଏ ଦିନରେ ପିଲାମାନଙ୍କୁ ପଢାଇ ରାତିରେ ଏକ ଖବରକାଗଜରେ ମଧ୍ୟ ସାମ୍ବାଦିକତା କରୁଥିତ୍ଲେ। କିନ୍ତୁ ଏବେ ସାମ୍ବାଦିକତା ଛାଡି ସବୁ ସମୟ ପିଲାମାନଙ୍କ ପାଇଁ ଦେଉଛନ୍ତି।
