ପଶ୍ଚିମବଙ୍ଗ ପୂର୍ବ ବର୍ଦ୍ଧମାନ ଜିଲା ବସନ୍ତପୁର ଗାଁରେ ଥିବା ସ୍କୁଲରେ ପ୍ରାୟ ୧୦ ବର୍ଷ ହେବ ଦ୍ୱିଜେନ୍ଦ୍ର ନାଥ ଘୋଷ ମାଗଣାରେ ପଢାଉଛନ୍ତି। ତାଙ୍କୁ ଏବେ ବୟସ ୭୬। ସେ ଶିକ୍ଷକ ଭାବେ ଅବସର ନେବା ପରେ ଏବେ ବସନ୍ତପୁର ଜୁନିୟର ହାଇସ୍କୁଲକୁ ବଞ୍ଚାଇ ରଖିବା ଲାଗି ପଢାଉଛନ୍ତି। ଘୋଷଙ୍କ ଜନ୍ମ ଏକ ଗରିବ ପରିବାରରେ। ପିଲାଦିନେ ତାଙ୍କୁ ଖାଦ୍ୟ ପାଇଁ ସଂଗ୍ରାମ କରିବାକୁ ପଡ଼ିଥିଲା। ସେହି ପରିସ୍ଥିତିରେ ସେ ପଢିଥିଲେ ଓ ଶିକ୍ଷକ ହୋଇପାରିଥିଲେ। ୧୯୭୫ରେ ଚାକିରିରେ ଯୋଗଦେଇ ୨୦୦୮ରେ ଜମାଳପୁର ହାଇସ୍କୁଲରୁ ଅବସର ନେବାପରେ ଗାଁକୁ ଫେରି ହାଇସ୍କୁଲ ଖୋଲିିଥିଲେ । ପ୍ରଥମେ ୪୦ ଜଣ ପିଲାଙ୍କୁ ନେଇ ଏହା ଆରମ୍ଭ କରାଯାଇଥିଲା। ୨୦୧୦ରେ ଏହା ସରକାରୀ ସ୍ବୀକୃତି ପାଇଥିଲା। ହେଲେ ସ୍ଥାୟୀ ଶିକ୍ଷକ ନିଯୁକ୍ତି ଅଭାବ ରହିଥିବାରୁ ସ୍କୁଲ ବନ୍ଦ ହୋଇଯିବାର ସମ୍ଭାବନାକୁ ଲକ୍ଷ୍ୟ କରି ଘୋଷ ପଢ଼ାଇବା ଜାରି ରଖିଛନ୍ତି। ଏବେ ସ୍କୁଲରେ ଘୋଷଙ୍କୁ ଛାଡ଼ିଦେଲେ ୪ ଜଣ ଅସ୍ଥାୟୀ ଶିକ୍ଷକ ରହିଛନ୍ତି ଓ ମୋଟ ୧୪୦ ପିଲା ପଢୁଛନ୍ତି। ବର୍ଷକୁ ମାତ୍ର ୨୫ ହଜାର ଟଙ୍କା ଅନୁଦାନ ମିଳୁଛି। ଶିକ୍ଷକଙ୍କୁ ଦରମା ଦେଇ ସ୍କୁଲ ପରିଚାଳନା କରିବା କଷ୍ଟକର ହୋଇପଡ଼ୁଛି।
