ଧୁମ୍ଧାମ୍ରେ ପୁଅ ବାହାଘର କରିବା ପାଇଁ ଅନେକେ ସ୍ବପ୍ନ ଦେଖିଥାନ୍ତି। କିନ୍ତୁ ଏମିତି ଇଚ୍ଛା ବେଳେବେଳେ ସମାଜରେ ବଞ୍ଚତ୍ରହିବା ଦୁର୍ବିଷହ କରିଦିଏ। ଏଭଳି ଏକ ଘଟଣା ଘଟିଛି ମଧ୍ୟପ୍ରଦେଶ ହର୍ଦାର ଛିପାନେର୍ ରୋଡ୍ଠାରେ। ଏହି ଅଞ୍ଚଳର ମହମ୍ମଦ ରସିଦ୍ ଚୌହାନ ତାଙ୍କ ପୁଅ ବାହାଘର ଧୁମ୍ଧାମ୍ରେ କରିବାର ସବୁ ପ୍ରସ୍ତୁତି କରିଥିଲେ। ଭୋଜିଭାତ ସହ ନାଚଗୀତର ବି ଆୟୋଜନ ହୋଇଥିଲା। ଲୋକଙ୍କୁ ଆକର୍ଷିତ କରିବା ଲାଗି ରାଜସ୍ଥାନରୁ ମହିଳା ଘୁମର ନୃତ୍ୟଦଳକୁ ଡକାଯାଇଥିଲା। ହେଲେ ଏହି ନୃତ୍ୟ ହିଁ ରସିଦ୍ଙ୍କୁ ଅଡୁଆରେ ପକାଇ ଦେଇଥିଲା। ତାଙ୍କ ସମ୍ପ୍ରଦାୟର ଲୋକେ ଏହି ନୃତ୍ୟକୁ ସହଜରେ ଗ୍ରହଣ କରି ନ ଥିଲେ। ତେଣୁ ମହମ୍ମଦଙ୍କ ପରିବାର ଉପରେ ସେମାନେ ସାମାଜିକ କଟକଣା ଲଗାଇବାର ନିଷ୍ପତ୍ତି ନେଇଥିଲେ। ପରେ ତାଙ୍କ ସମ୍ପ୍ରଦାୟର ଲୋକେ ଏକାଠି ହୋଇ ରସିଦ୍ଙ୍କ ପରିବାର ଉପରେ ସାମାଜିକ ପ୍ରତିବନ୍ଧକ ସହ ଏକ ଲକ୍ଷ ଟଙ୍କାର ଜରିମାନା ଲଗାଇଥିଲେ। ମାତ୍ର ମହମ୍ମଦ ଏହି କଟକଣା ମାନିବାକୁ ଆଦୌ ପ୍ରସ୍ତୁତ ନ ଥିଲେ। କୌଣସି ଅପରାଧ ନ କରି ଦଣ୍ଡ ଭୋଗିବାକୁ କେହି ବି ଗ୍ରହଣ କରିପାରନ୍ତି ନାହିଁ। ସେହି ଦୃଷ୍ଟିରୁ ମହମ୍ମଦ ଗାଁ ଲୋକଙ୍କ ବିରୋଧରେ ପୋଲିସରେ ଅଭିଯୋଗ କରିଛନ୍ତି। ପୋଲିସ ଏହି ଘଟଣାର ତଦନ୍ତ କରି ପଚରାଉଚରା ଜାରି ରଖିଛି
