ପ୍ରତିବର୍ଷ ଭୀଷଣ ଶୀତରେ ଉତ୍ତର ଭାରତରେ ମୃତ୍ୟୁ ଖବର ସାମ୍ନାକୁ ଆସେ। ସରକାରୀ ସ୍ତରରେ ଏଥିପାଇଁ ପ୍ରତିକାର ବ୍ୟବସ୍ଥା କରାଯାଉଥିଲେ ବି ଶୀତରୁ ଲୋକଙ୍କୁ ରକ୍ଷା କରିବା ପାଇଁ ଦିଲ୍ଲୀ ନିବାସୀ ନିର୍ବାଣ ସୋମାନିଙ୍କ ନିଆର ପଦକ୍ଷେପ ବେଶ୍ ପ୍ରଶଂସନୀୟ। ନିର୍ବାଣଙ୍କ ବୟସ ୧୭। ସେ ଦିଲ୍ଲୀରେ ରାସ୍ତା କଡ଼ରେ ରହୁଥିବା ଲୋକମାନଙ୍କ ପାଇଁ ପୁରୁଣା ଜିନ୍ସ ପ୍ୟାଣ୍ଟର ପୁନଃ ଉପଯୋଗ କରି ସ୍ଲିପିଂ ବ୍ୟାଗ୍ ତିଆରି କରୁଛନ୍ତି। ତାଙ୍କର ଏହି ପଦକ୍ଷେପର ନାମ ରଖିଛନ୍ତି ‘ପ୍ରୋଜେକ୍ଟ ଜିନ୍ସ’। ମୁଖ୍ୟତଃ ସେ ଲୋକମାନଙ୍କଠାରୁ ପୁରୁଣା ଡେନିମ ଜିନ୍ସ ପ୍ୟାଣ୍ଟ ସଂଗ୍ରହ କରି ସ୍ଲିପିଂ ବ୍ୟାଗ୍ ତିଆରି କରୁଛନ୍ତି। ଗୋଟିଏ ସ୍ଲିପିଂ ବ୍ୟାଗ୍ କରିବା ଲାଗି ୭ ହଳ ଜିନ୍ସ ବ୍ୟବହାର ହେଉଛି। ଏହି ବ୍ୟାଗ୍ ତିଆରି କରିବା ଲାଗି ସେ ୭ ଜଣ ମହିଳାଙ୍କୁ କାମରେ ଲଗାଇଛନ୍ତି। ପ୍ରୋଜେକ୍ଟ ଜିନ୍ସ ଏବେ ଚେନ୍ନାଇ, ମୁମ୍ବାଇ, ବେଙ୍ଗାଲୁରୁ, ପୁଣେ ସହ ଅନ୍ୟ କେତେକ ସହରରୁ ଜିନ୍ସ ପ୍ୟାଣ୍ଟ ସଂଗ୍ରହ କରୁଛି। ରାସ୍ତା କଡ଼ରେ ଥିବା ଅସହାୟ ଲୋକମାନଙ୍କୁ ଏହି ସ୍ଲିପିଂ ବ୍ୟାଗ୍ ମାଗଣାରେ ଦେବା ସହ ଅନ୍ୟମାନେ ନେବାକୁ ଚାହିଁଲେ ସେମାନଙ୍କୁ ବିକ୍ରି କରୁଛନ୍ତି। ଏଥିରୁ ଯାହା ଅର୍ଥ ମିଳୁଛି ତାହାକୁ ତାଙ୍କ ପ୍ରୋଜେକ୍ଟରେ ଖର୍ଚ୍ଚ କରୁଛନ୍ତି।
