ପ୍ରଦୂଷଣ ଏବେ ବିଶ୍ୱ ପାଇଁ ଚିନ୍ତାର କାରଣ ହୋଇଥିବାବେଳେ ଭାରତର ସହରଗୁଡ଼ିକରେ ସ୍ଥିତି ଗମ୍ଭୀର ହେବାରେ ଲାଗିଛି। ବିଶ୍ୱର ସବୁଠୁ ପ୍ରଦୂଷିତ ସହରଗୁଡ଼ିକ ମଧ୍ୟରେ ଭାରତର ୨୨ଟି ସହର ରହିଛି। ଏଭଳି ସ୍ଥିତିକୁ ଦେଖିଲେ ଦେଶରେ ପ୍ରଦୂଷଣ ହାର କମାଇବା ଲାଗି ଜୀବନଶୈଳୀରେ ପରିବର୍ତ୍ତନ ଆଣିବାର ଆବଶ୍ୟକତା ଯେତିକି ରହିଛି ବୃକ୍ଷ ରକ୍ଷଣାବେକ୍ଷଣର ଗୁରୁତ୍ୱ ସେତିକି ଅଛି। କେବଳ ବୃକ୍ଷରୋପଣ କରିଦେଲେ ହେବନାହିଁ, ବରଂ ବିଭିନ୍ନ ସ୍ଥାନରେ ଥିବା ପୁରୁଣା ଗଛଗୁଡ଼ିକର ସୁରକ୍ଷା ଜରୁରୀ। ଏହି କ୍ରମରେ ହାଇଦ୍ରାବାଦର ୫୩ ବର୍ଷୀୟା ଆସିୟା ଖାନ୍ଙ୍କ ପଦକ୍ଷେପ ପ୍ରଶଂସନୀୟ। ଆସିୟାଙ୍କ ନେତୃତ୍ୱରେ ଏକ ୨୦ ଜଣିଆ ପରିବେଶପ୍ରେମୀଙ୍କ ଟିମ୍ ଜାତୀୟ ରାଜପଥ ପ୍ରାଧିକରଣର ଗଛକଟା ନିଷ୍ପତ୍ତି ବିରୋଧରେ ନ୍ୟାଶନାଲ ଗ୍ରୀନ୍ ଟ୍ରିବ୍ୟୁନାଲ(ଏନଜିଟି)ର ଦ୍ୱାରସ୍ଥ ହୋଇ ୯୧୪ ବରଗଛର ସୁରକ୍ଷା ନିଶ୍ଚିତ କରିଛନ୍ତି। ଏହିସବୁ ଗଛ ୧୦୦ ବର୍ଷର ପୁରୁଣା। ମୋଇନାବାଦରୁ ମାନେଗୁଡ଼ାଯାଏ ଜାତୀୟ ରାଜପଥ ୪ ଥାକିଆ କରିବା ଲାଗି ଏହିସବୁ ଗଛ କାଟିବାକୁ ଏନ୍ଏଚ୍ଏଆଇ ନିଷ୍ପତ୍ତି ନେଇଥିଲା। ଏହା ନିଶ୍ଚିତ ଯେ ଆସିୟାଙ୍କ ନେତୃତ୍ୱରେ ବୃକ୍ଷ ସୁରକ୍ଷାର ବିଜୟ ଦେଶରେ ଅନ୍ୟମାନଙ୍କୁ ବାଟ ଦେଖାଇବ।
