କୋକସରା, ୨୩।୧୦ (ଡି.ଏନ.ଏ.)
କଳାହାଣ୍ଡି ଜିଲା କୋକାସରା ବ୍ଳକର ଚାଷୀଙ୍କୁ ସମସ୍ୟା ପିଛା ଛାଡୁନି। କେତେବେଳେ ଅନାବୃଷ୍ଟି ତ କେତେ ବେଳେ ଧାନ ଚାଷରେ ରୋଗପୋକର ପ୍ରାଦୁର୍ଭାବରେ ଚାଷୀ ତଳିତଳାନ୍ତ ହୋଉଥିବା ବେଳେ ଏବେ ଲଘୁ ଜନିତ ବର୍ଷା ଯୋଗଁୁ ପାଚିଲା ଧାନ କ୍ଷେତରେ ଲୋଟି ଗଜା ହୋଇଛି। କେତେକ ଚାଷୀଙ୍କ ଧାନ କ୍ଷୀର ଢୋକିବା ସମୟରେ ବି ତଳେ ପଡିଯାଇଛି। ଫଲରେ ନଷ୍ଟ ହେବାର ଆଶଙ୍କା ରହିଛି। କୃଷି ବିଭାଗରୁ ମିଳିଥିବା ସୂଚନା ଅନୁସାରେ ଚଳିତ ବର୍ଷ କୋକସରା ବ୍ଲକର ୨୧ହଜାର ୯୩୭ ହେକ୍ଟର ଜମିରେ ଧାନ ଚାଷ କରାଯାଇଛି। ସେଥିମଧ୍ୟରେ ୭ ହଜାର ୧୧୨ହେକ୍ଟର ଢିପଜମିରେ ସଅଳ କିସମର ଧାନ ଚାଷ କରାଯାଇଛି। ସେହିପରି ୭ ହଜାର ୦୧ ହେକ୍ଟର ମାଲ ଜମିରେ ମଧ୍ୟମ ଧରଣ କିସମର ଓ ୭ ହଜାର ୮୨୪ ହେକ୍ଟର ବାହାଲ ଜମିରେ ଦୀର୍ଘ ଦିନିଆ କିସମର ଧାନ ଚାଷ କରାଯାଇଛି। ବର୍ତ୍ତମାନ ସ୍ଥିତିରେ ସଅଳ କସିମର ଧାନ ଅମଳ ଚାଲିଛି। ମଧ୍ୟମ ଧରଣ କିସମ ଧାନ ବାହାରି ପାଚି ଅମଳକ୍ଷମ ହୋଇଛି। କେତେକ ଚାଷୀ ଧାନ ଅମଳ ପାଇଁ ପ୍ରସ୍ତୁତ ହୋଇ ଖଳା ତିଆରି କରି ସାରଛନ୍ତି। ଏହି ସ୍ଥିତିରେ ବର୍ଷା ଯୋଗଁୁ ପାଚିଳା ଧାନ ବିଲରେ ପଡି ଗଜାହୋଇଛି। ଲଡୁଗାଁ ପଞ୍ଚାୟତ ସୁନାମାଲ ଗ୍ରାମର ଚାଷୀଙ୍କ ୩୦ ଏକର ଜମିର ପାଚିଲା ଧାନ ନଷ୍ଟ ହୋଇଛି। କାଉଡୋଲର ଚାଷୀ ଅରୁଣର ସାହୁଙ୍କ ସମେତ ୧୦ରୁ ଉର୍ଦ୍ଧ୍ୱ ଚାଷୀଙ୍କ ୩୦ଏକରରୁ ଅଧିକ ଜମିର ଧାନ ବର୍ଷା ଯୋଗଁୁ ତଳେ ପଡିଛି। ସେହିପରି ସାନପେଡାଗୁଡା, ଗୋତମୁଣ୍ଡା, କୋକସରା, କୁଲେଗୁଡା, ଲଡୁଗାଁ, ଚିକିଲି, ଫୁପ୍ଗାଁ, ବଡପୋଡାଗୁଡା ଆଦି ଗ୍ରାମର ଚାଷୀଙ୍କ ଫସଲ ଗତ ସପ୍ତାହର ଲଘୁଚାପ ଜନିତ ବର୍ଷା ଯୋଗଁୁ ଧାନ ଫସଳ ନଷ୍ଟ ହୋଇଛି। ଏ ନେଇ ବ୍ଳକ କୃଷି ଅଧିକାରୀ ସୁବ୍ରତ କୁମାର ପାଢୀଙ୍କୁ ପଚାରିବାରୁ ସେ ଫିଲ୍ଡ ଯାଇ ପରିଦର୍ଶନ କରି ସାରିଛନ୍ତି, ବିଶେଷ କ୍ଷତି ହୋଇ ନ ଥିବା କହିିଛନ୍ତି । ସରକାର ଚାଷୀ ସମସ୍ୟା ପ୍ରତି ଦୃଷ୍ଟି ଦେଇ ଆକଳନ କରି କ୍ଷତିପୂରଣ ଦେବାକୁ ଦାବି ହେଉଛି।
