ଟୋକିଓ, ୨ା୮ (ଏପି)-ମାର୍ସେଲ ଜାକବ୍ସ ଅଲିମ୍ପିକ ପୁରୁଷ ୧୦୦ମିଟର ରେସ୍ ଜିତିଛନ୍ତି। ସେ ୯.୮ ସେକେଣ୍ଡ ଟାଇମିଂରେ ରେସ୍ ଶେଷ କରିଥିଲେ। ଇଟାଲୀ ପାଇଁ ସେ ପ୍ରଥମ ଥର ସ୍ପ୍ରିଣ୍ଟ ସ୍ବର୍ଣ୍ଣ ଆଣି ଦେଇଛନ୍ତି। ପୁରୁଷ ୧୦୦ ମିଟର ରେସ୍ କିଏ ଜିତିବ ସେ ନେଇ ପୂର୍ବାନୁମାନ କରାଯାଇ ପାରୁ ନ ଥିଲା। ଜାକବ୍ସଙ୍କ ବିଜୟ ଆଶ୍ଚର୍ଯ୍ୟଜନକ ଥିଲା। ସେ ଆମେରିକାର ଫ୍ରେଡ୍ କେର୍ଲି ଓ କାନାଡାର ଆଣ୍ଡ୍ରେ ଡିଗ୍ରାସିଙ୍କୁ ପଛରେ ପକାଇ ପ୍ରଥମ ସ୍ଥାନ ଅଧିକାର କରିଥିଲେ। ବର୍ତ୍ତମାନ ଅବସର ନେଇଥିବା ଉସେନ ବୋଲ୍ଟ ୧୩ ବର୍ଷ ହେଲା ପୁରୁଷ ୧୦୦ ମିଟର ରେସ୍ରେ ପ୍ରାଧାନ୍ୟ ବିସ୍ତାର କରି ଆସିଥିଲେ। ଜାକବ୍ସଙ୍କ ବିଜୟର କିଛି ମିନିଟ ପୂର୍ବରୁ ତାଙ୍କ ଦେଶର ଜିଆନମାର୍କୋ ଟାମ୍ବେରି କାତାର ହାଇଜମ୍ପର ମୁତାଜ ଏସାବାର୍ସିମଙ୍କ ସହ ଟାଇ କରି ହାଇଜମ୍ପରେ ସ୍ବର୍ଣ୍ଣ ଜିତିଥିଲେ। ରବିବାର ଟ୍ରିପଲ ଜମ୍ପରେ ଭେନେଜୁଏଲାର ୟୁଲିମାର ରୋଜାସ ୫୧ ଫୁଟ୍ ୫ ଇଞ୍ଚ ଲମ୍ଫ ପ୍ରଦାନ କରି ୨୬ବର୍ଷ ତଳର ବିଶ୍ୱରେକର୍ଡକୁ ଭଙ୍ଗ କରିଦେଇଛନ୍ତି। ଜାକବ୍ସଙ୍କ ବିଜୟ ପରେ ତାଙ୍କ ବିଷୟରେ ଜାଣିବା ଲାଗି ଆଗ୍ରହ ସୃଷ୍ଟି ହେବା ସ୍ବାଭାବିକ। ଟେକ୍ସାସର ଏଲ୍ ପାସୋରେ ହେଉଛି ତାଙ୍କର ଜନ୍ମ। ତାଙ୍କ ପିତା ହେଉଛନ୍ତି ଆମେରିକାନ ଏବଂ ମା’ ଇଟାଲିଆନ। ସେ ଛୋଟ ଥିବାବେଳେ ୟୁ.ଏସ. ମିଲିଟାରି ତାଙ୍କ ପିତାଙ୍କୁ ଦକ୍ଷିଣ କୋରିଆକୁ ବଦଳି କରିଦେଇଥିଲା। ସେ ସମୟରେ ସେ ମା’ଙ୍କ ସହିତ ଇଟାଲୀ ପଳାଇ ଆସିଥିଲେ। ଜାକବ୍ସ କିଛିବର୍ଷ ଧରି ଜଣେ ଲଙ୍ଗଜମ୍ପ ସ୍ପେଶାଲିଷ୍ଟ ଥିଲେ। ୟୁରୋପିଆନ ଚାମ୍ପିୟନ୍ସରେ ଇନ୍ଡୋର ୬୦ ମିଟରରେ ବିଜୟ ତାଙ୍କର ସବୁଠାରୁ ବଡ଼ ସଫଳତା ଥିଲା। ବର୍ତ୍ତମାନ ସେ ଜଣେ ଅଲିମ୍ପିକ ସ୍ପ୍ରିଣ୍ଟ ଚାମ୍ପିୟନ ଭାବେ ବୋଲ୍ଟଙ୍କ ସହ ସମାନ ତାଲିକାରେ ସ୍ଥାନ ପାଇଛନ୍ତି।
