କଟକ, ୩।୧୦: ଓଡ଼ିଶାରେ ଜିଏସ୍ଟି ସଂଗ୍ରହ କ୍ରମାଗତ ବୃଦ୍ଧି ପାଉଥିବା ପରିଲକ୍ଷିତ ହେଉଛି। ୨୦୨୧ ସେପ୍ଟେମ୍ବରରେ ରାଜ୍ୟରେ ମୋଟ ଜିଏସ୍ଟି ସଂଗ୍ରହ ୩୩୨୫.୯୪ କୋଟି ଟଙ୍କା ହୋଇଥିବାବେଳେ ୨୦୨୦ ସେପ୍ଟେମ୍ବରରେ ଏହା ଥିଲା ୨୩୮୩.୯୯ କୋଟି ଟଙ୍କା। ଫଳରେ ଏହି କ୍ଷେତ୍ରରେ ୪୦ ପ୍ରତିଶତ ଅଭିବୃଦ୍ଧି ହୋଇଛି। ଦେଶର ପ୍ରମୁଖ ରାଜ୍ୟଗୁଡ଼ିକ ମଧ୍ୟରେ ଏହି ବୃଦ୍ଧି ହାର ସର୍ବାଧିକ। ୨୦୨୧ ସେପ୍ଟେମ୍ବର ସୁଦ୍ଧା ମୋଟ୍ ଉପରେ ୨୦୩୦୩.୮୬ କୋଟି ଟଙ୍କାର ଜିଏସ୍ଟି ସଂଗ୍ରହ ହୋଇଥିବାବେଳେ ଗତ ଆର୍ଥିକ ବର୍ଷର ସେପ୍ଟେମ୍ବର ୨୦୨୦ ସୁଦ୍ଧା ୧୨,୨୭୨.୯୮ କୋଟି ଟଙ୍କାର ଜିଏସ୍ଟି ସଂଗୃହୀତ ହୋଇଥିଲା। ଏ କ୍ଷେତ୍ରରେ ୬୫.୪୪ ପ୍ରତିଶତ ଅଭିବୃଦ୍ଧି ଘଟିଛି। ୨୦୧୯ ସେପ୍ଟେମ୍ବର ସୁଦ୍ଧା ୧୫,୦୨୬.୦୮ କୋଟି ଟଙ୍କାର ଜିଏସ୍ଟି ଆଦାୟ କରାଯାଇଥିଲା।
ରାଜ୍ୟ ଜିଏସ୍ଟି ବାବଦରେ ୨୦୨୧ ସେପ୍ଟେମ୍ବରରେ ୯୨୯.୬୮ କୋଟି ଟଙ୍କା ସଂଗୃହୀତ ହୋଇଥିବାବେଳେ ୨୦୨୦ ସେପ୍ଟେମ୍ବରରେ ଏହା ଥିଲା ୬୩୧.୦୮ କୋଟି ଟଙ୍କା। ଫଳରେ ଏ କ୍ଷେତ୍ରରେ ୪୮ ପ୍ରତିଶତ ଅଭିବୃଦ୍ଧି ଘଟିଛି। ସେହିପରି ଚଳିତ ଆର୍ଥିକ ବର୍ଷର ସେପ୍ଟେମ୍ବର ମାସ ସୁଦ୍ଧା ମୋଟ ରାଜ୍ୟ ଜିଏସ୍ଟି ସଂଗ୍ରହ ୫୭୬୬.୪୩ କୋଟି ଟଙ୍କା ରହିଥିବାବେଳେ ୨୦୨୦ ସେପ୍ଟେମ୍ବର ବେଳକୁ ଏହି ପରିମାଣ ଥିଲା ୩୬୭୧.୪୫ କୋଟି ଟଙ୍କା। ଏ କ୍ଷେତ୍ରରେ ଅଭିବୃଦ୍ଧି ହାର ରହିଛି ୫୭.୦୬ ପ୍ରତିଶତ। ୨୦୧୯ ସେପ୍ଟେମ୍ବର ସୁଦ୍ଧା ଏହି ସଂଗ୍ରହ ପରିମାଣ ଥିଲା ୪୩୩୨.୪୯ କୋଟି ଟଙ୍କା। ସେହିପରି ୨୦୨୧ ସେପ୍ଟେମ୍ବରରେ କେନ୍ଦ୍ରୀୟ ଜିଏସ୍ଟି (ସିଜିଏସ୍ଟି), ସମନ୍ବିତ ଜିଏସ୍ଟି (ଆଇଜିଏସ୍ଟି) ଓ ଅତିରିକ୍ତ ଜିଏସ୍ଟି (ସେସ୍) ବାବଦକୁ ଯଥାକ୍ରମେ ୭୭୨.୯୩ କୋଟି, ୯୯୬.୪୮ କୋଟି ଓ ୬୨୬.୮୫ କୋଟି ଟଙ୍କା ସଂଗ୍ରହ କରାଯାଇଥିବାବେଳେ ଏ କ୍ଷେତ୍ରରେ ଯଥାକ୍ରମେ ୫୫.୪୬ ପ୍ରତିଶତ, ୩୦.୫୬ ପ୍ରତିଶତ ଓ ୨୭.୨୮ ପ୍ରତିଶତ ବୃଦ୍ଧି ପରିଲକ୍ଷିତ ହୋଇଛି।
୨୦୨୧ ସେପ୍ଟେମ୍ବର ରେ ପେଟ୍ରୋଲ ଓ ମଦ ଉପରୁ ଭାଟ୍ ବାବଦରେ ମୋଟ୍ ୮୦୭.୮୧ କୋଟି ଟଙ୍କା ସଂଗୃହୀତ ହୋଇଥିବାବେଳେ ୨୦୨୦ ସେପ୍ଟେମ୍ବରରେ ଏହି ପରିମାଣ ଥିଲା ୫୭୭.୨୭ କୋଟି ଟଙ୍କା। ଫଳରେ ଏହି କ୍ଷେତ୍ରରେ ୪୦ ପ୍ରତିଶତ ଅଭିବୃଦ୍ଧି ଘଟିଛି।
୨୦୨୧ ସେପ୍ଟେମ୍ବରରେ ମୋଟ୍ ୧୩.୬୭ ଲକ୍ଷ ଇ-ୱେବିଲ୍ ନିର୍ଗମନ ହୋଇଥିବାବେଳେ ୨୦୨୦ରେ ଏହା ଥିଲା ୧୨.୩୩ ଲକ୍ଷ।ଫଳରେ ଏ କ୍ଷେତ୍ରରେ ୧୦.୯୮ ପ୍ରତିଶତ ବୃଦ୍ଧି ଘଟିଛି।
ତଥ୍ୟ ବିଶ୍ଳେଷଣ ବ୍ୟବସ୍ଥାର ଉପଯୋଗକରି ଭୁଲ୍ ରିଟନର୍ସ ଦାଖଲକାରୀଙ୍କୁ ଚିହ୍ନଟ କରିବା ସହ ସେମାନଙ୍କଠାରୁ ଆଇନ ଅନୁଯାୟୀ ଟିକସ ଆଦାୟ କରିବା ପାଇଁ ନିକଟରେ ରାଜ୍ୟ ବାଣିଜ୍ୟକର ଓ ଜିଏସ୍ଟି ଆୟୁକ୍ତ ସୁନୀଲ କୁମାର ଲୋହାନି କ୍ଷେତ୍ରୀୟ ଅଧିକାରୀମାନଙ୍କର କାର୍ଯ୍ୟର ସମୀକ୍ଷାକରି ନିର୍ଦ୍ଦେଶ ଦେଇଛନ୍ତି। ସଚ୍ଚୋଟ ଟିକସଦାତାମାନେ ଯେପରି କୌଣସି ଅସୁବିଧାର ସମ୍ମୁଖୀନ ନ ହୁଅନ୍ତି, ସେଥିପ୍ରତି ଯତ୍ନବାନ ହେବାକୁ ମଧ୍ୟ ସେ ପରାମର୍ଶ ଦେଇଛନ୍ତି।
