ନୂତନତ୍ୱର ସନ୍ଧାନ ବହୁ ସମୟରେ ବ୍ୟକ୍ତିଙ୍କୁ ନୂତନ ସ୍ତରରେ ପହଞ୍ଚାଇ ଦେଇଥାଏ, ଯାହା ଘଟିଛି ସୋନାଲ ଓ ବୈଭବଙ୍କ ଜୀବନରେ। ଏହି ଦୁଇଜଣ କୁରୁକ୍ଷେତ୍ର ନ୍ୟାଶନାଲ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି(ଏନ୍ଆଇଟି)ରୁ ଡିଗ୍ରୀ ହାସଲ କରିବା ପରେ ଏବେ ପ୍ଲାଷ୍ଟିିକ ବର୍ଜ୍ୟ ବ୍ୟବହାର କରି ଆକର୍ଷଣୀୟ ଜିନିଷ ତିଆରି କରୁଛନ୍ତି। ଦୁହେଁ ୨୦୨୦ରେ ଦିଲ୍ଲୀରେ ‘ଇକନସିୟସ’ ଷ୍ଟାର୍ଟଅପ ଗଠନ କରି ତା’ ମାଧ୍ୟମରେ ୩ ଲକ୍ଷ ୫୦ ହଜାର କେ.ଜି. ପ୍ଲାଷ୍ଟିକ ବର୍ଜ୍ୟ ରିସାଇକେଲ କରିସାରିଲେଣି। ସେମାନେ ସେଥିରୁ ଇ ବୋର୍ଡ, ଡଷ୍ଟବିନ, ପାର୍କ ବେଞ୍ଚ, ପ୍ଲାଣ୍ଟର ସହ ଅନ୍ୟ ପରିବେଶ ଉପଯୋଗୀ ଜିନିଷ ତିଆରି କରୁଛନ୍ତି। ସୋନାଲ ଇଲେକ୍ଟ୍ରୋନିକ୍ସ ଓ କମ୍ୟୁନିକେଶନରେ ଏବଂ ବୈଭବ ପରିବେଶ ବିଜ୍ଞାନରେ ଡିଗ୍ରୀ ହାସଲ କରିଛନ୍ତି। ସେମାନେ ଥରେ ହିମାଚଳ ପ୍ରଦେଶକୁ ଷ୍ଟଡି ଟୁର୍ରେ ଯାଇଥିବାବେଳେ ସେଠାରେ ପର୍ଯ୍ୟଟନ କ୍ଷେତ୍ରରେ ଠୁଳ ହୋଇଥିବା ବର୍ଜ୍ୟକୁ ଦେଖି ତାହାର ସମାଧାନ ଉପାୟ ଚିନ୍ତା କରିଥିଲେ ଓ ତାହା ଏବେ ସଫଳ ହୋଇଛି। ସେମାନେ ଏଥିରୁ ବର୍ଷକୁ ୧ କୋଟି ଟଙ୍କାରୁ ଅଧିକ ଲାଭ ପାଉଛନ୍ତି।
