ସମ୍ବଲପୁର,୭।୫(ଭବାନୀ ଶଙ୍କର ଭୋଇ):ଚଳିତ ସାଧାରଣ ନିର୍ବାଚନରେ ବିଭିନ୍ନ ପ୍ରସଙ୍ଗକୁ ନେଇ ପ୍ରାର୍ଥୀମାନେ ଚର୍ଚ୍ଚାର ପରିସରକୁ ଆସୁଛନ୍ତି । ଏମିତି ଜଣେ ସ୍ବାଧୀନ ପ୍ରାର୍ଥୀ ହେଲେ ଜ୍ଞାନେନ୍ଦ୍ର ବେହେରା, ଯିଏ ଦୁଇଟି ଲୋକ ସଭା ଏବଂ ଦୁଇଟି ବିଧାନସଭା ଆସନରେ ନାମାଙ୍କନ ପତ୍ର ଦାଖଲ କରିଛନ୍ତି। ନେତାମାନେ ଗୋଟିଏ ବିଧାନସଭା କିମ୍ବା ଲୋକ ସଭାରେ ପ୍ରାର୍ଥୀ ହୋଇ ପ୍ରଚାର ପାଇଁ ନାକେଦମ ହେଉଥିବା ବେଳେ ଜ୍ଞାନେନ୍ଦ୍ର ବରଗଡ଼ ଏବଂ ସମ୍ବଲପୁର ଲୋକ ସଭା ସହ ଝାରସୁଗୁଡ଼ା ଏବଂ ସମ୍ବଲପୁର ବିଧାନସଭା କ୍ଷେତ୍ରରେ ନାମାଙ୍କନପତ୍ର ଦାଖଲ କରିଛନ୍ତି। ସୋମବାର ଜ୍ଞାନେନ୍ଦ୍ର ଏକ ରିକ୍ସାରେ ଏକ ମୃତ ରୋଗୀର ପୁତ୍ତଳିକାକୁ ବୋହି ସମ୍ବଲପୁର ଜିଲାପାଳଙ୍କ କାର୍ଯ୍ୟାଳୟରେ ପହଞ୍ଚିଥିଲେ। ସାଥିରେ ଥିବା ତାଙ୍କର ସମର୍ଥକ ବିଭିନ୍ନ ପ୍ରସଙ୍ଗରେ ପ୍ଲାକାର୍ଡ ଧରି ଶୋଭାଯାତ୍ରାରେ ପ୍ରଦର୍ଶନ କରିଥିଲେ। ବୁର୍ଲା ଡାକ୍ତରଖାନାର ପ୍ରକୃତ ଅବସ୍ଥା ବିଷୟରେ ଲୋକଙ୍କୁ ସଚେତନ କରିବା ପାଇଁ ତାଙ୍କର ଏହା ଅଭିନବ ପ୍ରୟାସ ବୋଲି ସେ କହିଥିଲେ। ନାମାଙ୍କନପତ୍ର କାଏମ ରହିଲେ ଚାରୋଟିଯାକ ଅଞ୍ଚଳରେ କିଭଳି ପ୍ରଚାର କରିବେ, ସେ ନେଇ ପଚାରିବାରୁ ଜ୍ଞାନେନ୍ଦ୍ର କହିଛନ୍ତି, ଅଧିକ ପୋଷ୍ଟର ବ୍ୟାନର ଲଗାଇ ଗାଡ଼ି ବୁଲାଇ ପ୍ରଚାର ପାଇଁ ମୋ ପାଖରେ ଅର୍ଥ ନାହିଁ। ତେବେ ନିଜେ ଦୁଇଟିଯାକ ଲୋକ ସଭାର ବିଭିନ୍ନ ଅଞ୍ଚଳ ବୁଲି ସ୍ଥାନୀୟ ସମସ୍ୟା ବିଷୟରେ ଲୋକଙ୍କୁ ସଚେତନ କରି ଭୋଟ ଭିକ୍ଷା କରିବେ ବୋଲି କହିଛନ୍ତି।
ଯେ, ଜ୍ଞାନେନ୍ଦ୍ର ବେହେରା ପୂର୍ବରୁ ମଧ୍ୟ ଝାରସୁଗୁଡା ଉପନିର୍ବାଚନରେ ସ୍ବାଧୀନ ପ୍ରାର୍ଥୀ ଭାବେ ପ୍ରତିଦ୍ୱନ୍ଦ୍ୱିତା କରିଥିଲେ। ସମାଜିକକର୍ମୀ ଭାବେ ପରିଚିତ ଜ୍ଞାନେନ୍ଦ୍ରଙ୍କର ଝାରସୁଗୁଡାରେ ନିଜସ୍ବ ବ୍ୟବସାୟ ରହିଛି। ସେ ଦୀର୍ଘବର୍ଷ ହେବ ଶିଳ୍ପାଞ୍ଚଳରେ ସ୍ଥାନୀୟ ନିଯୁକ୍ତି ଏବଂ କଳକାରଖାନାର ଦୌରାତ୍ମ୍ୟକୁ ନେଇ ଲଢେଇ କରି ଆସୁଛନ୍ତି। ସମ୍ବଲପୁରୀ ସ୍ବାଭିମାନକୁ ନେଇ ସେ ନିର୍ବାଚନୀ ମଇଦାନକୁ ଓହ୍ଲାଇଥିବା କହିଛନ୍ତି। ସାମାଜିକ ସମ୍ପର୍କକୁ ଆଧାର କରି ସେ ନିର୍ବାଚନୀ ମଇଦାନରେ ଜନସାଧାରଣଙ୍କ ଭୋଟ ପାଇବା ନେଇ ଆଶାବାଦୀ ରହିଥିବା କହିଛନ୍ତି ।
