କୋକସରା,୪ା୧୦(ଦୁଷ୍ମନ୍ତ କୁମାର ପାଟ୍ଟଯୋଷୀ): କଳାହାଣ୍ଡି ଜିଲା ଧର୍ମଗଡ଼ ଉପଖଣ୍ଡକୁ ଜିଲା ମାନ୍ୟତା ଦାବିରେ ଗଣଧାରଣା ଆଜିକୁ ୩୭ ଦିନରେ ପହଞ୍ଚିଛି। ବୁଧବାର କ୍ରିୟାନୁଷ୍ଠାନ କମିଟିର ଡାକରାରେ ଧର୍ମଗଡ଼ ଉପଖଣ୍ଡର ଗୋଲାମୁଣ୍ଡା, ଧର୍ମଗଡ଼, କୋକସରା, କଲମପୁର ବ୍ଲକରେ ବନ୍ଦ ଡାକରା ଦିଆଯାଇଛି। ଫଳରେ ସକାଳ ୬ଟାରୁ ଜିଲା ଗଠନ ଦାବିରେ କ୍ରିୟାନୁଷ୍ଠାନ କମିଟିର ସଦସ୍ୟମାନେ ୨୬ ନମ୍ବର ଜାତୀୟ ରାଜପଥ ସମେତ ସମସ୍ତ ସ୍ଥାନରେ ରାସ୍ତା ଅବରୋଧ କରିଥିଲେ। କୋକସରା ବ୍ଲକର ମୋଟେର ଛକଠାରେ କ୍ରିୟାନୁଷ୍ଠାନ କମିଟିର ସଦସ୍ୟ ବେଣୁପାଣି ଦୁର୍ଗା, ଲିଙ୍ଗରାଜ ବେହେରା, ସୁଶୀଲ କୁମାର ଶବର, ବଙ୍କିମ ଦାସ, ସୁଦର୍ଶନ ବେହେରା, ଘେନୁ ବେହେରା, ରାଜ କୁମାର ବାଗ, କ୍ଷୀରସିନ୍ଧୁ ସୁନାନୀ, କୋକସରା ପୋଲିସ ଥାନା ସମ୍ମୁଖରେ କ୍ରିୟାନୁଷ୍ଠାନ କମିଟିର ସଦସ୍ୟ ପୁରୁଷୋତ୍ତମ ଗୁପ୍ତା, ଜିଲା ପରିଷଦ ସଭ୍ୟ, ତ୍ରିନାଥ ବାଗ୍, ପେନ୍ସନ୍ଗ୍ରାହୀ ସଂଘ ସମ୍ପାଦକ ମୀନକେତନ ପ୍ରଧାନୀ, କଂଗ୍ରେସ ନେତା ରାଜେନ୍ଦ୍ର ନାଏକ, ତ୍ରିଭୂବନ ନାଏକ, ଚାଷୀନେତା ଶିବ ପ୍ରସାଦ ପ୍ରଧାନୀ, କୀର୍ତ୍ତନ ଶବର, ଘନଶ୍ୟାମ ଜାଲ ପ୍ରମୁଖ ସାମିଲ ରହିଥିଲେ। ଆମପାଣି ବସ୍ଷ୍ଟାଣ୍ଡ ନିକଟରେ ଜିଲାପରିଷଦ ସଭ୍ୟ ହେମନ୍ତ ମାଝି, ପୂର୍ବତନ ସରପଞ୍ଚ ଟିକିଚନ୍ଦ୍ର ଧାଙ୍ଗଡ଼ାମାଝି, କଂଗ୍ରେସ ନେତା ହରିଶ୍ଚନ୍ଦ୍ର ନାଏକ, ବିଡୁ ନାଏକ, କେଶବ ବେଣୁପାଣି, ରାଜୁ ପଟେଲ, ତାପସ ରଞ୍ଜନ ରାୟ, ଅଜୟ ପଣ୍ଡା, ଜିତେନ୍ଦ୍ର ପଣ୍ଡା, ରୁଷି ପୂଝାରୀ, ଦୟାନିଧି ନାଏକ, ଭାସ୍କର ରାଓ ପ୍ରମୁଖ ବନ୍ଦ ପାଳନରେ ସାମିଲ ହୋଇଥିଲେ। ରାସ୍ତା ଅବରୋଧ ଫଳରେ ଧର୍ମଗଡ଼ ଉପଖଣ୍ଡ ସମେତ ଭବାନୀପାଟଣା ଜୟପୁର ରାସ୍ତାରେ ଗାଡ଼ି ଚଳାଚଳ ଠପ୍ ହୋଇଥିଲା। ତେବେ ବନ୍ଦ ପାଳନ ସମୟରେ କୌଣସି ଅପ୍ରୀତିକର ପରିସ୍ଥିତି ନ ହେବାକୁ କୋକସରା ଓ ଆମପାଣି ପୋଲିସ ପକ୍ଷରୁ ପୋଲିସ କର୍ମଚାରୀ ମୁତୟନ ରହିଥିଲେ। କୋକସରାଠାରେ ଅଲ୍ ଓଡ଼ିଶା ସିଡ୍ୟୁଲ୍ କାଷ୍ଟ ଫେଡେରେଶନ ପକ୍ଷରୁ କର୍ମକର୍ତ୍ତାମାନେ ମଧ୍ୟ ସମର୍ଥନ ଜଣାଇ ବନ୍ଦ ପାଳନରେ ସାମିଲ ହୋଇଥିଲେ।
