ନୂଆଦିଲ୍ଲୀ, ୯।୯: ଦେଶର ଅର୍ଥବ୍ୟବସ୍ଥା ନେଇ ବିରୋଧୀ ଦଳଙ୍କ ପକ୍ଷରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସରକାରଙ୍କୁ ଘେରିବା ଜାରି ରହିଛି। ଏନେଇ କଂଗ୍ରେସ ପକ୍ଷରୁ ରାହୁଲ ଗାନ୍ଧୀ ମୋଦିଙ୍କୁ ଟାର୍ଗେଟ୍ କରିଛନ୍ତି। ମୋଦି ୨୧ ଦିନରେ ଦେଶକୁ କରୋନା ମୁକ୍ତ କରିବାକୁ କହିଥିଲେ। ତେବେ ଏହା ବଦଳରେ ଦେଶର ଅର୍ଥନୀତିକୁ ଡୁବେଇ ଦେଇଥିବା ସେ ଅଭିଯୋଗ କରିଛନ୍ତି। କଂଗ୍ରେସ ପକ୍ଷରୁ ଜାରି ହୋଇଥିବା ନୂଆ ଭିଡ଼ିଓରେ ରାହୁଲ ଏଭଳି ମନ୍ତବ୍ୟ ଦେଇଛନ୍ତି। ସରକାରଙ୍କ ପକ୍ଷରୁ ଘୋଷଣା ହୋଇଥିବା ଲକ୍ଡାଉନ୍ର ପ୍ରଭାବ ଅଣ-ସଂଗଠିତ କ୍ଷେତ୍ର ଉପରେ ଅଧିକ ପଡ଼ିଛି। ଲକ୍ଡାଉନ୍ ଏସବୁ କ୍ଷେତ୍ର ପାଇଁ ମୃତ୍ୟୁଦଣ୍ଡ ଭଳି ସାବ୍ୟସ୍ତ ହୋଇଥିବା ରାହୁଲ ଅଭିଯୋଗ କରିଛନ୍ତି। ବହୁ କ୍ଷୁଦ୍ର ଉଦ୍ୟୋଗ ବନ୍ଦ ହେବା ଯୋଗୁ କୋଟି କୋଟି ଲୋକ ଚାକିରି ହରାଇ ବେକାର ବସିଛନ୍ତି। ସେମାନଙ୍କ ପେଟକୁ ଦାନା ନାହିଁ, ହାତରେ ଟଙ୍କା ନାହିଁ। ଏଭଳି ସ୍ଥିତି ପାଇଁ ମୋଦି ଦାୟୀ ବୋଲି ରାହୁଲ କହିଛନ୍ତି। ଏବେ ଦେଶରେ ୨ କୋଟି ୭୦ ଲକ୍ଷରୁ ଅଧିକ ୨୦ରୁ ୩୦ବର୍ଷ ବୟସ୍କ ଯୁବବର୍ଗ ବେକାର ବସିଛନ୍ତି। ଲକ୍ଡାଉନ୍ ସେମାନଙ୍କର ରୋଜଗାର ଛଡ଼େଇ ନେଇଛି। ଏବେ ରାହୁଲଙ୍କର ୨ ମିନିଟ ୮ସେକେଣ୍ଡର ଏହି ଭିଡ଼ିଓ ସୋସିଆଲ୍ ମିଡ଼ିଆରେ ଭାଇରାଲ ହେବାରେ ଲାଗିଛି।
