ମୁମ୍ବାଇ: ଏମିତି ସମୟ ଥିଲା ଯେତେବେଳେ ଅଭିନେତ୍ରୀ ଅନୁ ଅଗ୍ରୱାଲ ନିଜ ଅଭିନୟ ଯାଦୁରେ ଦର୍ଶକଙ୍କୁ ମତୁଆଲା କରୁଥିଲେ । ଫିଲ୍ମ ‘ଆଶିକି’ରେ କାମ କରି ଅନୁ ରାତାରାତି ଷ୍ଟାର ପାଲଟି ଯାଇଥିଲେ । ହେଲେ ଏକ ଦୁର୍ଘଟଣା ଅନୁଙ୍କ ଜୀବନକୁ ସମ୍ପୂର୍ଣ୍ଣ ବଦଳାଇ ଦେଇଥିଲା । ୧୯୯୯ରେ ହୋଇଥିବା ଏହି ଭୟଙ୍କର ଦୁର୍ଘଟଣାରେ ଅନୁଙ୍କ ଜୀବନ ସିନା ବଞ୍ଚିଗଲା ହେଲେ ଚେହେରା ସମ୍ପୂର୍ଣ୍ଣ ବଦଳିଗଲା । ବେଶ କିଛି ବର୍ଷର ଚିକିତ୍ସା ପରେ ଏବେ ସୁସ୍ଥ ହୋଇ ଅନୁ ପୁଣିଥରେ ମନୋରଞ୍ଜନ ଦୁନିଆକୁ ଫେରିବେ ବୋଲି ଜଣାପଡିଛି ।
ତେବେ ୧୯୯୯ରେ ହୋଇଥିବା ଏହି ଦୁର୍ଘଟଣା ପରେ ଅନୁ କୋମାକୁ ଚାଲିଯାଇଥିଲେ । କେହି ବିଶ୍ୱାସ କରି ପାରୁ ନ ଥିଲେ ଅନୁ ବଞ୍ଚିବେ ବୋଲି । ହେଲେ ୨୯ ଦିନ ପରେ ତାଙ୍କର ଯେତେବେଳେ ହୋସ୍ ଆସିଲା ସେତେବେଳେ ଏହା ସମସ୍ତଙ୍କୁ ମିରାକଲ ଭଳି ମନେହେଲା । ଏହାପରେ କିନ୍ତୁ ତାଙ୍କର ଅଧା ଶରୀର ପାରାଲାଇଜ୍ଡ ହୋଇଯାଇଥିଲା । ଅନୁ ଚିନ୍ତା କରୁଥିଲେ ସତରେ ସେ କ’ଣ ଆଉ ବଞ୍ଚିବେ । ଯଦି ବଞ୍ଚିବେ ତେବେ ସେ କ’ଣ ସାରା ଜୀବନ ପାରାଲାଇଜ୍ଡ ହୋଇ ରହିବେ । ହେଲେ ଏସବୁ ପ୍ରଶ୍ନର ଯେମିତି କିଛି ଉତ୍ତର ନ ଥିଲା । ଏପଟେ ଚେହେରାବି ସମ୍ପୂର୍ଣ୍ଣ ଭାବେ ବଦଳି ଯାଇଥିଲା ।
ନିକଟରେ ଅନୁ ଏକ ସାକ୍ଷାତକାରରେ ବିଗତ ଦିନର କଥାକୁ ବୟାନ କରି ଦୁଃଖ ପ୍ରକାଶ କରିଛନ୍ତି । ସେ କହିଛନ୍ତି ବାସ୍ତବରେ ମୋ ଶରୀର ବୋଧହୁଏ ଏକ ଲକ୍ଷ ଖଣ୍ଡ ହୋଇଯାଇଥିଲା । ତେବେ ହାଡ ଓ ଶରୀରକୁ ଠିକ୍ କରିବାକୁ ମୋତେ ଅନେକ ସର୍ଜରୀ କରିବାକୁ ପଡିଛି । ଭାଙ୍ଗି ଯାଇଥିବା ହାଡକୁ ଠିକ୍ କରିବା ବଡି ଫଙ୍କସନ ନର୍ମାଲ କରିବାକୁ ଏସବୁ ସର୍ଜରୀ କରାଯାଇଛି । ତେବେ ଚେହେରା ବଦଳି ଯାଇଥିବାରୁ ସମସ୍ତେ ମୋତେ କସମେଟିକ ସର୍ଜରୀ କରିବାକୁ କହିଥିଲେ । ହେଲେ ମୁଁ ଏହା କରି ନ ଥିଲି । ଏବେ ଲୋକେ ଭାବୁଛନ୍ତି ମୁଁ ସର୍ଜରୀ କରିଛି ବୋଲି କାରଣ ମୋ ଚେହେରା ଏବେ ବଦଳି ଯାଇଛି ।
