କୋଳିମାଟି,୨୭ା୬:(ଡି.ଏନ୍.ଏ): କେନ୍ଦୁଝର ଜିଲା ଆନନ୍ଦପୁର ବ୍ଲକ କୋଳିମାଟି ଗ୍ରାମ ପଞ୍ଚାୟତରେ ରହିଥିବା କ୍ବାରାଣ୍ଟାଇନ ସେଣ୍ଟରରେ ଶନିବାର ସକାଳୁ ୪୦ ଜଣ ପ୍ରବାସୀ ଅନଶନରେ ବସିଛନ୍ତି। ସକାଳ ଜଳଖିଆ ଠିକ୍ ଭାବରେ ଦିଆ ଯାଉ ନ ଥିବାରୁ ସେମାନେ ଅନଶନ କରିଥିବା କହିଛନ୍ତି।
ପ୍ରବାସୀଙ୍କ ଅଭିଯୋଗନୁଯାୟୀ, ସରକାରଙ୍କ ନିୟମ ଅନୁସାରେ ଖାଇବା ଦିଆଯାଉ ନାହିଁ। ଠିକ୍ ଭାବରେ ସାବୁନ, ତେଲ, ସାନିଟାଇଜର ଇତ୍ୟାଦି ମିଳୁନାହିଁ। କିଛି ସମୟ ଅନଶନରେ ବସିବା ପରେ କୋଳିମାଟି ସରପଞ୍ଚ ଉତ୍ତରା ଧିର ଏବଂ ତାଙ୍କ ସ୍ବାମୀ ଅଭିମନ୍ୟୁ ପହଞ୍ଚି ବୁଝାଶୁଝା କରିବା ସହିତ ସମସ୍ତ ସୁବିଧା ମିଳିବ ବୋଲି ପ୍ରତିଶ୍ରୁତି ଦେବାପରେ ସେମାନେ ଅନଶନରୁ ହଟିଛନ୍ତି।
