ଭଣ୍ଡାରିପୋଖରୀ,୧୭।୧୨(ସ୍ବ.ପ୍ର.): ଭଣ୍ଡାରିପୋଖରୀ ପଞ୍ଚାୟତ ସମିତିର ୪ର୍ଥ ସାଧାରଣ ବୈଠକ ଅନୁଷ୍ଠିତ ହୋଇଯାଇଛି। ଅଧ୍ୟକ୍ଷା ସୁମତୀ ସେଠୀଙ୍କ ସଭାପତିତ୍ୱରେ ଅନୁଷ୍ଠିତ ଏହି ବୈଠକରେ ମୁଖ୍ୟଅତିଥି ଭାବେ ବିଧାୟକ ପ୍ରଫୁଲ୍ଲ ସାମଲ ଯୋଗଦେଇ ପଞ୍ଚାୟତ ସମିତିକୁ ରାଜନୀତିମୁକ୍ତ କରାଯିବା ସହ ନିର୍ବାଚିତ ପ୍ରତିନିଧିମାନେ ଭଲ କାମ କରିବାକୁ ପରାମର୍ଶ ଦେଇଥିଲେ। ଏହାସହ ପଞ୍ଚାୟତ ପ୍ରତିନିଧି ଓ ପ୍ରଶାସନିକ ଅଧିକାରୀମାନେ ସରକାରଙ୍କ ଜନହିତକର ଯୋଜନାକୁ ତତ୍ପରତାର ସହ କାର୍ଯ୍ୟକାରୀ କରିବାକୁ ବିଧାୟକ ନିର୍ଦ୍ଦେଶ ଦେଇଥିଲେ। ସ୍ବାସ୍ଥ୍ୟସେବା ଭିତ୍ତିଭୂମି ବିକାଶ ବାବଦରେ ଆଲୋଚନା ହୋଇଥିବା ବେଳେ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଅଧିକାରୀ ଅଧିକାଂଶ ସମୟ ଅନୁପସ୍ଥିତ ରହୁଥିବା ସମିତିସଭ୍ୟ ଗୁରୁପ୍ରସାଦ ଗିରି ଅଭିଯୋଗ କରିଥିଲେ। ସେହିଭଳି ମାଳଦା ପଞ୍ଚାୟତରେ ଅଙ୍ଗନଓ୍ବାଡି କର୍ମୀ କେନ୍ଦ୍ରକୁ ଦୀର୍ଘମାସ ହେବ ଆସୁ ନ ଥିବା ନେଇ ବାରମ୍ବାର ଅଭିଯୋଗ ସତ୍ତ୍ୱେ ମହିଳା ଓ ଶିଶୁ ବିକାଶ ଅଧିକାରିଣୀ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁ ନ ଥିବା ସମିତିସଭ୍ୟା ରିତାଞ୍ଜଳି ସାମଲ ଅଭିଯୋଗ ଆଣିଥିଲେ। ଅନୁରୂପ ଭାବେ ବିଦ୍ୟୁତ୍, ଗମନାଗମନ, କୃଷି, ଶିକ୍ଷା, ଯୋଗାଣ ବାବଦରେ ସରପଞ୍ଚ ଅମୂଲ୍ୟ ନାୟକ, ସାଧନାଞ୍ଜଳି ମହାପାତ୍ର, ପରମାନନ୍ଦ ନାୟକ, ସତ୍ୟବ୍ରତ ପାଲ, ସମିତିସଭ୍ୟ ପ୍ରତାପ ଦ୍ୱିବେଦୀ, ପୂର୍ଣ୍ଣଚନ୍ଦ୍ର ମାଝି, ଜଗତ ଜୀବନ ବାରିକ, ତ୍ରୈଲୋକ୍ୟ ସାହୁ, ରଞ୍ଜନ ପରିଡ଼ା ପ୍ରମୁଖ ବିଭିନ୍ନ ପ୍ରଶ୍ନ କରିଥିଲେ। ଜିପିଓ ମୀନକେତନ ବାରିକ ପୂର୍ବ ବୈଠକର ବିବରଣୀ ପାଠ କରିଥିତ୍ଲେ। ଜିଲା ପରିଷଦ ଅଧ୍ୟକ୍ଷ ପ୍ରଫୁଲ୍ଲ ଜେନା, ପଞ୍ଚାୟତ ସମିତି ଉପାଧ୍ୟକ୍ଷ ପ୍ରଣୀତକାନ୍ତି ସାମଲ, ତହସିଲଦାର ସରୋଜକାନ୍ତ ନାୟକ, ବିଡିଓ ଦେବଦତ୍ତ ଦାସ, ସହକାରୀ ନିର୍ବାହୀ ଯନ୍ତ୍ରୀ ପ୍ରିୟଙ୍କା ତ୍ରିପାଠୀ, ଏମ୍ପିଙ୍କ ପ୍ରତିନିଧି ଲଳିତ କୁମାର ରାଉତ, ଜିଲା ପରିଷଦ ସଭ୍ୟ ଲକ୍ଷ୍ମୀଧର ସାହୁ, ଉତ୍କଳ କେଶରୀ ମହାନ୍ତି, ବଦ୍ରିନାରାୟଣ ରାଉତ, ମେଡିକାଲ ଅଧିକାରୀ କମଳାକାନ୍ତ ସ୍ବାଇଁ, ବିଇଓ ଅଧିର ତରାଇ ପ୍ରମୁଖ ବୈଠକରେ ଉପସ୍ଥିତ ଥିଲେ।
