ଭେଡେନ ୨୩।୪: (ଡି.ଏନ.ଏ.) ବରଗଡ଼ ଜିଲା ଭେଡ଼େନ ତହସିଲ ଅଞ୍ଚଳରେ ପଥର ମାଫିଆଙ୍କ ରାଜ୍ ଚାଲିଛି। କେତେକ ପ୍ରଶାସନିକ କର୍ମଚାରୀ ପଥର ମାଫିଆଙ୍କ ହାତବାରିସି ସାଜିଥିବା ଅଭିଯୋଗ ହେଉଛି। ବିନା ନିଲାମରେ ବେଧଡ଼କ ପଥରଖାଦାନ ଗୁଡ଼ିକରେ ଉଚ୍ଚଶକ୍ତି ସମ୍ପନ୍ନ ଡ଼ିନାମାଇଟ ବିସ୍ଫୋରଣ କରି ବଡ଼ ବଡ଼ ବ୍ରେକର ଜରିଆରେ ପଥର ଉତ୍ତୋଳନ କରାଯାଉଛି। ଏହା ପ୍ରତିଦିନ ଟ୍ରାକ୍ଟର, ହାଇୱା ଯୋଗେ ଶହ ଶହ ଟ୍ରିପ୍ କ୍ରଶରଗୁଡ଼ିକୁ ଯାଉଥିବା ଦେଖିବାକୁ ମିଳିଛି। ଏ ନେଇ ସ୍ଥାନୀୟ ବୁଦ୍ଧିଜୀବୀ ଏବଂ ଜନସାଧାରଣ ବାରମ୍ବାର ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ବି କିଛି ସୁଫଳ ମିଳିପାରିନାହିଁ।
ପ୍ରକାଶ ଯେ, ସରକାରଙ୍କ ମାଇନ୍ସ ଅଧିନିୟମ ଅନୁସାରେ ପ୍ରତିବର୍ଷ ମାର୍ଚ୍ଚ ମାସର ଶେଷ ସପ୍ତାହ ମଧ୍ୟରେ ତହସିଲ ଅନ୍ତର୍ଗତ ବାଲି, ମାଟି, ମୋରମ, ପଥର ଆଦି ସୈରାତ୍ ଉତ୍ସଗୁଡ଼ିକୁ ବର୍ଷିକିଆ କିମ୍ବା ଲିଜ୍ ସୂତ୍ରରେ ନିଲାମ ଦିଆଯାଇଥାଏ। ମାତ୍ର ଚଳିତବର୍ଷ ଏପ୍ରିଲ ମାସ ଶେଷ ହେବା ଉପରେ ଥିବାବେଳେ ଏପଯର୍ୟନ୍ତ ଏହାକୁ ସ୍ଥଗିତ ରଖାଯାଇଛି। ଏହା ମାଫିଆଙ୍କ ପାଇଁ ସୁଯୋଗ ଆଣିଦେଇଛି। ବିଶେଷ କରି ଗଣ୍ଡତୁରୁମ ରାଜସ୍ବ ସର୍କଲର ଗଣ୍ଡତୁରୁମ, ଭାଙ୍ଗକୁଦ, କେଶ୍ରିପାଲି, ଟିହିକିପାଲି, ଭାଲୁପାଲି, ସାରସପାଲି ଆଦି ଗ୍ରାମରେ ଥିବା ପଥରଖାଦାନ ଗୁଡ଼ିକରେ ବେଧଡ଼କ ପଥର ଉତ୍ତୋଳନ ଚାଲିଛି। ଏପରିକି ମାଫିଆମାନେ ମହାନଦୀ ଗର୍ଭରେ ଥିବା ପଥରକୁ ମଧ୍ୟ ସେମାନେ ଛାଡୁନାହାନ୍ତି। ସେହିପରି ଗଣ୍ଡତୁରୁମ, ମହୁଲପାଲି, କମ୍ପପାଲି, ଭୂତଲୋଡ଼, କମଗାଁ, ଉଦେପୁର, ଧୁବେନପାଲି, ବରଗାଁ, ଅଛାଣ୍ଡପାଲି, କୁତ୍ପାଲି ଆଦି ଗ୍ରାମରେ ଥିବା ବାଲିଘାଟରୁ ହାଇୱା, ଟ୍ରାକ୍ଟର ଯୋଗେ ବାଲି ବୋଝେଇ ହୋଇ ପ୍ରତିଦିନ ଶହ ଶହ ଟ୍ରିପ ସମ୍ବଲପୁର ଏବଂ ବରଗଡ଼ ପଟକୁ ଚୋରାଚାଲାଣ ହେଉଛି। ଏ ସମ୍ପର୍କରେ ଭେଡ଼େନ ତହସିଲଦାର ନେପାଳ ଚନ୍ଦ୍ର ମୁଣ୍ଡାଙ୍କୁ ଯୋଗାଯୋଗ କରାଯିବାରୁ ସେ କହିଲେ, ଆମେ ଏହି ସୈରାତ ଉତ୍ସଗୁଡ଼ିକର ନିଲାମ ପାଇଁ ସରକାରଙ୍କ ଖଣି ଓ ପ୍ରଦୂଷଣ ବିଭାଗକୁ ଜଣାଇଛୁ। ମାତ୍ର ଏପର୍ଯ୍ୟନ୍ତ ସେଠାରୁ କୌଣସି ଅର୍ଡର ଆସିନାହିଁ। ତେବେ ଯେଉଁଠି ବି ଏହି ବେନିୟମ କାରବାର ଚାଲିଛି ଆମେ ତାଙ୍କ ବିରୁଦ୍ଧରେ ଦୃଢ ପଦକ୍ଷେପ ଗ୍ରହଣ କରିବୁ ବୋଲି ତହସିଲଦାର ମୁଣ୍ଡା କହିଛନ୍ତି ।
