ନାଉଗାଁ,୧୨।୩ (ସ୍ବ.ପ୍ର.): ଜଗତ୍ସିଂହପୁର ଜିଲା ନାଉଗାଁ ତହସିଲ ଅଧୀନ ଦେବୀ ନଦୀରେ ୬ଟି ବାଲି ସୈରାତକୁ ୨୦୨୦ ଡିସେମ୍ବର ୧୬ରେ ନିଲାମ କରାଯାଇଛି। ଏହି ଘାଟ ମଧ୍ୟରେ ରହିଛି ଶିଖର, ଏରେଡା, ବଛାଳୋ, ଅରଖକୁଦ, ଅଲଣା-୨ ଓ ଗଳଦାରୀ ବାଲି ସୈରାତ। ଏହି ବାଲି ସୈରାତଗୁଡିକ ନିଲାମଧାରୀମାନେ ନେଇଥିବା ବେଳେ ଏରେଡା ବାଲିଘାଟ ନେଇଥିବା ନିଲାମଧାରୀ ଉକ୍ତ ଘାଟରୁ ଓହରିଯିବାକୁ ଲିଖିତ ଭାବେ ତହସିଲକୁ ଜଣାଇଛନ୍ତି। ଏହି ଘାଟକୁ ଛାଡ଼ି ଦେଲେ ଅନ୍ୟ ୫ ଘାଟ ପାଇଁ ଆବଶ୍ୟକ କାଗଜପତ୍ର ହୋଇ ନ ଥିବାରୁ ସୈରାତଗୁଡିକରୁ ବାଲି ଉଠାଣ ବନ୍ଦ ରହିଛି। କିନ୍ତୁ ବେଆଇନ ଭାବେ କିଛିଦିନ ହେବ ଅରଖକୁଦ ବାଲି ସୈରାତରୁ ବାଲି ଚୋରା ଚାଲାଣ କରାଯାଇଛି। କିଛିଦିନ ତଳେ ବାଲି ଚୋରାଚାଲାଣକୁ ସ୍ଥାନୀୟ ଗ୍ରାମବାସୀ ବିରୋଧ କରି ତହସିଲ କାର୍ଯ୍ୟାଳୟରେ ଅଭିଯୋଗ କରିଥିଲେ। ଏପରି କି ବାଲି ଉଠାଉଥିବା ଜେସିବି ଓ ଟ୍ରାକ୍ଟର ଗ୍ରାମବାସୀଙ୍କ ଦ୍ୱାରା ଅଟକ ରଖାଯାଇଥିଲା। ଖବରପାଇ ତହସିଲ କାର୍ଯ୍ୟାଳୟରୁ ଅତିରିକ୍ତ ତହସିଲଦାର ନେତ୍ରାନନ୍ଦ ବେହେରା ଓ ଥାନାଧିକାରୀ ଭରତ ବେହେରା ବୋଲି ସୈରାତ ନିକଟକୁ ଯାଇଥିଲେ। ଜେସିବିକୁ ଥାନାରେ ଅଟକ ରଖି ଜରିମାନା ଆଦାୟ କରି ଛାଡି ଦେଇଥିଲେ। ପରେ ଉକ୍ତ ବାଲି ସୈରାତ ନେଇଥିବା ନିଲାମଧାରୀ ମନଇଚ୍ଛା ବାଲି ଉଠାଉଥିବା ଦେଖିବାକୁ ମିଳିଛି। ଏପରି କି ଦିନ ଦ୍ୱିପ୍ରହରରେ ଶତାଧିକ ବାଲି ଗାଡି ଯାଉଥିବା ବେଳେ ପ୍ରଶାସନ ଆଖିଦୃଶିଆ ପଦକ୍ଷେପ ନେଉ ନ ଥିବାରୁ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି।
ସୂଚନାଯୋଗ୍ୟ, ନିଲାମଧାରୀମାନେ ବାଲି ବିକ୍ରି କରିବାକୁ ମାଇନିଂ ପ୍ଲାନ, ପରିବେଶ ମଞ୍ଜୁରୀ ସହ ଧାର୍ଯ୍ୟ କରାଯାଇଥିବା ଅର୍ଥ ଆଦି ତହସିଲରେ ଜମା ଦେବାକୁ ପଡିବ। ପରେ ତହସିଲ ପକ୍ଷରୁ ବାଲି ସୈରାତଗୁଡିକୁ ମାପ କରାଯାଇ ସୀମା ନିର୍ଦ୍ଧାରଣ କରାଯିବା ସହ ‘ଆର’ ଫର୍ମ ପ୍ରଦାନ କରାଯିବା ପରେ ନିଲାମଧାରୀଙ୍କୁ ବାଲି ଉଠାଇବାକୁ ତହସିଲ ପକ୍ଷରୁ ଅନୁମତି ପ୍ରଦାନ କରାଯିବ। କିନ୍ତୁ ସୈରାତଗୁଡିକର ଏହିସବୁ କାର୍ଯ୍ୟ ପର୍ଯ୍ୟାୟକ୍ରମେ ଚାଲିଛି। ଏ ପର୍ଯ୍ୟନ୍ତ ତହସିଲ ପକ୍ଷରୁ ବାଲି ଉଠାଇବାକୁ କୌଣସି ନିର୍ଦ୍ଦେଶ ପ୍ରଦାନ କରାଯାଇନାହିଁ। କେତେଜଣ ନିଲାମଧାରୀ ବାଲି ସୈରାତ ସିକ୍ୟୁରିଟ୍ ଅର୍ଥ ପ୍ରଦାନ କରିଥିବା ବେଳେ ଆବଶ୍ୟକ କାଗଜପତ୍ର ପ୍ରଦାନ କରିନାହାନ୍ତି। କିନ୍ତୁ ଅରଖକୁଦ ବାଲି ସୈରାତର ଏ ପର୍ଯ୍ୟନ୍ତ ସୀମା ନିର୍ଦ୍ଧାରଣ ହୋଇ ନ ଥିବା ବେଳେ ଆବଶ୍ୟକ କାଗଜପତ୍ର ମଧ୍ୟ ପ୍ରଦାନ କରାଯାଇନାହିଁ। କିନ୍ତୁ ଘାଟରୁ ବାଲି ଚୋରାଚାଲାଣ କରାଯାଉଛି। ପ୍ରଶାସନକୁ ହାତରେ ରଖି ବେଧଡକ ଭାବେ ଉକ୍ତ ଘାଟରୁ ବାଲି ଉଠାଯାଉଥିବା ସାଧାରଣରେ ଚର୍ଚ୍ଚା ଜୋର ଧରିଛି। ନିଲାମଧାରୀ ମନଇଚ୍ଛା ନଦୀ ପଠା ଖୋଳୁଥିବାରୁ ନଦୀବନ୍ଧ ପ୍ରତି ବିପଦ ସୃଷ୍ଟି ହେବାର ଆଶଙ୍କା ରହିଛି। ବେଆଇନ ଭାବେ ବାଲି ଚୋରା ଚାଲାଣ ହେଉଥିବାରୁ ସରକାରଙ୍କ ଲକ୍ଷାଧିକ ଟଙ୍କାର ରାଜସ୍ବ ହାନି ହେଉଥିବା ଜଣାଯାଇଛି। ବେଆଇନ ବାଲି ଚାଲାଣକୁ ରୋକିବା ପାଇଁ ସ୍ଥାନୀୟ ବୁଦ୍ଧିଜୀବୀ ପ୍ରଶାସନ ନିକଟରେ ଦୃଢ଼ ଦାବି କରିଛନ୍ତି। ଏ ସଂକ୍ରାନ୍ତର ତହସିଲଦାର ଜେ. କଳ୍ପନାକୁ ପଚାରିବାରେ ଆଗରୁ ନିଲାମଧାରୀ ବାଲି ଉଠାଉଥିଲେ। ଚଢ଼ାଉ ପରେ ଟ୍ରାକ୍ଟର ଓ ଜେସିବିକୁ ଜବତ କରାଯାଇ ଜରିମାନା ଆଦାୟ କରାଯାଇଥିଲା। ଯଦି ପୁଣି ବାଲି ଉଠାଯାଉଥିବ ତେବେ ତଦନ୍ତ କରି କାର୍ଯ୍ୟାନୁଷ୍ଠନ ଗ୍ରହଣ କରାଯିବ ବୋଲି ସେ କହିଛନ୍ତି।
