ଦର୍ପଣ ତହସିଲ ଅଞ୍ଚଳରେ ବେଆଇନ ମାଙ୍କଡ଼ା ଖାଦାନ
9:40 amMay 3, 2023May 3, 2023 / 09

ଚଣ୍ଡିଖୋଲ,୩।୫(ଡି.ଏନ୍‌.ଏ.): ଯାଜପୁର ଜିଲା ଦର୍ପଣ ତହସିଲ ଅଧୀନ ପଶ୍ଚିମ ବଡ଼ଚଣା କୁହାଯାଉଥିବା ୪ଟି ପଞ୍ଚାୟତରେ ବେଆଇନ ମାଙ୍କଡ଼ା ଖାଦାନ ଦୀର୍ଘ ଦିନ ଧରି ଚାଲିଛି। ଏନେଇ ଧରିତ୍ରୀରେ ଖବର ପ୍ରକାଶ ପରେ ତହସିଲ କାର୍ଯ୍ୟାଳୟ ପକ୍ଷରୁ ୩ ବେଆଇନ ଖାଦାନରେ ୧୪୪ଧାରା ଜାରି କରାଯିବା ସହ ନାଲିପତକା ମରାଯାଇଛି। ଏତିକିରେ ତହସିଲ କର୍ତ୍ତୃପକ୍ଷ କାମ ସାରି ଦେଇଛନ୍ତି।
ସୂଚନା ଥାଉକି, ଏହି ତହସିଲ ଅନ୍ତର୍ଗତ ବୈରୀ, ପାରିଆ, ସମିଆ ଓ ଶାଳପଡ଼ା ପଞ୍ଚାୟତରେ ୧୨ରୁ ଊର୍ଦ୍ଧ୍ୱ ବେଆଇନ ମାଙ୍କଡ଼ା ଖାଦାନ ଚାଲୁଛି। ଦିନରେ ମାଙ୍କଡ଼ା ଖନନ କରାଯାଉଥିବା ବେଳେ ସନ୍ଧ୍ୟାପରେ ଟ୍ରକ୍‌ଯୋଗେ ବାହାରକୁ ଚାଲାଣ ହେଉଛି। ଯାଜପୁର, କଟକ, କେନ୍ଦ୍ରାପଡ଼ା ଓ ଜଗତ୍‌ସିଂହପୁର ଜିଲାକୁ ଏସବୁ ଚାଲାଣ କରାଯାଉଛି। ନିକଟରେ ବୈରୀ ଥାନା ଥିବାବେଳେ ପୋଲିସ ମଧ୍ୟ ଦେଖି ନ ଦେଖିଲା ପରି ଅଭିନୟ କରୁଛି। ଦୈନିକ ସନ୍ଧ୍ୟାପରେ ଛତିଆ କଳକଳା ରାସ୍ତା ଓ ଶାଳପଡ଼ା-ଦର୍ପଣୀ ରାସ୍ତା ଦେଇ ଟ୍ରକ୍‌ଗୁଡ଼ିକ ମାଙ୍କଡ଼ା ବୋଝେଇ କରି ଯାତାୟାତ କରୁଛନ୍ତି।
ଫେବୃୟାରୀ ପ୍ରଥମ ସପ୍ତାହରେ ଯାଜପୁର ରୋଡ୍‌ ଏସ୍‌ଡିପିଓ ସଞ୍ଜୟ କୁମାର ପଟ୍ଟନାୟକ ବୈରୀ ଥାନାକୁ ଯାଉଥିବାବେଳେ ରାସ୍ତାରେ ଆସୁଥିବା ଦୁଇଟି ମାଙ୍କଡ଼ା ପଥର ବୋଝେଇ ଟ୍ରକ୍‌କୁ ଅଟକାଇ ବୈରୀ ପୋଲିସ ଜିମା ଦେଇଥିଲେ। ଏହାପରେ ପୋଲିସ କିମ୍ବା ତହସିଲ ପ୍ରଶାସନ ଏହାକୁ ରୋକିବାରେ ସକ୍ଷମ ହୋଇନାହାନ୍ତି, ଯଦ୍ଦ୍ବାରା ବିପୁଳ ଟଙ୍କାର ରାଜସ୍ବ ହାନି ଘଟୁଥିବା ଜଣାପଡ଼ିଛି। ୧୫ ବର୍ଷ ତଳେ ତତ୍କାଳୀନ କେନ୍ଦ୍ରାଞ୍ଚଳ ରାଜସ୍ବ କମିଶନର ଅଚାନକ ବେଆଇନ ମାଙ୍କଡ଼ା ଖାଦାନରେ ଚଢ଼ାଉ କରିଥିଲେ। ଏହି ସମୟରେ ବନବିଭାଗର ୬ଜଣ କର୍ମଚାରୀଙ୍କୁ ନିଲମ୍ବନ କରିଥିଲେ। ଏହାପରେ କିଛି ବର୍ଷ ବେଆଇନ ଖାଦାନ ବନ୍ଦ ହୋଇଯାଇଥିଲା। ଠିକ୍‌ ସେହିଭଳି ୨୦୨୧ରେ ପ୍ରଦୀପ କୁମାର ସେଠୀ ତହସିଲଦାର ଭାବେ ନିଯୁକ୍ତି ପାଇଲା ପରେ ସେ ମଧ୍ୟ ବିଭିନ୍ନ ସମୟରେ ଚଢ଼ାଉ କରିବା ଦ୍ୱାରା ବେଆଇନ ମାଙ୍କଡ଼ା କାଟୁଥିବା ମାଫିଆ ଖନନ ବନ୍ଦ କରିଦେଇଥିଲେ। ତାଙ୍କ ସମୟରେ ୫୦ରୁ ଊର୍ଦ୍ଧ୍ୱ ଟ୍ରକ୍‌ ଜବତ ହୋଇଥିଲା। ଏବେ ଆଖିଦୃଶିଆ ଚଢ଼ାଉ ନ ହେବା ଯୋଗୁ ବେଆଇନ ଖାଦାନ ଚାଲିଥିବାସ୍ଥାନୀୟ ଲୋକେ ଅଭିଯୋଗ କରିଛନ୍ତି।
ମାଫିଆ କଟର ମେଶିନ ସାହାଯ୍ୟରେ ମାଙ୍କଡ଼ା କାଟି ଦିନସାରା ଗଚ୍ଛିତ ରଖୁଛନ୍ତି। ରାତି ହେଲେ ଏହାକୁ ବାହାରକୁ ଚାଲାଣ କରୁଛନ୍ତି। ତୁରନ୍ତ ଯାଜପୁର ଜିଲାପାଳ ଏଥିପ୍ରତି ଦୃଷ୍ଟି ଦେଇ ବେଆଇନ ମାଙ୍କଡ଼ା ଖାଦାନ ବନ୍ଦ କରିବାକୁ ସ୍ଥାନୀୟ ଲୋକେ ଦାବି କରିଛନ୍ତି। ଏ ସମ୍ପର୍କରେ ଦର୍ପଣ ତହସିଲଦାର ଶୁଭଦର୍ଶନ ମିଶ୍ରଙ୍କୁ ପଚାରିବାରେ ସେ କହିଛନ୍ତି, ମୋର ଅନ୍ୟତ୍ର ବଦଳି ହୋଇଗଲାଣି। ମୋ ସମୟରେ କେତେକ ଖାଦାନରେ ଚଢ଼ାଉ କରି ୧୪୪ଧାରା ଜାରି କରିଛି। ଯେ ନୂଆ ତହସିଲଦାର ଆସିବେ ସେ କାର୍ଯ୍ୟନୁଷ୍ଠାନ ନେଇପାରିବେ।