କଟକ ଅଫିସ,୫।୮: ୨ ଦିନ ହେବ ନିଖୋଜ ପୁଅର ପତ୍ତା ପାଉ ନ ଥିବା ପରିବାର ଲୋକ ଶେଷରେ କଟକ ମହାନଦୀ ଜୋବ୍ରା ଆନିକଟ ନିକଟରୁ ମୃତଦେହ ପାଇଛନ୍ତି। ପ୍ରେମ ବ୍ୟାପାରରୁ ପୁଅର ଜୀବନ ଚାଲିଯାଇଥିବା ବେଳେ ପୁଅ ଗର୍ଲଫ୍ରେଣ୍ଡର ପୁରୁଣା ବୟଫ୍ରେଣ୍ଡକୁ ଘଟଣା ପାଇଁ ପରିବାର ଲୋକ ଦାୟୀ କରିଛନ୍ତି। ମୃତକ ହେଲେ କଟକସ୍ଥିତ ଖ୍ରୀଷ୍ଟ କଲେଜ ଛାତ୍ର ତୁଷାରକାନ୍ତ ସାହୁ।
ସୂଚନାଯୋଗ୍ୟ, ଗତ ୩ ତାରିଖରୁ ତୁଷାର ବାଇକ ନେଇ ଘରୁ ବାହାରି ଆସିଥିଲେ। ହେଲେ ଆଉ ଫେରି ନ ଥିଲେ। ପରିବାର ଲୋକ ବହୁ ଖୋଜାଖୋଜି କରିବା ପରେ ମଧ୍ୟ ପୁଅର ପତ୍ତା ମିଳି ନ ଥିଲା। ଏ ନେଇ କ୍ୟାଣ୍ଟେନମେଣ୍ଟ ଥାନାରେ ଅଭିଯୋଗ କରି ପୁଅର ଗର୍ଲଫ୍ରେଣ୍ଡଙ୍କ ପୂର୍ବତନ ବୟଫ୍ରେଣ୍ଡ ତୁଷାରଙ୍କୁ ଅପହରଣ କରିଥିବା ତାଙ୍କ ପରିବାର ଲୋକ ଅଭିଯୋଗ କରିଥିଲେ । ପରେ ଧବଳେଶ୍ୱର ଘାଟରୁ ତାଙ୍କ ବାଇକ୍ ମିଳିଥିବା ବେଳେ ପୋଲିସ ଉପସ୍ଥିତିରେ ମହାନଦୀରେ ଅଗ୍ନିଶମ ଏବଂ ଓଡ୍ରାଫ ଟିମ ଖୋଜାଖୋଜି ଆରମ୍ଭ କରିଥିଲେ। ଦୀର୍ଘ ସମୟ ଖୋଜାଖୋଜି ପରେ କଟକ ମହାନଦୀ ଜୋବ୍ରା ଆନିକଟରୁ ତୁଷାରଙ୍କ ମୃତଦେହ ଉଦ୍ଧାର ହୋଇଛି।
