ଭଞ୍ଜନଗର,୧୭।୧୦(ବାବୁଲା ପ୍ରଧାନ): ରାଜ୍ୟ ସରକାର ଏବଂ ଆନ୍ତର୍ଜାତୀୟ ଧାନ ଗବେଷଣା କେନ୍ଦ୍ରର ମିଳିତ ସହଯୋଗରେ କୃଷି ବିଜ୍ଞାନ କେନ୍ଦ୍ର, ଗଞ୍ଜାମ-୧ ଭଞ୍ଜନଗର ସମ୍ମିଳନୀ କକ୍ଷଠାରେ ସୁସ୍ଥ ଓ ଉତ୍ତମ ବିହନ ଉତ୍ପାଦନ ଉପରେ ଏକ ତାଲିମ କାର୍ଯ୍ୟକ୍ରମ ଶୁକ୍ରବାର ଅନୁଷ୍ଠିତ ହୋଇଯାଇଛି। ଉକ୍ତ କାର୍ଯ୍ୟକ୍ରମରେ ମୁଖ୍ୟ ଜିଲା କୃଷି ଅଧିକାରୀ ଡ. ଅଜୟ କୁମାର କର ମୁଖ୍ୟ ଅତିଥି ଭାବେ ଯୋଗ ଦେଇଥିଲେ । ଅନ୍ୟମାନଙ୍କ ମଧ୍ୟରେ ବିହନ ପ୍ରମାଣନ ଅଧିକାରୀ ରଘୁନାଥ ମହାପାତ୍ର ଗଞ୍ଜାମ, କୃଷି ଜିଲା ଅଧିକାରୀ ବୌମ୍ୟକେଶ ମିଶ୍ର, ଭଞ୍ଜନଗର ଏବଂ ସତ୍ୟବ୍ରତ ଦାସ ଆସ୍କା, କୃଷି ବିଜ୍ଞାନ କେନ୍ଦ୍ର ମୁଖ୍ୟ ବୈଜ୍ଞାନିକ ଭଞ୍ଜନଗର ଡ. ସୁତନୁ କୁମାର ଶତପଥୀ, ଗୋଷ୍ଠୀ କୃଷି ଅଧିକାରୀ ଭଂଜନଗର, ଆସ୍କା, ବୁଗୁଡା, ଜଗନ୍ନାଥ ପ୍ରସାଦ ଓ ବେଲଗୁଣ୍ଠା, ଆୟୋଜକ ସଂସ୍ଥା ଇରୀର ବିଶେଷଜ୍ଞ-ବିହନ ପ୍ରଣାଳୀ ଏବଂ ଉତ୍ପାଦ ପରିଚାଳନା ଗିରିଜା ପ୍ରସାଦ ସ୍ବାଇଁ, କୃଷି ପରିଦର୍ଶକ, ଗ୍ରାମ୍ୟ କୃଷି କର୍ମଚାରୀ, କୃଷକ ଉତ୍ପାଦକ ସଂଘ ଓ ଅଗ୍ରଣୀ ଚାଷୀ ଯୋଗ ଦେଇଥିଲେ। ପ୍ରଥମେ ସହଯୋଗୀ ଅନୁଷ୍ଠାନ ନିର୍ଦ୍ଦେଶର ନିର୍ଦ୍ଦେଶକ ଗିରିଧାରୀ ପଟ୍ଟନାୟକ ସ୍ବାଗତ ଭାଷଣ ପ୍ରଦାନ କରିଥିଲେ । ଆୟୋଜକ ସଂସ୍ଥା ଇରୀର ବିଶେଷଜ୍ଞ କାର୍ଯ୍ୟକ୍ରମ ଉପରେ ବିସ୍ତୃତ ଭାବେ ଆଲୋଚନା କରିଥିଲେ । ମୁଖ୍ୟ ଅତିଥି ପୋଷଣ ଯୁକ୍ତ ଧାନ ଚାଷ, ଗୁଣାତ୍ମକ ବିହନ କିପରି ସଂଗ୍ରହ କରାଯାଇପାରିବ ଓ ଏହାକୁ ଚାଷ କ୍ଷେତ୍ରରେ ବ୍ୟବହାର କଲେ ଫସଲ ନିରୋଗ ହେବା ସହିତ ଅଧିକ ଅମଳ ହୋଇପାରିବ ବୁଝାଇଥିଲେ । ବିହନ ପ୍ରମାଣନ ଅଧିକାରୀ ବିହନ ସଂଗ୍ରହ ପ୍ରଣାଳୀ, ସଂରକ୍ଷଣ ଓ ପ୍ରୟୋଗ ବିଷୟରେ ଆଲୋଚନା କରିଥିଲେ। ବ୍ଲକ କୃଷି ଅଧିକାରୀ ଭଞ୍ଜନଗର ସରକାରଙ୍କ ଦ୍ୱାରା ମିଳୁଥିବା କୃଷି ଯନ୍ତ୍ରପାତି, ଜଳସେଚନ ବ୍ୟବସ୍ଥା ଉପରେ ବୁଝାଇବା ସହିତ ବରିଷ୍ଠ ବୈଜ୍ଞାନିକ ଓ ମୁଖ୍ୟ କୃଷି ବିଜ୍ଞାନ କେନ୍ଦ୍ର ଜୈବିକ ସାର ପ୍ରୟୋଗ, ବିହନ ପରିଚାଳନା ଦ୍ୱାରା ଉତ୍ପାଦିତ ଶସ୍ୟରୁ କ’ଣ ପୃଷ୍ଟିସାର ମିଳିଥାଏ ତାହା ପିପିଟି ମାଧ୍ୟମରେ ବୁଝାଇଥିଲେ। ଜିଲା କୃଷି ଅଧିକାରୀ ସମସ୍ତ ଆଲୋଚନା ବିଷୟ କିଭଳି ସଫଳ କାର୍ଯ୍ୟକ୍ଷମ ହେବା ସହିତ ଗୁଣାତ୍ମକ ଓ ସୁସ୍ଥ ବିହନ ଉତ୍ପାଦନ କରିବା ଓ ଏହାର ସଂରକ୍ଷଣ ନିମନ୍ତେ ପରାମର୍ଶ ଦେଇଥିଲେ । ଡ. ସାତୀ ସଙ୍ଗପ୍ରଭା କୃଷି ବିଜ୍ଞାନ କେନ୍ଦ୍ର, ଭଞ୍ଜନଗର, ଗଞ୍ଜାମ-୧ ବିଷୟ ବସ୍ତୁ ବିଶେଷଜ୍ଞ ଧନ୍ୟବାଦ ପ୍ରଦାନ କରିଥିଲେ ।
