ଭଞ୍ଜନଗର,୧୭।୩ (ବାବୁଲା ପ୍ରଧାନ): ରାଜ୍ୟ ସଭା ନିର୍ବାଚନରେ କ୍ରସ ଭୋଟିଂକୁ ନେଇ ଓଡ଼ିଶା ରାଜନୀତିରେ ବଡ଼ ଧରଣର ଚର୍ଚ୍ଚା ଲାଗି ରହିଛି। କଂଗ୍ରେସ ଓ ବିଜେଡିର ୧୧ ଜଣ ବିଧାୟକ ଦଳୀୟ ନିଷ୍ପତ୍ତି ବିରୋଧରେ ଯାଇ ଭୋଟ ଦେବା ଫଳରେ ସ୍ବାଧୀନ ପ୍ରାର୍ଥୀ ସହଜରେ ବିଜୟୀ ହୋଇଛନ୍ତି। ଏହି ‘ଦଳ ବିରୋଧୀ’ କାର୍ଯ୍ୟ ପାଇଁ ପ୍ରଦେଶ କଂଗ୍ରେସ କମିଟି ପକ୍ଷରୁ କଟକ-ବାରବାଟୀ ବିଧାୟିକା ସୋଫିଆ ଫିର୍ଦ୍ଦୋଷ, ସାନଖେମୁଣ୍ଡି ବିଧାୟକ ରମେଶ ଜେନା ଏବଂ ମୋହନା ବିଧାୟକ ଦାଶରଥି ଗମାଙ୍ଗଙ୍କୁ ଦଳରୁ ନିଲମ୍ବିତ କରାଯାଇଛି। ଏହି ଘଟଣାକୁ ନେଇ ଗଞ୍ଜାମ ଜିଲା ଭଞ୍ଜନଗର କଂଗ୍ରେସ ଶିବିରରେ ତୀବ୍ର ଅସନ୍ତୋଷ ଦେଖାଦେଇଛି। ପୂର୍ବତନ ବ୍ଲକ ଅଧ୍ୟକ୍ଷ ବି. ଦଣ୍ଡପାଣି ପାତ୍ର ଏବଂ ଭଞ୍ଜନଗର ବିଧାୟକ ପ୍ରାର୍ଥୀ ପ୍ରଶାନ୍ତ କୁମାର ବିଷୋୟୀ ଏକ ଖବରଦାତା ସମ୍ମିଳନୀ ଜରିଆରେ କ୍ରସ ଭୋଟିଂ କରିଥିବା ବିଧାୟକମାନଙ୍କୁ କଡ଼ା ସମାଲୋଚନା କରିଛନ୍ତି।
ନେତାଦ୍ୱୟ କହିଛନ୍ତି ଯେ, ଏହି ବିଧାୟକମାନେ ନିଜର ବ୍ୟକ୍ତିଗତ ସ୍ବାର୍ଥ ହାସଲ ପାଇଁ ହଜାର ହଜାର କଂଗ୍ରେସ କର୍ମୀଙ୍କ ବିଶ୍ୱାସରେ ବିଷ ଦେଇଛନ୍ତି। ଦଳୀୟ ଟିକେଟ୍ରେ ଜିତି ଅନ୍ୟ ପ୍ରାର୍ଥୀଙ୍କୁ ସମର୍ଥନ କରିବା ଅତ୍ୟନ୍ତ ନିନ୍ଦନୀୟ। ବହିଷ୍କୃତ ବିଧାୟକଙ୍କ ବିରୋଧରେ ଆଇନଗତ ଓ ଦୃଢ଼ ଦଳୀୟ କାର୍ଯ୍ୟାନୁଷ୍ଠାନ ପାଇଁ ସେମାନେ ଦାବି କରିଛନ୍ତି। କ୍ରସ ଭୋଟିଂକୁ ବିରୋଧ କରି ଆସନ୍ତାକାଲି ଗାଲେରୀଠାରେ ଉକ୍ତ ନେତାମାନଙ୍କର କୁଶପୁତ୍ତଳିକା ଦାହ କରାଯିବ ବୋଲି ସୂଚନା ମିଳିଛି। ଆଗାମୀ ଦିନରେ ଜିଲାର ସମସ୍ତ ନିର୍ବାଚନ ମଣ୍ଡଳୀରେ ଏହି ଆନ୍ଦୋଳନକୁ ବ୍ୟାପକ କରାଯିବ ବୋଲି ଦଣ୍ଡପାଣି ଚେତାବନୀ ଦେଇଛନ୍ତି।
ଏହି କ୍ରସ ଭୋଟିଂ ଫଳରେ ବିଜେଡି ଓ କଂଗ୍ରେସ ଶିବିରରେ ନିରୁତ୍ସାହ ଦେଖାଦେଇଥିବା ବେଳେ ଭାଜପା ଶିବିର ଉତ୍ସାହିତ ହୋଇପଡ଼ିଛି। ନିଜ ଅଞ୍ଚଳକୁ ଫେରିବା ସମୟରେ ଏହି ବିଧାୟକମାନେ ନିଜ କର୍ମୀ ଓ ସାଧାରଣ ଜନତାଙ୍କ ଅନେକ ଅପ୍ରୀତିକର ପ୍ରଶ୍ନର ସମ୍ମୁଖୀନ ହେବାର ସମ୍ଭାବନା ରହିଛି।
