ଢେଙ୍କାନାଳ ଅଫିସ,୨୨।୪: ମୂଳ ବେତନରେ ପରିବର୍ତ୍ତନ ଏବଂ ଅନ୍ୟାନ୍ୟ ଦାବି ନେଇ ଢେଙ୍କାନାଳ ଜିଲା ମିଳିତ ଅମଲା ମଞ୍ଚ ପକ୍ଷରୁ ଶୁକ୍ରବାର ବିକ୍ଷୋଭ କରାଯାଇଛି। ସରକାର ଦାବି ପୂରଣରେ ଯେଉଁ ଟାଳଟୂଳ ନୀତି ଅବଲମ୍ବନ କରୁଛନ୍ତି, ତାହା ଅସହ୍ୟ। ଏହାକୁ ଆଉ ବରଦାସ୍ତ କରାଯିବ ନାହିଁ। ଦାବିପୂରଣ ନ ହେଲେ କାର୍ଯ୍ୟବନ୍ଦ ଆନ୍ଦୋଳନ କରାଯିବ ବୋଲି ସଂଘ ପକ୍ଷରୁ ଖୋଲା ଚେତାବନୀ ଦିଆଯାଇଛି। ଏ ସଂକ୍ରାନ୍ତ ଏକ ଦାବିପତ୍ର ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଜିଲାପାଳ ସରୋଜ କୁମାର ସେଠୀଙ୍କୁ ପ୍ରଦାନ କରାଯାଇଛି।
ଅଭିଯୋଗ ଅନୁଯାୟୀ, ରାଜ୍ୟ ସରକାର ୨୦୧୭ରୁ ଜିଲାସ୍ତରୀୟ ଅମଲାଙ୍କ ଶିକ୍ଷାଗତ ଯୋଗ୍ୟତା ଯୁକ୍ତ ୨ରୁ ସ୍ନାତକ ଓ କମ୍ପ୍ୟୁଟର କରିଛନ୍ତି। ହେଲେ ମୂଳ ଦରମାରେ କୌଣସି ପରିବର୍ତ୍ତନ ହୋଇନାହିଁ। ଅଦ୍ୟାବଧି ମାଟ୍ରିକ୍ ହାରରେ ବେତନ ପ୍ରଦାନ କରାଯାଉଛି। ବାରମ୍ବାର ଦାବିସତ୍ତ୍ୱେ ସରକାର ଏଥିପ୍ରତି କର୍ଣ୍ଣପାତ କରୁନାହାନ୍ତି। ଜରୁରୀ ସମୟରେ ଅମଲାମାନେ ନିଜ ଦାୟିତ୍ୱ ସୂଚାରୁରୂପେ ସମ୍ପାଦନ କରିଆସୁଛନ୍ତି। ତଥାପି ସରକାରଙ୍କ ଏଭଳି ଉଦାସୀନତା ପରିତାପର ବିଷୟ ବୋଲି ମିଳିତ ମଞ୍ଚ ପକ୍ଷରୁ କୁହାଯାଇଛି। ଜିଲାସ୍ତରୀୟ ଅମଲାଙ୍କ ଶିକ୍ଷାଗତ ଯୋଗ୍ୟତା ଆଧାରରେ କନିଷ୍ଠ ସହାୟକ ପଦବୀକୁ ପଦୋନ୍ନତି, ମୂଳ ଦରମା ଗ୍ରେଡ୍ ପେ’ ୧୯୦୦ (ଲେଭେଲ-୪) ବଦଳରେ ଗ୍ରେଡ୍ ପେ’ ୪୨୦୦ (ଲେଭଲ୍-୯) ପ୍ରଦାନ କରିବାକୁ ମଞ୍ଚ ପକ୍ଷରୁ ଦୃଢ଼ ଦାବି ଉପସ୍ଥାପନ କରାଯାଇଛି। ଏହା ନ ହେଲେ ଅମଲାମାନେ କଳାବ୍ୟାଜ୍ ପରିଧାନ କରିବେ। ତଥାପି ସରକାର ନିରାଶ କଲେ କାର୍ଯ୍ୟବନ୍ଦ ଆନ୍ଦୋଳନ କରାଯିବ ବୋଲି ମିଳିତ ଅମଲା ମଞ୍ଚର ଅଧ୍ୟକ୍ଷ ବିଭୂତି ଭୂଷଣ ପଟ୍ଟନାୟକ, ଆବାହକ ଅରୁଣ କୁମାର ବଳିୟାରସିଂ ଚେତାବନୀ ଦେଇଛନ୍ତି।
ଏଥିପୂର୍ବରୁ ୭୦୦ରୁ ଊର୍ଦ୍ଧ୍ୱ ଅମଲାଙ୍କ ଏକ ବିଶାଳକାୟ ଶୋଭାଯାତ୍ରା ବସ୍ଷ୍ଟାଣ୍ଡସ୍ଥିତ ଟ୍ରାଫିକ୍ ଛକ ହନୁମାନ ବାଟିକା ନିକଟରୁ ବାହାରିଥିଲା। ରାଲି ଜିଲା କାର୍ଯ୍ୟାଳୟ ସମ୍ମୁଖରେ ପହଞ୍ଚତ୍ବା ପରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ଏଥିରେ ଓଡ଼ିଶା ଅମଲା ସଂଘ ସମ୍ପାଦକ ଗଣେଶ ଚନ୍ଦ୍ର ପୃଷ୍ଟି, ଓଡ଼ିଶା ରାଜସ୍ବ ଅମଲା ସଂଘ ସମ୍ପାଦକ ପ୍ରକାଶ ଚନ୍ଦ୍ର ସ୍ବାଇଁ, ନିଖିଳ ଓଡ଼ିଶା ଟ୍ରେଜେରି ଅମଲା ସଂଘ ସମ୍ପାଦକ ସଞ୍ଜୟ ସାହୁ, ସବ୍-ରେଜିଷ୍ଟ୍ରାର ଅମଲା ସଂଘ ସମ୍ପାଦକ ରାଜୀବ ସାହୁଙ୍କ ନେତୃତ୍ୱରେ ସମସ୍ତ ବିଭାଗର ଅମଲାମାନେ ଏଥିରେ ସାମିଲ ହୋଇଥିଲେ।
