ନୂଆଦିଲ୍ଲୀ, ୧୧।୭: ଭାରତୀୟ କ୍ରିକେଟ ଦଳ ଇଂଲଣ୍ଡ ବିପକ୍ଷ ଟି-୨୦ ସିରିଜ ହରାଇ ସାରିଛି, କିନ୍ତୁ ଆଜି ଖେଳାଯିବାକୁ ଥିବା ପଞ୍ଚମ ତଥା ଅନ୍ତିମ ଟି-୨୦ ମ୍ୟାଚ ଶ୍ରେୟସ ଆୟର ଏବଂ ଟିମ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ସିରିଜରେ କ୍ଲିନ ସ୍ବିପ୍ରୁ ବର୍ତ୍ତିବା ସହ ଆଇସିସି (ICC) ଟି-୨୦ ର଼୍ୟାଙ୍କିଙ୍ଗରେ ନିଜର ନମ୍ବର ୱାନ ସ୍ଥାନ ବଜାୟ ରଖିବାକୁ ଟିମ ଇଣ୍ଡିଆ ନଜର ରଖିଛି। ଯଦି ଆଜିର ମ୍ୟାଚରେ ଭାରତ ପରାଜିତ ହୁଏ, ତେବେ ଦଳ ନିଜର ଶୀର୍ଷ ସ୍ଥାନ ହରାଇବ। ତେଣୁ ଏହି ମ୍ୟାଚରେ ଭାରତୀୟ ବ୍ୟାଟରମାନଙ୍କ ଉପରେ ପ୍ରବଳ ଚାପ ରହିବ।
ଏହି ସିରିଜରେ ଭାରତର ଯୁବ ତଥା ୧୫ ବର୍ଷୀୟ ବ୍ୟାଟର ବୈଭବ ସୂର୍ଯ୍ୟବଂଶୀ ଏବଂ ଇଂଲଣ୍ଡର ଘାତକ ବୋଲର ଜୋଫ୍ରା ଆର୍ଚ୍ଚରଙ୍କ ମଧ୍ୟରେ କଡ଼ା ଟକ୍କର ଦେଖିବାକୁ ମିଳିଛି। ଦୁହେଁ ଆଇପିଏଲ (IPL) ରେ ରାଜସ୍ଥାନ ରୟାଲ୍ସ ଦଳ ପାଇଁ ଏକାଠି ଖେଳିଛନ୍ତି ଏବଂ ନେଟ୍ସରେ ପରସ୍ପରର ସାମ୍ନା କରିଛନ୍ତି। ପଞ୍ଚମ ମ୍ୟାଚ ପୂର୍ବରୁ ଇଂଲଣ୍ଡର ପୂର୍ବତନ କ୍ରିକେଟର ମୋଇନ ଅଲ୍ଲୀ ଯୁବ ଖେଳାଳି ବୈଭବଙ୍କୁ ଏକ ବଡ଼ ଚେତାବନୀ ଦେଇଛନ୍ତି।
ମୋଇନ ଅଲ୍ଲୀ କହିଛନ୍ତି ଯେ, ଆଇପିଏଲ ସମୟରେ ରାଜସ୍ଥାନ ରୟାଲ୍ସର ନେଟ ପ୍ରାକ୍ଟିସରେ ବୈଭବ ଆର୍ଚ୍ଚରଙ୍କ ବୋଲିଂରେ ଚମତ୍କାର ଶଟ ଖେଳୁଥିବା ସେ ଦେଖିଛନ୍ତି ଏବଂ ଏମିତି ଅନେକ କଥା ଶୁଣିଛନ୍ତି। କିନ୍ତୁ ଅନ୍ତର୍ଜାତୀୟ କ୍ରିକେଟ୍ର ସ୍ଥିତି ସମ୍ପୂର୍ଣ୍ଣ ଭିନ୍ନ।
ମୋଇନ କହିଛନ୍ତି, “ବୈଭବ ଜଣେ ଚମତ୍କାର ବ୍ୟାଟର ଏବଂ ମୁଁ ତାଙ୍କ ଦକ୍ଷତାକୁ କମ ବୋଲି ଭାବୁନାହିଁ। ଆଇପିଏଲରେ ଆର୍ଚ୍ଚର ବୈଭବଙ୍କୁ ଆଉଟ କରିବା ପାଇଁ ଏକ ଜବରଦସ୍ତ ବାଉନ୍ସର ପକାଇଥିଲେ। ନେଟ୍ସରେ ଆର୍ଚ୍ଚରଙ୍କ ଉପରେ ବୈଭବ ହାବି ହୋଇପାରନ୍ତି, କିନ୍ତୁ ଅନ୍ତର୍ଜାତୀୟ ମ୍ୟାଚରେ ପରିସ୍ଥିତି ଅଲଗା ଥାଏ ଏବଂ ଏଠାରେ ଯୁବ ବ୍ୟାଟରଙ୍କ ପାଇଁ ମୁସ୍କିଲ ବଢ଼ିପାରେ।”
