ଭଦ୍ରକ ଅଫିସ,୧୭ା୭-ଭଦ୍ରକ ସହରର ଗାନ୍ଧୀପଡ଼ିଆସ୍ଥିତ ସୀତାରାମ କଲ୍ୟାଣମଣ୍ଡପରେ ବୁଧବାର ଏକ ଆଦର୍ଶ ବିବାହ ଅନୁଷ୍ଠିିତ ହୋଇଯାଇଛି। ଏହି ବାହାଘରରେ ନା ଥିଲା ଯୌତୁକ ନେଣଦେଣ, ନା ଥିଲା ଜାତକ ମେଳାପ, ଶୁଭି ନ ଥିଲା ବ୍ରାହ୍ମଣଙ୍କ ମନ୍ତ୍ରପାଠ। କନ୍ୟା ଓ ବର ମାସ୍କ ପିନ୍ଧିଥିଲେ। କେବଳ ଫୁଲମାଳ ଦିଆନିଆ ହୋଇଥିଲା। ଏହି ବାହାଘର ଦେଖିବା ପାଇଁ କନ୍ୟା ଓ ବରଙ୍କ ସମ୍ପର୍କୀୟଙ୍କ ସହ ଭଦ୍ରକ ସହରର ବୁଦ୍ଧିଜୀବୀ, ଗଣମାଧ୍ୟମ ପ୍ରତିନିଧି, ସାମାଜିକ କର୍ମୀଙ୍କ ଭିଡ଼ ଲାଗିଥିଲା। ବର ସାଜିଥିଲେ ଭଦ୍ରକ ଉପକଣ୍ଠ ଦୋଳସାହି ସେରପୁର ଗାଁର ଗଣେଶ ଯେନା ଓ ଶାନ୍ତିଲତା ଯେନାଙ୍କ ଜ୍ୟେଷ୍ଠପୁତ୍ର ସୁଶାନ୍ତ ଏବଂ କନ୍ୟା ବେଶରେ ସଜେଇ ହୋଇଥିଲେ ଚାନ୍ଦବାଲି ବାଙ୍କିସାହି ଗ୍ରାମର ବଳରାମ ଯେନାଙ୍କ ଜ୍ୟେଷ୍ଠକନ୍ୟା ମାମିନା। କୋଭିଡ୍ କଟକଣା କାରଣରୁ ନିରାଡ଼ମ୍ବର ଭାବେ ବିବାହ କାର୍ଯ୍ୟ ସମାପନ ହୋଇଥିଲା। ଏନେଇ ବର ସୁଶାନ୍ତ କୁହନ୍ତି, ସେ ଜଣେ ସାମାଜିକ କର୍ମୀ। ପୂର୍ବରୁ ସେ ଯୌତୁକ ପ୍ରଥା ଓ ବାହାଘରରେ ମନ୍ତ୍ରପାଠକୁ ବିରୋଧ କରି ଆସୁଥିଲେ। ଏନେଇ ଲୋକଙ୍କୁ ସଚେତନ କରାଉଥିଲେ। ଏଣୁ ସେ ଏହା ପ୍ରଥମେ ନିଜ ବାହାଘରରେ କରି ଦେଖାଇଲେ ବୋଲି ଗଣମାଧ୍ୟମକୁ ସୂଚନା ଦେଇଛନ୍ତି।
