ନୂଆଦିଲ୍ଲୀ,୧୨।୭: ଆଇଡିବିଆଇ ବ୍ୟାଙ୍କ ଘରୋଇକରଣ କାର୍ଯ୍ୟକ୍ରମ ଉପରେ ସରକାର ବର୍ତ୍ତମାନ କାର୍ଯ୍ୟ କରୁଛନ୍ତି। ସରକାର ଏବଂ ଏଲ୍ଆଇସି ଏହି ବ୍ୟାଙ୍କରେ ରହିଥିବା ସମ୍ପୂର୍ଣ୍ଣ ଅଂଶଧନକୁ ବିକ୍ରି କରିବାକୁ ଯୋଜନା ରଖିଛନ୍ତି। ପୁଞ୍ଜି ପ୍ରତ୍ୟାହାର ପ୍ରକ୍ରିୟା ଚୂଡ଼ାନ୍ତ ହେଲେ କେତେ ଅଂଶଧନ ଖସିଲା ତାହା ଜଣାପଡ଼ିବ। ଆଗାମୀ ଦିନରେ ଆଇଡିବିଆଇ ବ୍ୟାଙ୍କ ଲାଗି ଏଲ୍ଆଇସି ଏବଂ ସରକାର ସହ ପ୍ରମୋଟର ରହିବେ କି ନାହିଁ ସେ ନେଇ ମଧ୍ୟ ଶେଷ ନିଷ୍ପତ୍ତି ହୋଇନାହିଁ। ବିଭିନ୍ନ କମ୍ପାନୀର ଘରୋଇକରଣ ଉପରେ ସରକାରଙ୍କ ଥିଙ୍କ ଟ୍ୟାଙ୍କ ନୀତି ଆୟୋଗ ବର୍ତ୍ତମାନ କାର୍ଯ୍ୟପନ୍ଥା ଗ୍ରହଣ କରୁଛି। ନୂଆ ସଂସ୍ଥା ହାତକୁ ଗଲେ ବ୍ୟାଙ୍କ ଯେଭଳି ସମ୍ପୂର୍ଣ୍ଣ ଭାବେ ନିଜର ଯୋଜନା ଗ୍ରହଣ କରିବ ସେ ନେଇ ନୀତି ପ୍ରସ୍ତୁତ କରାଯାଇଛି। ସେହିଭଳି ବ୍ୟାଙ୍କର ଘରୋଇକରଣ ପରେ ଯେଭଳି କୌଣସି ସମସ୍ୟା ସୃଷ୍ଟି ନ ହୁଏ ତାକୁ ନେଇ ମଧ୍ୟ ନୀତି ଆୟୋଗ ସରକାରଙ୍କୁ ପରାମର୍ଶ ପ୍ରଦାନ କରିଥିବା ଜଣାପଡିଛି।
ପାଇଁ ନୀତି ଆୟୋଗ ଏକକ ବିଡିଂ ସପକ୍ଷରେ ରହିଛି। ଅର୍ଥାତ୍ ଏହି ବ୍ୟାଙ୍କ ପରିଚାଳନା ଯିଏ ବି ନେବେ ଏକାକୀ ନେବେ। ଗୋଷ୍ଠୀଗତ ବା କନସୋର୍ଟିୟମ ସପକ୍ଷରେ ସରକାର ନାହାନ୍ତି। ଅଂଶଧନ ବିକ୍ରି ଲାଗି ରିଜର୍ଭ ବ୍ୟାଙ୍କର ଚୂଡାନ୍ତ ମଞ୍ଜୁରୀ ଲୋଡ଼ା ପଡ଼ିବ। ଉକ୍ତ ବ୍ୟାଙ୍କରେ ରହିଥିବା ୧୦୦% ଅଂଶଧନକୁ ସରକାର ଏବଂ ଏଲ୍ଆଇସି ଖସାଇପାରିବେ ବୋଲି ଅର୍ଥନୈତିକ ବ୍ୟାପାର ସମ୍ପର୍କିତ କ୍ୟାବିନେଟ କମିଟି(ସିସିଇଏ) ସବୁଜ ସଙ୍କେତ ପ୍ରଦାନ କରିଛନ୍ତି। ଏହାବାଦ୍ ପରିଚାଳନା ନିୟନ୍ତ୍ରଣ ମଧ୍ୟ ହସ୍ତାନ୍ତର କରାଯିବ। ନିବେଶକଙ୍କ ସ୍ବାର୍ଥକୁ ଦୃଷ୍ଟିରେ ରଖାଯିବ ବୋଲି ନୀତି ଆୟୋଗ କହିସାରିଛି। ନିବେଶ ଏବଂ ରାଷ୍ଟ୍ରାୟତ୍ତ ସମ୍ପତ୍ତି ପରିଚାଳନା ବିଭାଗ ପକ୍ଷରୁ ପ୍ରକ୍ରିୟାକୁ ତ୍ୱରାନ୍ବିତ କରାଯିବା ସହ ଟ୍ରାଞ୍ଜାକ୍ଶନ ଆଡଭାଇଜରଙ୍କ ବିଭିନ୍ନ ପ୍ରଶ୍ନର ଉତ୍ତର ରଖାଯାଇଛି। ସେହିଭଳି ଟ୍ରାଞ୍ଜାକ୍ଶନ ଆଡ୍ଭାଇଜରଙ୍କ ଲାଗି ଆବେଦନ କରିବା ଅବଧିକୁ ଚଳିତବର୍ଷ ଜୁଲାଇ ୨୩ କରାଯାଇଛି। ଉଲ୍ଲେଖଯୋଗ୍ୟ, ଆଇଡିବିଆଇ ବ୍ୟାଙ୍କରେ ବର୍ତ୍ତମାନ ସରକାରଙ୍କ ୪୫.୫% ଏବଂ ଏଲ୍ଆଇସିର ୪୯% ଅଂଶଧନ ରହିଛି। ବ୍ୟାଙ୍କ ଗତ କିଛିବର୍ଷ ହେବ ଆର୍ଥତ୍କ ସମସ୍ୟା ଦେଇ ଗତି କରୁଛି।
