ଦୁବାଇ, ୮ା୮(ପି.ଟି.)-ଭାରତ ଟି୨୦ ବିଶ୍ୱକପ୍ ୨୦୨୧ ଆୟୋଜନ ଅଧିକାର ବଜାୟ ରଖିଛି। ଅନ୍ୟପକ୍ଷରେ କୋଭିଡ୍-୧୯ ଯୋଗୁ ଚଳିତବର୍ଷ ସ୍ଥଗିତ ରହିଥିବା ସଂସ୍କରଣ ୨୦୨୨ରେ ଅଷ୍ଟ୍ରେଲିଆ ଆୟୋଜନ କରିବ। ଶୁକ୍ରବାର ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)ର ବୋର୍ଡ ବୈଠକରେ ଏ ସମ୍ପର୍କରେ ବିଧିବଦ୍ଧ ନିଷ୍ପତ୍ତି ନିଆଯାଇଛି। ମହାମାରୀ ଯୋଗୁ ବିଶ୍ୱବ୍ୟାପୀ କ୍ରିକେଟ ଖେଳ ପ୍ରଭାବିତ ହୋଇଥିବାରୁ ଆସନ୍ତା ବର୍ଷ ନ୍ୟୁଜିଲାଣ୍ଡରେ ହେବାକୁଥିବା ଅନ୍ତର୍ଜାତୀୟ ଦିନିକିିଆ ମହିଳା ବିଶ୍ୱକପ୍ ୨୦୨୨ ଫେବୃୟାରୀ-ମାର୍ଚ୍ଚକୁ ଘୁଞ୍ଚାଇ ଦିଆଯାଇଥିବା ଆଇସିସି କହିଛି। ଆଇସିସି ମୁଖ୍ୟ କାର୍ଯ୍ୟନିର୍ବାହୀ ମନୁ ସାହନେ କହିଛନ୍ତି, ଆଇସିସିର ଭବିଷ୍ୟତ ଇଭେଣ୍ଟଗୁଡ଼ିକ ସମ୍ପର୍କରେ ସ୍ପଷ୍ଟ କରିଦିଆଯାଇଛି। ଏହାଦ୍ୱାରା ଆମର ସମସ୍ତ ସଦସ୍ୟମାନେ ସେମାନଙ୍କ ଅନ୍ତର୍ଜାତୀୟ ଏବଂ ଘରୋଇ କ୍ରିକେଟ କାର୍ଯ୍ୟସୂଚୀ ପୁନଃନିର୍ଦ୍ଧାରଣ କରିପାରିବେ। ୨୦୨୦ ସଂସ୍କରଣ ଲାଗି ଯେଉଁ ଫର୍ମାଟ ଥିଲା ୨୦୨୧ରେ ତାହା ଅପରିବର୍ତ୍ତିତ ରହିବ। ଇଭେଣ୍ଟ ପାଇଁ ଯୋଗ୍ୟତା ଅର୍ଜନ କରିଥିବା ସମସ୍ତ ଦଳ ଭାରତରେ ହେବାକୁଥିବା ୨୦୨୧ ସଂସ୍କରଣରେ ଭାଗ ନେଇ ପାରିବେ। ଅଷ୍ଟ୍ରେଲିଆରେ ହେବାକୁଥିବା ୨୦୨୨ ସଂସ୍କରଣ ପାଇଁ କିନ୍ତୁ ଏକ ନୂଆ କ୍ୱାଲିଫିକେଶନ ପ୍ରକ୍ରିୟା ଆରମ୍ଭ ହେବ। ଆଇସିସି ବୋର୍ଡର ଜଣେ ସଦସ୍ୟ କହିଥିଲେ ଯେ, କୋଭିଡ୍-୧୯ ମହାମାରୀ ଯୋଗୁ ବିଭିନ୍ନ ଦେଶ ବିଭିନ୍ନ ପ୍ରକାର ସମସ୍ୟାର ସମ୍ମୁଖୀନ ହୋଇଛନ୍ତି। ଏହି ସମୟରେ କ୍ୱାଲିଫାୟର୍ସ ଆୟୋଜନ କରିବା କଷ୍ଟସାଧ୍ୟ। ଖବର ଅନୁସାରେ ଭାରତ ୨୦୨୩ରେ ୫୦ ଓଭର ବିଶ୍ୱକପ୍ ଆୟୋଜନ କରିବାକୁ ଥିବାରୁ ପଛକୁ ପଛ ଦୁଇଟା ଇଭେଣ୍ଟ କରିବାକୁ ରାଜି ହୋଇ ନ ଥିଲା। ତେଣୁ ୨୦୨୨ରେ ଟି୨୦ ବିଶ୍ୱକପ୍ ଆୟୋଜନ ପ୍ରସ୍ତାବକୁ ଏଡାଇ ଦେଇଥିଲା। ଅନ୍ୟପକ୍ଷରେ ମହିଳା ବିଶ୍ୱକପ୍ ସ୍ଥଗିତ ରଖାଯିବା ଦ୍ୱାରା ମିଥାଲି ରାଜ ଓ ଝୁଲଣ ଗୋସ୍ବାମୀଙ୍କ ଭଳି କିମ୍ବଦନ୍ତୀ ଖେଳାଳିଙ୍କ ଭବିଷ୍ୟତକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ସେମାନେ ସମ୍ଭବତଃ ୨୦୨୧ରେ ସେମାନଙ୍କର ଅନ୍ତିମ ଆଇସିସି ଟୁର୍ନାମେଣ୍ଟ ଖେଳିଥାନ୍ତେ।
