ସେଇ ସମୟର ସମ୍ବଲପୁର ଜିଲାର ଗୋଟିଏ ଛୋଟ ଅଥଚ ପ୍ରସିଦ୍ଧ ଗାଁ ବରପାଲି । ଛୋଟ ବେଳେ ମଙ୍ଗାର ଠକ୍ ଠକ୍ , ବାନ୍ଧର ରଙ୍ଗଭରା ସୁନ୍ଦର ସୁନ୍ଦର ଜୀବନ୍ତ କଳା, ଖୋଷାକୁ ଶିଝେଇ ମଠା ସୂତା କାଢ଼ିବା ଇତ୍ୟାଦି ଦେଖି ଆସିଥିଲି ଆଖ ପାଖ ସବୁ ଘରର କୌଳିକ ବୃତ୍ତି ଭାବରେ । ଟିକେ ବଡ଼ ହେଲି ପରିଚିତ ହେଲି ମୋର ମାଟିର ଅନନ୍ୟ କବି ଗଙ୍ଗାଧର ମେହେରଙ୍କ ସହ । ବାପା ସ୍ଥାନୀୟ ଗଙ୍ଗାଧର ଏନ.ଏ.ସି. ହାଇସ୍କୁଲର ହେଡ଼ମାଷ୍ଟର ଥିଲେ । ଛୋଟ ବେଳେ ପାଟି ମୋର ଲାଗୁଥିଲା, ଦ୍ବିତୀୟ ଶ୍ରେଣୀରୁ ବକ୍ତୃତା ପ୍ରତିଯୋଗିତାରେ ଭାଗ ନେବା ପରେ ପରେ ମୁଁ ସ୍ପଷ୍ଟ କଥା କହିବା ଶିଖି ସାରିଥିଲି । ବରପାଲିର ଅନେକ ଅନୁଷ୍ଠାନ ସେତେବେଳେ ପାଳନ କରୁଥିଲେ ଗଙ୍ଗାଧର ମେହେରଙ୍କ ଜୟନ୍ତୀ । ଶ୍ରାବଣ ମାସ ସାରା ସବୁ ସ୍କୁଲର ବଛା ବଛା ଛାତ୍ରୀଛାତ୍ରଙ୍କ ବକ୍ତୃତା, ରଚନା, ସଙ୍ଗୀତ, ଆବୃତ୍ତି ଇତ୍ୟାଦି ପ୍ରତିଯୋଗିତାର ଆୟୋଜନ କରାଯାଇ ଶ୍ରାବଣ ପୂର୍ଣ୍ଣିମା ଦିନ ଏକ ଭବ୍ୟ ସମାରୋହ ଅନୁଷ୍ଠିତ ହୋଇ ଗଙ୍ଗାଧର ଜୟନ୍ତୀ ପାଳନ ଅବସରରେ ସବୁ ପ୍ରତିଯୋଗିତାର କୃତୀ ପ୍ରତିଯୋଗୀଙ୍କୁ ସମ୍ମାନିତ କରାଯାଉ ଥିଲା। ୧୯୮୬ ମସିହାର କଥା ଓଡ଼ିଶାର ମହାମହୀମ ରାଜ୍ୟପାଳ ଥିଲେ ବିଶ୍ବମ୍ବର ନାଥ ପାଣ୍ଡେ। ତାଙ୍କ ହାତରୁ ବକ୍ତୃତା ଓ ରଚନା ପାଇଁ ପୁରସ୍କାର ଭାବେ ପାଇଲି ଏକ କପ ଓ ଗୋଟିଏ ଏନ-ଭଲ୍ପ। ଘରକୁ ଯାଇ ଦେଖିଲି ଏନ-ଭଲ୍ପ୍ ଭିତରେ ଅଛି ନୂଆଁ ପଚାଶ ଟଙ୍କିଆ ଦୁଇଟା । ବାପା ସବୁବେଳେ କହୁଥିଲେ ବହି ହିଁ ପ୍ରକୃତ ବନ୍ଧୁ ଆଉ ମୋର ପ୍ରିୟର ବିଷୟ ଥିଲା ଗଣିତ ଓ ବିଜ୍ଞାନ, ବାପାଙ୍କ ସାଇକେଲରେ ବସି ମୁଁ ଯାଇଥିଲି ବସଷ୍ଟାଣ୍ଡର ସବୁଠୁ ପୁରୁଣା ପତ୍ରିକା ମହଲ। କିଣି ଆଣିଥିଲୁ କିଛି ଭଲ ଗଣିତ ଓ ବିଜ୍ଞାନ ପୁସ୍ତକ। ଏହାପରେ ବି ମୁଁ ଅନେକ ପୁରସ୍କାର ପାଇଛି। ବାଳିକା ବିଦ୍ୟାଳୟରେ ଏସ୍- ଏ, ଡିବେଟ୍, ସ୍ପୋଟର୍ସ ଇତ୍ୟାଦି ସହ ଗଣିତଠୁ ଆରମ୍ଭ କରି ଯାହା ବି ବିଷୟ ଥିଲା ସବୁଥିରେ ତଥା ଶ୍ରେଣୀରେ ସର୍ବାଧିକ ମାର୍କ ପାଇ ବଡ଼ ଟିଫିନ କେରିଅରଠୁ ଆରମ୍ଭ କରି ଅନେକ କିଛି ପୁରସ୍କାର ମିଳିଥିଲା। ମା’ ସବୁକୁ ରଖି ଦେଇଥିଲେ ବାକ୍ସରେ। ବାହା ହେଲାପରେ ସବୁକୁ ସେ ମତେ ଦେଇଦେଲେ। ଏବେ ମୋ ପାଖରେ ଅନେକ ବ୍ରାଣ୍ଡେଡ୍ କମ୍ପାନୀର ତାପନିୟନ୍ତ୍ରିତ ଟିଫିନକେରିଅର ଭିତରେ ସଦର୍ପରେ ଛିଡା ହୁଏ ପୁରସ୍କାରସ୍ବରୂପ ମିଳିଥିବା ସେଇ ସବୁଠୁ ଲମ୍ବା ଷ୍ଟିଲର ଟିଫିନ କେରିଅର । ସେମିତି ସପ୍ତମରେ ‘ଓ’ ଗ୍ରେଡ୍ ସହ ଏନ.ଆର.ଟି.ଏସ. ବୃତ୍ତି ପଇସା ମିଳିଥିଲା କଲେଜ ପଢ଼ିବା ବେଳକୁ। ଦସ୍ତଖତ ନେଇ ହାତରେ ପଇସା ଦେଇଥିଲେ କ୍ଲକ୍ ସାର୍ । ଆଉ ସେଇ ପଇସାରେ ବାପା ବହି କିଣିଦେଇ ତା’ର ସଦୁପଯୋଗ କରିଥିଲେ । ବି.ଏଡ୍ ପରେ ସରକାରୀ ଚାକିରି କରିବାବେଳକୁ ପାସବୁକ ସିଷ୍ଟମ ଆସିଯାଇଥିଲା। ଆଉ ହାତରେ ପଇସା ଧରିନି, ସେମିତି ଚାକିରି ଛାଡିଲି ଯେ ଅନେକ ମାସର ପଇସା ଉଠାଇବାକୁ ଯାଇନି । ଏବେ ସେ ଏକାଉଣ୍ଟ ହୁଏତ ବନ୍ଦ କରି ଦେଇଥିବେ ସେମାନେ। କିମ୍ବା ଫାଇନ କଟି ଜିରୋ ବାଲାନ୍ସ ହେଇଯାଇଥିବ। ଆଜି କି ୨୦ବର୍ଷ ତଳର ଏକାଉଣ୍ଟ ସେ। ତା’ କଥା ଭାବିନି। ଆଉ ଏବେ ମୁଁ ଜୀବନର ସବୁ କ୍ୟାରିଅର, ରୋଜଗାର, ହିସାବ କିତାବକୁ ପଛରେ ଛାଡି ଚାଲି ଆସିଛି ଅନେକ ବାଟ ଚିରୁଡାଏ ପ୍ରେମ ଆଉ ଝୁଡିଏ ଶବ୍ଦର ପ୍ରାପ୍ତି ରେ …।
