ନୂଆଦିଲ୍ଲୀ,୧୫।୩: ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତନ୍ୟାହୁଙ୍କ ମୃତ୍ୟୁକୁ ନେଇ ଚାଲିଥିବା ଗୁଜବ ଉପରେ ପଡିଛି ପୂର୍ଣ୍ଣଚ୍ଛେଦ। ଏକ ନୂଆ ଭିଡିଓ ଜାରି କରି ନେତନ୍ୟାହୁ ଇରାନକୁ ଚମତ୍କାର ଢଙ୍ଗରେ ଜବାବ ଦେଇଛନ୍ତି।
ନେତନ୍ୟାହୁ ଏକ କାଫେରେ କଫି ଅର୍ଡର କରୁଥିବା ବେଳେ ନିଜ ମୃତ୍ୟୁ ଗୁଜବକୁ ନେଇ ପରିହାସ କରିଛନ୍ତି। ସେ କହିଛନ୍ତି, “ମୁଁ ମୃତ… କିନ୍ତୁ କେବଳ କଫି ପାଇଁ”। ହିବ୍ରୁ ଭାଷାରେ ଏହି ଶବ୍ଦର ଅର୍ଥ ହେଉଛି କୌଣସି ଜିନିଷକୁ ଅତି ଭଲ ପାଇବା। ଏହାସହ ସେ କହିଛନ୍ତି ଯେ, ସେ ନିଜ ଦେଶବାସୀଙ୍କ ପାଇଁ ମଧ୍ୟ ମରିବାକୁ ପ୍ରସ୍ତୁତ ଏବଂ ସେମାନଙ୍କ ଧୈର୍ଯ୍ୟ ପ୍ରଶଂସନୀୟ।
ସୂଚନାଯୋଗ୍ୟ ଯେ, ପୂର୍ବରୁ ଏକ ଭିଡିଓକୁ ନେଇ ଦାବି କରାଯାଉଥିଲା ଯେ ନେତନ୍ୟାହୁଙ୍କ ହାତରେ ୬ଟି ଆଙ୍ଗୁଠି ରହିଛି ଏବଂ ସେହି ଭିଡିଓଟି AI ଦ୍ୱାରା ନିର୍ମିତ। ଏହାର ଜବାବରେ ନେତନ୍ୟାହୁ ନିଜର ଦୁଇ ହାତ କ୍ୟାମେରା ଆଗରେ ଦେଖାଇ କହିଛନ୍ତି, “ଆପଣ ମୋ ଆଙ୍ଗୁଠି ଗଣିବାକୁ ଚାହୁଁଛନ୍ତି କି? ଦେଖନ୍ତୁ, ଏଠାରେ ଏବଂ ଏଠାରେ… ସବୁ ଠିକ୍ ଅଛି।”
אומרים שאני מה? צפו >> pic.twitter.com/ijHPkM3ZHZ
— Benjamin Netanyahu – בנימין נתניהו (@netanyahu) March 15, 2026
ଅନ୍ୟପଟେ ଇସ୍ରାଏଲ ଏବଂ ଇରାନ ମଧ୍ୟରେ ଯୁଦ୍ଧ ଆଜି ୧୬ତମ ଦିନରେ ପହଞ୍ଚିଛି। ଗତ ମାସରେ ଆମେରିକା ଓ ଇସ୍ରାଏଲର ମିଳିତ ଆକ୍ରମଣରେ ଇରାନର ୮୬ ବର୍ଷୀୟ ସର୍ବୋଚ୍ଚ ନେତା ଅଲି ଖାମେନେଇଙ୍କ ମୃତ୍ୟୁ ପରେ ପରିସ୍ଥିତି ଅତି ଭୟଙ୍କର ହୋଇଛି। ଇରାନ ଏବେ ନେତନ୍ୟାହୁଙ୍କୁ ହତ୍ୟା କରିବାକୁ ଧମକ ଦେଇଛି।
ଏହି ଯୁଦ୍ଧରେ ଇରାନରେ ଏବେ ସୁଦ୍ଧା ମୋଟ ମୃତ୍ୟୁସଂଖ୍ୟା ୨,୦୦୦ରୁ ଅଧିକ ପାର କରିଛି। ଇରାନର ୧୫,୦୦୦ରୁ ଅଧିକ ଲକ୍ଷ୍ୟସ୍ଥଳକୁ ଧ୍ୱଂସ କରିଛି ଇସ୍ରାଏଲ-ଆମେରିକା ସେନା। ଯୁଦ୍ଧ କ୍ଷେତ୍ରକୁ USS ତ୍ରିପୋଲି ଜାହାଜ ଏବଂ ୨,୫୦୦ ମେରିନ୍ ସୈନ୍ୟ ପଠାଇଲା ପେଣ୍ଟାଗନ୍।
ନେତନ୍ୟାହୁ ଇସ୍ରାଏଲବାସୀଙ୍କୁ ସତର୍କ ରହିବାକୁ ଏବଂ ସୁରକ୍ଷିତ ସ୍ଥାନର ନିକଟତର ରହିବାକୁ ପରାମର୍ଶ ଦେବା ସହ ଇରାନ ଉପରେ ପ୍ରତିଶୋଧମୂଳକ ଆକ୍ରମଣ ଜାରି ରହିବ ବୋଲି ଦୃଢୋକ୍ତି ପ୍ରକାଶ କରିଛନ୍ତି।
